கோவை ஆவின் நிறுவனம் தனது பால் விநியோக முறையில் அதிரடி மாற்றத்தை கொண்டுவந்துள்ளது. அதன்படி, ஜூலை 1 முதல் பால் ஆர்டர் மற்றும் கட்டணம் செலுத்துதல் AAVIN CBE – Apps on Google Play செயலி மூலம் மட்டுமே மேற்கொள்ளப்படும்.
கோவை மாவட்ட ஆவின் நுகர்வோர்கள் மற்றும் பால் முகவர்களின் வசதிக்காகவும், விநியோகத்தை முறைப்படுத்தவும் வரும் ஜூலை 1-ஆம் தேதி முதல் முழுமையான டிஜிட்டல் மற்றும் புதிய நிர்வாகச் சீர்திருத்த நடவடிக்கைகள் அமலுக்கு வரவுள்ளதாக ஆவின் பொதுமேலாளர் அறிவித்துள்ளார்.
செயற்கை நுண்ணறிவு (AI) மொபைல் செயலி:
கோவை மாவட்ட கூட்டுறவு பால் உற்பத்தியாளர்கள் ஒன்றியம் மூலம் நாளொன்றுக்குச் சராசரியாக 2 லட்சத்து 30 ஆயிரம் லிட்டர் பால் மற்றும் பால் உபபொருட்கள், 650 சில்லறை பால் முகவர்கள் மூலம் பொதுமக்களுக்கு விநியோகம் செய்யப்பட்டு வருகிறது. இந்நிலையில், விநியோக வாகனங்களைக் கண்காணிக்கவும், முகவர்கள் இருந்த இடத்திலிருந்தே ஆர்டர் செய்து பணம் செலுத்தவும் கடந்த மார்ச் மாதம் ‘செயற்கை நுண்ணறிவுடன் கூடிய பிரத்தியேக மொபைல் செயலி’ அறிமுகப்படுத்தப்பட்டது. இதன் தொடர்ச்சியாக தற்போது புதிய விதிமுறைகள் அறிவிக்கப்பட்டுள்ளன.
நுகர்வோருக்கான முக்கிய அறிவிப்புகள், ரூ.2 தள்ளுபடி ரத்து,
ஆவின் ஒன்றியத்தின் நிதிநிலைமையைக் கருத்தில் கொண்டு, நுகர்வோர்களுக்கு மாதாந்திர பால் அட்டையில் வழங்கப்பட்டு வந்த லிட்டருக்கு 2 ரூபாய் தள்ளுபடி முறை முற்றிலும் நிறுத்தப்பட்டுள்ளது. கடந்த மே 1 முதல் பால் அட்டைதாரர்களுக்கும் அதிகபட்ச சில்லறை விற்பனை விலையிலேயே (MRP) பால் விற்பனை செய்யப்பட்டு வருகிறது.
பால் அட்டை புதுப்பித்தல்
நுகர்வோர்கள் தங்களது மாதாந்திர பால் அட்டைக்கு, பிரதி மாதம் 11-ஆம் தேதி முதல் 25-ஆம் தேதிக்குள் ஆவின் மொபைல் செயலி மூலம் மட்டுமே பணத்தைச் செலுத்தி அட்டையைப் பெற்றுக் கொள்ள வேண்டும். நேரில் பணம் செலுத்தும் நடைமுறை கிடையாது.
பால் முகவர்களுக்கான புதிய கட்டுப்பாடுகள்
ஜூலை 1 முதல் பால் பாக்கெட்டுகளின் எண்ணிக்கைக்கு மாற்றாக, ‘பால் பெட்டிகள்’ (Crates) அடிப்படையில் மட்டுமே முகவர்களுக்குப் பால் விநியோகம் செய்யப்படும். ஒரு பெட்டி என்பது 12 லிட்டர் (24 அரை லிட்டர் பாக்கெட்டுகள்) கணக்காக நிர்ணயிக்கப்பட்டுள்ளது. நுகர்வோருக்கும் முகவர்களுக்கும் குறித்த நேரத்தில் பால் கிடைப்பதை உறுதி செய்ய, அனைத்து முகவர்களும் தங்களது தினசரி காலை மற்றும் மாலை வேளைகளுக்கான பால் தேவைப்பட்டியலை, முந்தைய நாள் மாலை 4.00 மணிக்குள் பணம் செலுத்தி செயலி மூலம் உறுதி செய்ய வேண்டும். ஜூலை 1 முதல் முகவர்கள் தங்களின் பால் தேவைக்கான தொகையைச் செலுத்தும்போது, அவர்களுக்கான தரகுத்தொகை (Milk Commission) போக மீதிப் பணத்தை மட்டும் செலுத்தினால் போதும் என்ற புதிய வசதி அறிமுகம் செய்யப்பட்டுள்ளது.
