அன்புமணி தரப்பு வேட்பாளர்கள் 18 பேரும் தேர்தல் பிரச்சாரத்தில் தன்னுடைய புகைப்படத்தை பயன்படுத்த தடைவிதிக்க கோரி ராமதாஸ் தரப்பில் சென்னை 13வது உரிமையியல் நீதிமன்றத்தில் புதிய வழக்கை தாக்கல் செய்யப்பட்டுள்ளது.
பாமக அமைப்பில் நீடித்து வரும் உள்கட்சி மோதல் தற்போது நீதிமன்றத்திலும் தீவிரமடைந்துள்ளது. கட்சியின் நிறுவனர் டாக்டர் ராமதாஸ் மற்றும் அவரது மகன் அன்புமணி ராமதாஸ் இடையிலான கருத்து வேறுபாடு, அரசியல் மட்டத்தைத் தாண்டி சட்டப் போராட்டமாக மாறியுள்ள சூழலில், புதிய திருப்பமாக சென்னை நீதிமன்றம் முக்கிய உத்தரவை பிறப்பித்துள்ளது.
அதன்படி, தேர்தல் பிரச்சாரங்களில் தனது புகைப்படத்தை பயன்படுத்துவதற்கு தடை விதிக்க வேண்டும் என்று கோரி டாக்டர் ராமதாஸ் தாக்கல் செய்த வழக்கில், அன்புமணி ராமதாஸ் தரப்பைச் சேர்ந்த 18 பாமக வேட்பாளர்களுக்கு நோட்டீஸ் அனுப்ப சென்னை 13வது உரிமையியல் நீதிமன்றம் உத்தரவிட்டுள்ளது. இந்த வழக்கு நீதிபதி தர்ம பிரபு முன்னிலையில் விசாரணைக்கு வந்தபோது, சம்பந்தப்பட்ட வேட்பாளர்கள் தங்கள் தரப்பை விளக்குவதற்காக அறிவிப்பு வழங்கப்பட வேண்டும் என நீதிமன்றம் தீர்மானித்தது.
பாமக கட்சியில் ஏற்பட்டுள்ள இந்த பிளவு, கட்சியின் அடையாளங்களான பெயர், கொடி, சின்னம் ஆகியவற்றைப் பயன்படுத்தும் உரிமை தொடர்பாகவும் முன்பே நீதிமன்றத்தில் விவாதிக்கப்பட்டது. அப்போது, அன்புமணி ராமதாஸுக்கு இவ்வகை உரிமைகளை வழங்கக் கூடாது என்றும், தன்னைத் தான் கட்சியின் தலைவராக அறிவிக்க வேண்டும் என்றும் ராமதாஸ் மனுத்தாக்கல் செய்திருந்தார். எனினும், சென்னை உரிமையியல் நீதிமன்றமும், சென்னை உயர்நீதிமன்றமும் அந்த இடைக்கால மனுக்களை தள்ளுபடி செய்திருந்தது குறிப்பிடத்தக்கது.
இந்த நிலையிலும், புதிய வழக்கின் மூலம் ராமதாஸ் தனது நிலைப்பாட்டை மீண்டும் வலியுறுத்தியுள்ளார். அன்புமணி ராமதாஸ் கட்சியில் இருந்து நீக்கப்பட்டவர் என்றும், தமக்குடன் எந்த தொடர்பும் இல்லாதவர் என்றும் அவர் மனுவில் கூறியுள்ளார். மேலும், தேர்தல் பிரச்சாரங்களில் தனது புகைப்படத்தை பயன்படுத்துவது தவறான புரிதலை உருவாக்கும் என்பதால், அதற்கு தடை விதிக்க வேண்டும் என்று கோரிக்கை விடுத்துள்ளார்.
இந்த வழக்கில் நீதிமன்றம் நோட்டீஸ் அனுப்ப உத்தரவிட்டுள்ள நிலையில், அன்புமணி தரப்பு வேட்பாளர்கள் தங்கள் விளக்கத்தை சமர்ப்பிக்க வேண்டியுள்ளது. இதனால், பாமக உள்கட்சி பிரச்சினை அடுத்த கட்டத்திற்கு சென்றுள்ளது. வழக்கின் மேலான விசாரணை ஏப்ரல் 21ஆம் தேதி நடைபெற உள்ளது.