தாம்பரம் காவல் நிலையம் அருகே வழக்கறிஞர் ஒருவரின் இருசக்கர வாகனம் திருடப்பட்ட சம்பவத்தை விசாரிக்கத் தொடங்கிய போலீசார், ஆந்திர மாநிலம் வரை தொடர்புகளைக் கொண்டிருந்த இருசக்கர வாகனத் திருட்டுக் கும்பலைக் கண்டுபிடித்துள்ளனர்.
காஞ்சிபுரம் மாவட்டம், வாலாஜாபாத் அருகேயுள்ள வெண்பாக்கம் பகுதியைச் சேர்ந்தவர் கார்த்திக் ராஜா. இவர் தாம்பரம் நீதிமன்றத்தில் வழக்கறிஞராகப் பணியாற்றி வருகிறார்.
கடந்த 3-ம் தேதி தாம்பரம் காவல் நிலையம் அருகே உள்ள தனியார் மருத்துவமனைக்கு அவர் சென்றுள்ளார்.
அப்போது தனது ஹீரோ ஹோண்டா பேஷன் இருசக்கர வாகனத்தை மருத்துவமனைக்கு வெளியே நிறுத்திவிட்டு உள்ளே சென்றார். சிறிது நேரம் கழித்து திரும்பி வந்து பார்த்தபோது, அங்கு நிறுத்தப்பட்டிருந்த அவரது பைக் காணாமல் போயிருந்தது.
இதனால் அதிர்ச்சியடைந்த கார்த்திக் ராஜா, தாம்பரம் குற்றப்பிரிவு போலீசில் புகார் அளித்தார். புகாரின் அடிப்படையில் வழக்குப் பதிவு செய்த போலீசார், சம்பவம் நடைபெற்ற இடம் மற்றும் அதன் சுற்றுவட்டாரப் பகுதிகளில் பொருத்தப்பட்டிருந்த சிசிடிவி கேமராக்களின் காட்சிகளை ஆய்வு செய்தனர்.
அப்போது, மர்ம நபர் ஒருவர் வாகனத்தைத் திருடிச் செல்வதும், சற்று தொலைவில் மற்றொரு இருசக்கர வாகனத்தில் வந்த இருவர் அவருடன் இணைந்து செல்வதும் பதிவாகியிருந்தது. இதையடுத்து, திருட்டில் ஈடுபட்ட நபர்கள் சென்ற பாதையைக் கண்டறிய போலீசார் விசாரணையை விரிவுபடுத்தினர்.
70-க்கும் மேற்பட்ட கேமராக்களில் தேடுதல்:
சிசிடிவி காட்சிகளின் அடிப்படையில், சந்தேக நபர்கள் முடிச்சூர் சாலை வழியாகச் சென்றது தெரியவந்தது. தொடர்ந்து பல்வேறு பகுதிகளில் இருந்த கேமராக்களின் காட்சிகளை போலீசார் ஆய்வு செய்தனர்.
ஆனால், மதுரவாயல் மேம்பாலம் அருகே சென்றபோது அவர்களின் நடமாட்டத்தைக் கண்டறிவதில் சிக்கல் ஏற்பட்டது. அந்தப் பகுதியில் சிசிடிவி கண்காணிப்பு இல்லாத இடங்கள் இருந்ததால் விசாரணை சவாலானது.
இதனால், அந்தப் பகுதியைச் சுற்றியுள்ள சாலைகள், சந்திப்புகள் மற்றும் முக்கிய இடங்களில் பொருத்தப்பட்டிருந்த 70-க்கும் மேற்பட்ட சிசிடிவி கேமராக்களின் காட்சிகள் ஆய்வு செய்யப்பட்டன.
தொடர் கண்காணிப்பில், சந்தேக நபர்கள் வழியில் உள்ள மதுபானக் கடைக்குச் சென்று சிறிது நேரம் இருந்துவிட்டு, பின்னர் பூந்தமல்லி பைபாஸ் மற்றும் கிஷ்கிந்தா சர்வீஸ் சாலை வழியாகச் சென்றது தெரியவந்தது.
இதற்கிடையே தாம்பரம் பேருந்து நிலையம், ரயில் நிலையம், சண்முக சாலை உள்ளிட்ட பகுதிகளிலும் குறிப்பிட்ட ரக இருசக்கர வாகனங்கள் தொடர்ந்து திருடப்பட்டிருப்பது போலீசாரின் கவனத்துக்கு வந்தது.
ஒரே மாதிரியான வாகனங்கள் குறிவைக்கப்பட்டிருந்ததால், இந்தச் சம்பவங்களுக்குப் பின்னால் ஒரே கும்பல் இருக்கலாம் என்ற சந்தேகம் போலீசாருக்கு ஏற்பட்டது.