ஆவின் நிர்வாகம் அறிவுறுத்தல்
இனிவரும் காலங்களில் அனைத்து முகவர்களும் தினசரி தேவைப்பட்டியல் மற்றும் அதற்கான தொகையை ஆவின் விற்பனை பிரிவு மொபைல் செயலி (Mobile App) மூலமாக மட்டுமே மேற்கொள்ள வேண்டும். எனவே, முகவர்கள் அனைவரும் தங்களது வங்கிக் கணக்குகளில் தேவையான பண இருப்பை (Bank Balance) வைத்துக் கொள்ளுமாறு ஆவின் நிர்வாகம் அறிவுறுத்தியுள்ளது. பொதுமக்களுக்கும் முகவர்களுக்கும் தங்குதடையின்றி பால் கிடைப்பதை உறுதி செய்ய எடுக்கப்பட்டுள்ள இந்த நவீன நிர்வாகச் சீர்திருத்த நடவடிக்கைகளுக்கு அனைவரும் முழு ஒத்துழைப்பு வழங்குமாறு கோவை ஆவின் நிர்வாகம் கேட்டுக்கொண்டுள்ளது.
ஆவின் பால் அட்டை வைத்திருக்கும் வாடிக்கையாளர்களுக்கு, சில்லறை விலையை விட லிட்டருக்கு 2 ரூபாய் தள்ளுபடியில் பால் வழங்கப்படுவதற்கு முக்கிய காரணங்கள்
முன்கூட்டியே கட்டணம் செலுத்துதல் ஆவின் அட்டைதாரர்கள் ஒவ்வொரு மாதத்திற்கும் தேவையான பாலுக்கான தொகையை, அந்த மாதம் தொடங்குவதற்கு முன்பே செலுத்தி விடுகிறார்கள். இதனால் ஆவின் நிறுவனத்திற்கு ஒரே நேரத்தில் பெரிய அளவில் செயல்பாட்டு மூலதனம் கிடைக்கிறது. இந்த முன்கூட்டியே செலுத்தும் முறைக்கு ஊக்கத்தொகையாகவே இந்த 2 ரூபாய் தள்ளுபடி வழங்கப்படுகிறது. மாதாந்திர அட்டைதாரர்களின் எண்ணிக்கை துல்லியமாகத் தெரிவதால், ஆவின் நிர்வாகத்தால் அன்றாட பால் தேவையை மிகச் சரியாகத் திட்டமிட முடிகிறது. பால் வீணாவது பெருமளவு தடுக்கப்படுகிறது. இந்த நிர்வாகச் சேமிப்பும் வாடிக்கையாளர்களுக்கு விலைக்குறைப்பாகச் சென்றடைகிறது.
சந்தையில் தனியார் பால் நிறுவனங்களின் போட்டி அதிகமாக உள்ளதால், தங்களது வழக்கமான வாடிக்கையாளர்களைத் தக்கவைத்துக் கொள்ள ஆவின் இந்தச் சலுகையை வழங்குகிறது. பொதுமக்களுக்குக் குறைந்த விலையில் தரமான பால் கிடைக்க வேண்டும் என்ற தமிழக அரசின் கூட்டுறவுச் சங்கக் கொள்கையின் ஒரு பகுதியாகவும் இந்த மாதாந்திர அட்டை சலுகை முறை தொடர்ந்து செயல்படுத்தப்பட்டு வந்தது.