காவல்துறையில் 10 ஆண்டுகள் வரை பல்வேறு வழக்குகளில் துப்புதுலக்கிச் சேவையாற்றி ஓய்வுபெறும் மோப்ப நாய்களின் உணவு, மருந்து உள்ளிட்ட அனைத்துப் பராமரிப்புச் செலவுகளையும் இனி அரசே ஏற்கும் என்று மகாராஷ்டிர அரசு அறிவித்துள்ளது.
ஓய்வுக்குப் பின் தவிக்க விடக்கூடாது
குற்றவாளிகளைக் கண்டுபிடிப்பது, வெடிகுண்டுகளைக் கண்டறிவது போன்ற ஆபத்தான பணிகளில் காவல்துறையினருக்குத் தோளோடு தோள் நின்று செயலாற்றுபவை மோப்ப நாய்கள் (Police Sniffer Dogs). வழக்கமாக, இவை தங்கள் பணிக்காலத்தை (10 ஆண்டுகள்) முடித்த பிறகு ஓய்வுபெறும்போது, தன்னார்வலர்களுக்கோ அல்லது விலங்கு நல ஆர்வலர்களுக்கோ தத்து கொடுக்கப்படுவது வழக்கம். இந்நிலையில், காவல்துறைக்காகத் தங்கள் வாழ்நாள் முழுவதையும் அர்ப்பணித்துச் சேவையாற்றும் இந்த நாய்களை, ஓய்வுக்குப் பின் தவிக்க விடக்கூடாது என்பதில் மகாராஷ்டிர அரசு உறுதியான முடிவை எடுத்துள்ளது.
அரசின் புதிய கட்டுப்பாடுகள்
முழுச் செலவும் அரசே ஏற்கும்: ஓய்வுபெற்ற மோப்ப நாய்களுக்கான உணவு, மருத்துவப் பராமரிப்பு, தங்குமிடம் உள்ளிட்ட அனைத்துச் செலவுகளையும் மகாராஷ்டிர அரசே முழுமையாகப் பொறுப்பேற்றுக் கொள்ளும்.
தத்து கொடுக்கத் தடை: ஓய்வுபெற்ற நாய்களை இனி வேறு நபர்களுக்கோ அல்லது அமைப்புகளுக்கோ தத்து கொடுக்கக் கூடாது என முடிவு செய்யப்பட்டுள்ளது.
பழகிய பராமரிப்பாளரே தொடர்வார்: நாய்களுடன் ஏற்கனவே காவல்துறையில் பணியாற்றிப் பழகிய அதே பராமரிப்பாளரின் (Handler) நேரடிப் மேற்பார்வையிலேயே ஓய்வுக்குப் பிறகும் அவை தொடர்ந்து பராமரிக்கப்படும்.
காவல்துறையில் சிறப்பாகப் பணியாற்றி ஓய்வுபெறும் மோப்ப நாய்களின் தியாகத்தைக் கௌரவிக்கும் வகையில் மகாராஷ்டிர முதல்வர் தேவேந்திர ஃபட்னாவிஸ் வெளியிட்டுள்ள இந்த மனிதநேய அறிவிப்பிற்குப் பல்வேறு தரப்பினரும், விலங்கு நல ஆர்வலர்களும் மனதாரப் பாராட்டு தெரிவித்து வருகின்றனர்.
ரஷ்யாவுக்கு அரசுமுறைப் பயணம்: வெளியுறவு அமைச்சர் எஸ். ஜெய்சங்கர் – செர்ஜி லாவ்ரோவ் சந்திப்பு!