தனிப்படை அமைத்து விசாரணை தீவிரம்:
தொடர் வாகனத் திருட்டுச் சம்பவங்களைக் கட்டுப்படுத்தவும், இதன் பின்னணியில் உள்ளவர்களைக் கண்டறியவும் தாம்பரம் காவல் ஆணையரின் உத்தரவின் பேரில் குற்றப்பிரிவு ஆய்வாளர் ராஜ்குமார் தலைமையில் நான்கு பேர் கொண்ட தனிப்படை அமைக்கப்பட்டது.
இந்த விசாரணையின் ஒரு பகுதியாக, திருமுடிவாக்கம் பகுதியில் உள்ள ஒரு வீட்டின் முன்பு சந்தேகத்துக்குரிய இருசக்கர வாகனம் நிறுத்தப்பட்டிருப்பது தெரியவந்தது. அந்த வாகனத்தைத் தொடர்ந்து கண்காணித்த போலீசார், அங்கு வசித்து வந்த நவீன் என்பவரை அடையாளம் கண்டனர்.
இதையடுத்து, அதிகாலை நேரத்தில் திருமுடிவாக்கம் பகுதியில் உள்ள நவீனின் வீட்டுக்குச் சென்ற தனிப்படை போலீசார், அவரைக் கைது செய்தனர்.
பெருங்களத்தூரில் உள்ள தனியார் நிறுவனத்தில் பணியாற்றியபோது, ராணிப்பேட்டை மாவட்டம் அரக்கோணத்தைச் சேர்ந்த முனுசாமி என்ற அப்பு (21) என்பவருடன் நவீனுக்குப் பழக்கம் ஏற்பட்டுள்ளது.
இருவரும் வேலை முடிந்து திரும்பும் வழியில் இருசக்கர வாகனங்களைத் திருடி வந்ததாக விசாரணையில் தெரியவந்துள்ளது.
மேலும், முனுசாமி தனது கூட்டாளிகளுடன் சாதாரண தொலைபேசி அழைப்புகள் மூலம் தொடர்பு கொள்வதைத் தவிர்த்து, இன்ஸ்டாகிராம் செயலி மூலமாகவே தகவல்களைப் பரிமாறிக்கொண்டு வந்ததாக நவீன் தெரிவித்ததாகக் கூறப்படுகிறது.
இன்ஸ்டாகிராம் மூலம் விரிக்கப்பட்ட பொறி:
முனுசாமியின் இருப்பிடத்தைக் கண்டறிவதில் போலீசாருக்கு சிக்கல் ஏற்பட்டது. அவர் தொலைபேசி அழைப்புகளுக்குப் பதிலளிக்காமல் இருந்ததால், அவரை நேரடியாகத் தொடர்புகொள்வது கடினமாக இருந்தது.
இதையடுத்து, நவீனின் இன்ஸ்டாகிராம் கணக்கைப் பயன்படுத்தி முனுசாமியைத் தொடர்புகொள்ள போலீசார் திட்டமிட்டனர்.
அந்தக் கணக்கிலிருந்து முனுசாமிக்கு அனுப்பப்பட்ட தகவலில், தீபாவளிக்குப் பிறகு பணத் தேவை ஏற்பட்டுள்ளதாகவும், செலவுக்காக ஐந்து இருசக்கர வாகனங்களைத் திருடலாம் என்றும் தெரிவிக்கப்பட்டதாகக் கூறப்படுகிறது.
இந்தச் செய்தியை நம்பிய முனுசாமி, அரக்கோணத்திலிருந்து ரயில் மூலம் பெருங்களத்தூருக்கு வந்துள்ளார். அங்கு ஏற்கெனவே கண்காணிப்பில் இருந்த தனிப்படை போலீசார் அவரைச் சுற்றிவளைத்துக் கைது செய்தனர்.
ஆந்திராவில் பைக் விற்பனை செய்த கும்பல்:
நவீன் மற்றும் முனுசாமியிடம் நடத்தப்பட்ட விசாரணையில், திருடப்பட்ட இருசக்கர வாகனங்கள் ஆந்திர மாநிலத்துக்குக் கொண்டு செல்லப்பட்டு விற்பனை செய்யப்பட்டு வந்தது தெரியவந்ததாக போலீசார் தெரிவித்தனர்.
திருடப்பட்ட வாகனங்களை ஆந்திர மாநிலம் நகரி, புதுப்பேட்டை பகுதியைச் சேர்ந்த சந்தோஷ் (21) என்பவரிடம் ஒப்படைத்து வந்துள்ளனர். ஒவ்வொரு வாகனமும் அதன் நிலை மற்றும் வகையைப் பொறுத்து ரூ.5,000 முதல் ரூ.7,000 வரை விற்பனை செய்யப்பட்டதாகக் கூறப்படுகிறது.
