மோகன்லாலின் த்ரிஷ்யம் 3 படத்தின் ஷூட்டிங் குறித்த தகவல் வெளியாகியுள்ளது.
மலையாள சினிமாவில் மிகப்பெரிய நடிப்பு ஜாம்பவானாக வலம் வரும் மோகன்லால் ஏகப்பட்ட படங்களில் பிசியாக நடித்து வருகிறார். இவருடைய நடிப்பில் கடந்த 2013 ஆம் ஆண்டு ‘த்ரிஷ்யம்’ திரைப்படம் வெளியானது. பரபரப்பான திரைக்கதையில் வெளியான இந்த படத்தில் மோகன்லாலுடன் இணைந்து மீனா, அன்சிபா ஹாசன், எஸ்தர், ஆஷா சரத் மற்றும் பலர் நடித்திருந்தனர். ஜீத்து ஜோசப் இயக்கியிருந்த இந்த படம் குறைந்த பட்ஜெட்டில் எடுக்கப்பட்டிருந்தாலும் ரசிகர்கள் மத்தியில் பெரும் வரவேற்பை பெற்று அதிக லாபத்தை பெற்று தந்தது. படத்தில் நடித்திருந்த அனைத்து கதாபாத்திரங்களுமே பெரிய அளவில் பேசப்பட்டன. 
அதன் பின்னர் 2021 ஆம் ஆண்டு வெளியான ‘த்ரிஷ்யம் 2’ திரைப்படமும் தரமான வெற்றி படமாக அமைந்தது. இதற்கிடையில் தமிழ், தெலுங்கு, இந்தி ஆகிய மொழிகளில் ரீமேக் செய்யப்பட்ட இந்த படத்தை ரசிகர்கள் கொண்டாடி தீர்த்தனர். மேலும் எத்தனை முறை பார்த்தாலும் சலிக்காத இந்த படத்தின் மூன்றாம் பாகம் எப்போது உருவாகும்? என ரசிகர்கள் மிகுந்த எதிர்பார்ப்புடன் காத்துக் கொண்டிருக்கின்றனர். அதன்படி கடந்த சில மாதங்களுக்கு முன்னர் ‘த்ரிஷ்யம் 3’ படம் குறித்த அதிகாரப்பூர்வ அறிவிப்பு வெளியானது. 
அதன் பிறகு படப்பிடிப்பு தொடர்பான தகவல் எதுவும் கிடைக்கவில்லை. இந்நிலையில் வருகின்ற செப்டம்பர் 22ஆம் தேதி தொடுபுழாவில் ‘த்ரிஷ்யம் 3’ படத்தின் படப்பிடிப்பு தொடங்கும் என தற்போதைய தகவல்கள் தெரிவிக்கின்றன. இனிவரும் நாட்களில் மற்ற தகவல்கள் வெளியாகும் என எதிர்பார்க்கப்படுகிறது.