தென்காசியில் நடைபெற்ற ‘Gen-Z’ அரசியல் விழிப்புணர்வுக் கூட்டத்தில், திமுகவின் செய்தித் தொடர்பாளரும் முக்கியப் பேச்சாளருமான ராஜராஜேஸ்வரி, தமிழக வெற்றிக் கழகம் (TVK) மற்றும் அதன் இணையவழி ஆதரவாளர்களின் செயல்பாடுகளைக் கடுமையாக விமர்த்துப் பொங்கி எழுந்தார்.
அரசியல் பேசும் பெண்களுக்கு எதிரான பாலியல் வன்முறை!
சமூக வலைதளங்களில் தவெக நிர்வாகிகளும் அவர்களின் ‘வார்ரியர்ஸ்’ அமைப்பினரும், மாற்றுக்கருத்து பேசும் பெண்களைக் குறிவைத்து ஆபாசத் தாக்குதல் நடத்துவதாக ராஜராஜேஸ்வரி பகிரங்கமாகக் குற்றம் சாட்டினார்.
முதலாவதாக ஆபாசக் கருத்துகளும் அச்சுறுத்தலும்: இணையத்தில் அரசியல் பேசும் பெண்களின் கருத்துகளுக்குப் பதிலளிக்கத் துப்பில்லாதவர்கள், கமெண்ட் பாக்ஸ்களில் அருவருக்கத்தக்க மற்றும் பாலியல்ரீதியான ஆபாசக் கருத்துகளைப் பதிவிட்டு வன்முறையில் ஈடுபடுகிறார்கள்.
இரண்டாவதாக உடலமைப்பு கேலி (Body Shaming): கேள்வி கேட்கும் பெண்களின் உடலமைப்பைக் கேலி செய்வதும், புகைப்படங்களை மாஃபிங் (Morphing) செய்து அச்சுறுத்துவதும்தான் தவெக கற்றுக்கொடுத்த அரசியல் நாகரீகமா என்று கேள்வி எழுப்பினார்.
மூன்றாவதாக காவல்துறைக்கும் நீதித்துறைக்கும் கோரிக்கை: தெருவில் பெண்களுக்கு நடக்கும் குற்றங்களுக்குக் காவல்துறை தானாக முன்வந்து வழக்குப் பதிவு செய்வது போல, இணையத்தில் பெண்களுக்கு எதிராக நடக்கும் இத்தகைய பாலியல் அச்சுறுத்தல்கள் மீதும் ‘சைபர் கிரைம்’ காவல்துறை உரிய நடவடிக்கை எடுக்க வேண்டும் என வலியுறுத்தினார்.
தவெக-வின் 3 முக்கியத் தந்திரங்கள்!
திராவிட சித்தாந்தத்தைப் பேசும் ‘Gen-Z’ இளைஞர்களை முடக்குவதற்காக தவெக தரப்பு மூன்று குறுக்கு வழிகளைக் கையாண்டு வருகிறது என ராஜராஜேஸ்வரி பட்டியல் இட்டார்.
முதலாவதாக பச்சோந்திகளைப் பேச வைப்பது: பணத்தைக் கொடுத்து ஆட்களை நியமித்து, ‘திராவிட இயக்கத்தினர் யாருமே பேச வேண்டாம்’ என்ற பொய்யான பிம்பத்தையும் ட்ரெண்டுகளையும் உருவாக்குவது.
இரண்டாவதாக காவல்துறை மூலம் அழுத்தம்: கேள்வி கேட்கும் திராவிடப் பிண்ணனி கொண்ட இளைஞர்கள் மற்றும் சோஷியல் மீடியா பக்கங்கள் மீது பொய் வழக்குகளையும் அதிகார அச்சுறுத்தல்களையும் ஏவுவது.
மூன்றாவதாக பெண்களை அசிங்கப்படுத்தி முடக்குவது: குடும்பப் பெண்களையும் இளம் பெண்களையும் ஆபாசமாகப் பேசி, அச்சத்தின் காரணமாக அவர்களை அரசியலை விட்டே ஓடச் செய்வது.
‘ரீல்ஸ்களால் வந்தவர்கள் ரீல்ஸ்களாலேயே வீழ்வார்கள்’
பள்ளிகளிலும் கல்லூரிகளிலும் சினிமா பார்முலாவைப் பயன்படுத்தி பிஞ்சு மனங்களில் அரசியலை நுழைக்கத் தவெக முயல்கிறது. ஆனால் “கத்தி எடுத்தவனுக்குக் கத்தியால் தான் சாவு என்பது போல, ரீல்ஸ்களால் வளர்ந்தவர்களுக்கு ரீல்ஸ்களாலேயே வீழ்ச்சி வரும்” என்று சாடினார்.
மேலும், இலவசக் கல்வி, இடஒதுக்கீடு, தொழிற்பேட்டைகள் எனத் தமிழக மக்களின் வாழ்வாதாரத்தை உயர்த்திய திராவிடக் கொள்கைகளின் முக்கியத்துவத்தைச் சுட்டிக்காட்டிய அவர், இத்தகைய அச்சுறுத்தல்களுக்கோ அல்லது பொய்ப் பிரச்சாரங்களுக்கோ அஞ்சாமல் தமிழகம் முழுவதும் திராவிடக் கொள்கைப் பிரசாரத்தைத் தொடர்ந்து முன்னெடுப்போம் என உறுதியளித்தார்.