இதையடுத்து, ஆந்திர மாநிலத்துக்குச் சென்ற தனிப்படை போலீசார் சந்தோஷைக் கைது செய்தனர். அவரிடமிருந்து ஆறு இருசக்கர வாகனங்கள் பறிமுதல் செய்யப்பட்டதாகத் தெரிவிக்கப்பட்டுள்ளது.
மேலும், சந்தோஷின் கூட்டாளியாகச் செயல்பட்ட ஆந்திர மாநிலத்தைச் சேர்ந்த பைக் மெக்கானிக் மொய்தீனையும் போலீசார் கைது செய்தனர்.
சமூக வலைதளத்தில் விற்பனை:
விசாரணையில், திருடப்பட்ட வாகனங்களை விற்பனை செய்வதற்காகக் கும்பல் பல்வேறு வழிமுறைகளைக் கையாண்டது தெரியவந்துள்ளது.
சில இரு சக்கர வாகனங்களின் பதிவு எண்களை மாற்றி, அவற்றை விற்பனைக்குத் தயார்படுத்தியுள்ளனர். பின்னர் இன்ஸ்டாகிராமில் அவசரத் தேவைக்காகப் பைக் விற்பனை செய்யப்படுவதாக விளம்பரம் செய்து விற்றதாகக் கூறப்படுகிறது.
மற்ற சில வாகனங்களை முழுமையாக விற்பனை செய்யாமல், அவற்றின் உதிரி பாகங்களாகப் பிரித்து விற்பனை செய்துள்ளனர்.
இதனால், திருடப்பட்ட வாகனங்களை அவற்றின் அசல் அடையாளத்துடன் மீட்பது சவாலானதாக இருந்ததாகக் கூறப்படுகிறது.
கோணிப்பையில் கிடந்த வழக்கறிஞரின் பைக்:
வழக்கறிஞர் கார்த்திக் ராஜாவின் பைக் எங்கே இருக்கிறது என்று போலீசார் விசாரித்தபோது, அந்த வாகனம் ஏற்கெனவே உதிரி பாகங்களாகப் பிரிக்கப்பட்டு கோணிப்பையில் கட்டி வைக்கப்பட்டிருப்பதாகக் குற்றம் சாட்டப்பட்டவர்கள் தெரிவித்துள்ளனர்.
இதையடுத்து, அந்தப் பாகங்களை போலீசார் கைப்பற்றி ஆய்வு செய்தனர். அவை வழக்கறிஞர் கார்த்திக் ராஜாவுக்குச் சொந்தமான வாகனத்தின் பாகங்கள் என்பது உறுதி செய்யப்பட்டதாகத் தெரிவிக்கப்பட்டுள்ளது.
இதன் மூலம், ஒரு சாதாரண வாகனத் திருட்டுப் புகாரில் தொடங்கிய விசாரணையில், வாகனங்களைத் திருடுவது மட்டுமின்றி அவற்றை மாற்றியமைத்து விற்பனை செய்வதற்கான தொடர்புகளும் வெளிச்சத்துக்கு வந்துள்ளன.
சிறைக்குச் சென்றும் தொடர்ந்த திருட்டு:
கைது செய்யப்பட்ட முனுசாமி மற்றும் சந்தோஷ் ஆகியோர் ஏற்கெனவே இருசக்கர வாகனத் திருட்டு வழக்கில் தொடர்புடையவர்கள் என போலீசார் தெரிவித்துள்ளனர்.
சில மாதங்களுக்கு முன்பு சிவகாஞ்சி காவல் நிலைய எல்லைக்குட்பட்ட பகுதிகளில் 30-க்கும் மேற்பட்ட இருசக்கர வாகனங்களைத் திருடிய வழக்கில் இருவரும் கைது செய்யப்பட்டு சிறையில் அடைக்கப்பட்டிருந்ததாகக் கூறப்படுகிறது.
பின்னர் ஜாமீனில் வெளியே வந்த அவர்கள் மீண்டும் வாகனத் திருட்டில் ஈடுபட்டதாக விசாரணையில் தெரியவந்துள்ளது.
இந்த வழக்கில் நவீன், முனுசாமி, சந்தோஷ் மற்றும் மொய்தீன் ஆகிய நான்கு பேரையும் போலீசார் கைது செய்துள்ளனர்.
அவர்களிடமிருந்து மொத்தம் 12 இருசக்கர வாகனங்கள் மற்றும் பல்வேறு உதிரிப் பாகங்கள் பறிமுதல் செய்யப்பட்டுள்ளதாகத் தெரிவிக்கப்பட்டுள்ளது.