காப்பீடு இல்லை என்றால் பெட்ரோல் கிடையாது: உச்ச நீதிமன்றத்தின் அதிரடி யோசனை!

நாட்டில் உள்ள வாகன ஓட்டிகள் கட்டாயமாக வாகனக் காப்பீடு எடுக்க வேண்டும் என்பதை வலியுறுத்தும் வகையில், “காப்பீடு இல்லை என்றால் எரிபொருள் இல்லை” (No Insurance, No Fuel) என்ற கடுமையான திட்டத்தை அமல்படுத்துவது குறித்து பரிசீலிக்குமாறு மத்திய அரசுக்கு உச்ச நீதிமன்றம் உத்தரவிட்டுள்ளது.

அதிர்ச்சியளிக்கும் புள்ளிவிவரம்
உச்ச நீதிமன்ற நீதிபதிகள் சஞ்சய் கரோல் மற்றும் பிரசாந்த் குமார் மிஸ்ரா அடங்கிய அமர்வு இது தொடர்பான வழக்கு ஒன்றை விசாரித்தது. அப்போது, இந்தியச் சாலைகளில் இயக்கப்படும் வாகனங்களில் சுமார் 56 சதவீதம் காப்பீடு செய்யப்படாமல் இயங்கி வருவது தங்களுக்குப் பெரும் அதிர்ச்சியை அளிப்பதாகக் நீதிமன்றம் கவலை தெரிவித்தது. சாலை விபத்துகளில் சிக்குபவர்களுக்கு உரிய இழப்பீடு கிடைக்காமல் போவதற்கு இதுவே முக்கியக் காரணம் என்றும் நீதிமன்றம் சுட்டிக்காட்டியுள்ளது.

திட்டத்தின் முக்கிய அம்சங்கள் 
காப்பீடு இல்லாத வாகனங்களைக் கண்டறிந்து எரிபொருள் வழங்குவதைத் தடுக்கும் வகையில், காப்பீட்டு ஒழுங்குமுறை மற்றும் மேம்பாட்டு ஆணையம் (IRDAI) மற்றும் சாலைப் போக்குவரத்து அமைச்சகம் (MoRTH) இணைந்து ஒரு மாதிரித் திட்டத்தை (Pilot Project) உருவாக்க வேண்டும் என்று நீதிமன்றம் உத்தரவிட்டுள்ளது. இதன்படி, முறையான காப்பீடு ஆவணம் இல்லாத வாகனங்களுக்குப் பெட்ரோல் நிலையங்களில் எரிபொருள் வழங்கப்பட மாட்டாது.

தானியங்கி கேமராக்கள் (ANPR) மூலம் கண்காணிப்பு
சாலைகள் மற்றும் நெடுஞ்சாலைகளில் உள்ள தானியங்கி எண் பலகைக் கண்காணிப்பு கேமராக்கள் (ANPR) மூலம் காப்பீடு இல்லாத வாகனங்கள் கண்டறியப்பட்டு, ‘வாகன்’ (VAHAN) மற்றும் காப்பீட்டுத் தரவுத் தளங்களுடன் இணைக்கப்பட்டு தானியங்கி அபராதம் (E-Challan) விதிக்கப்படும்.

புதிய வாகனங்களுக்கான காப்பீட்டு காலம் அதிகரிப்பு- விதிகளின் கடுமையை உயர்த்தும் வகையில், புதிதாக வாங்கப்படும் கார்களுக்கு 4 ஆண்டுகளுக்கும், இரு சக்கர வாகனங்களுக்கு 6 ஆண்டுகளுக்கும் கட்டாய மூன்றாம் தரப்பு காப்பீடு (Third-party Insurance) பெறப்பட வேண்டும் என்றும் உத்தரவிடப்பட்டுள்ளது.

பெட்ரோலிய அமைச்சகமும் இந்தத் திட்டத்திற்கு கொள்கை அளவில் ஆட்சேபனை தெரிவிக்கவில்லை எனக் குறிப்பிடப்பட்டுள்ள நிலையில், இந்த அதிரடி நடவடிக்கையால் வாகன ஓட்டிகள் மத்தியில் காப்பீடு எடுப்பது கட்டாயமாகும் சூழல் உருவாகியுள்ளது.

கேரளத்தில் தொடர் மழை; பலி எண்ணிக்கை 20 ஆக உயர்வு – 12 மாவட்டங்களுக்கு ஆரஞ்சு எச்சரிக்கை!