பழனி தண்டபாணி மடத்திற்குச் சொந்தமான ரூ.100 கோடி மதிப்பிலான நிலம் மோசடியாகப் பத்திரப்பதிவு செய்யப்பட்ட வழக்கில், முக்கியக் குற்றவாளியான பத்திர எழுத்தர் ஜெயபிரகாஷை காவலில் எடுத்து விசாரிக்கக் கோரி சி.பி.சி.ஐ.டி. தரப்பில் நீதிமன்றத்தில் மனு தாக்கல் செய்யப்பட்டுள்ளது.
குற்றவாளி நீதிமன்றத்தில் ஆஜர்படுத்தப்பட்ட நிலையில், வழக்கு வரும் செப்டம்பர் 22-ஆம் தேதிக்கு ஒத்திவைக்கப்பட்டுள்ளது.
திண்டுக்கல் மாவட்டம், பழனி தண்டபாணி மடத்திற்குச் சொந்தமான பல கோடி ரூபாய் மதிப்புள்ள நிலங்கள் மோசடி முறையில் பத்திரப்பதிவு செய்யப்பட்டதாகப் புகார்கள் எழுந்தன.
இது தொடர்பாக அடிவாரக் காவல்துறையினர் வழக்குப்பதிவு செய்திருந்த நிலையில், கடந்த கடந்த ஜூன் மாதம் இந்த வழக்கு விசாரணை சி.பி.சி.ஐ.டி. (CBCID) போலீசாருக்கு மாற்றப்பட்டது.
இந்த வழக்கில் மொத்தம் 11 பேர் மீது போலீசார் வழக்குப்பதிவு செய்துள்ளனர்.
வழக்கின் பின்னணி மற்றும் சரணடைவு:
இந்த நில மோசடி வழக்கில் முக்கியக் குற்றவாளியாகக் கருதப்படும் ஒட்டன்சத்திரத்தைச் சேர்ந்த பத்திர எழுத்தரும், இடைத்தரகருமான ஜெயபிரகாஷ், கடந்த மாதம் சி.பி.சி.ஐ.டி. அலுவலகத்தில் வந்து சரணடைந்தார்.
இதனையடுத்து, அவரை நீதிமன்றத்தில் ஆஜர்படுத்தி போலீசார் சிறையில் அடைத்தனர்.
காவல் விசாரணைக்கான கோரிக்கை:
முன்னதாக, ஜெயபிரகாஷை 7 நாட்கள் போலீஸ் காவலில் எடுத்து விசாரிக்கக் கோரி குற்றவியல் நீதிமன்றம்-2 இல் சி.பி.சி.ஐ.டி. போலீசார் மனு தாக்கல் செய்திருந்தனர்.
அப்போது மாஜிஸ்திரேட் ஒரு நாள் மட்டும் காவலில் விசாரிக்க அனுமதி அளித்திருந்தார். ஆனால், அந்த ஒரு நாள் காவலம் போதுமானதாக இல்லை என்றும், இவ்வழக்கில் உள்ள பல சந்தேகங்களுக்கு அவரிடமிருந்து உரிய பதில்களைப் பெற வேண்டியுள்ளதால், ஒரு வாரம் காவலில் விசாரிக்க அனுமதிக்க வேண்டும் எனக்கோரி முதன்மை மாவட்ட அமர்வு நீதிமன்றத்தில் மீண்டும் மனு தாக்கல் செய்யப்பட்டது.
நீதிமன்றத்தில் ஆஜர்படுத்தல்:
இவ்வழக்கு இன்று (செப். 19) விசாரணைக்கு வந்தது. இதையொட்டி, மதுரை மத்திய சிறையில் அடைக்கப்பட்டிருந்த குற்றவாளி ஜெயபிரகாஷ் பலத்த பாதுகாப்புடன் அழைத்து வரப்பட்டு நீதிமன்றத்தில் ஆஜர்படுத்தப்பட்டார்.
வழக்கை விசாரித்த நீதிபதி பத்மநாதன், இது தொடர்பான விசாரணையை வரும் செப்டம்பர் 22-ஆம் தேதிக்கு ஒத்திவைத்து உத்தரவிட்டார்.
இதனையடுத்து, ஜெயபிரகாஷ் மீண்டும் பலத்த பாதுகாப்புடன் மதுரை மத்திய சிறைச்சாலைக்கு அழைத்துச் செல்லப்பட்டார்.
ரூ.100 கோடி நில மோசடி வழக்கில் முக்கியக் குற்றவாளி காவலில் விசாரிக்கப்பட உள்ள சம்பவம் அப்பகுதியில் பெரும் பரபரப்பை ஏற்படுத்தியுள்ளது.