மேகதாது அணை கட்ட கர்நாடகத்திற்கு உரிமையும் இல்லை, தகுதியும் இல்லை – உச்சநீதிமன்றத் தீர்ப்பைத் திரிக்கக் கூடாது என அன்புமணி இராமதாஸ் கண்டனம்!

காவிரி ஆற்றின் குறுக்கே மேகதாது அணை கட்டுவதற்கு கர்நாடக அரசுக்கு உரிமை கிடையாது என்றும், உச்சநீதிமன்றம் அனுமதி வழங்கிவிட்டதாகக் கூறி தீர்ப்பைத் திரித்துப் பேசக் கூடாது என்றும் பா.ம.க. தலைவர் மருத்துவர் அன்புமணி இராமதாஸ் தெரிவித்துள்ளார்.

மேகதாது அணை விவகாரத்தில் கர்நாடக முதலமைச்சர் டி.கே.சிவக்குமார் வெளியிட்டுள்ள கருத்துகள் பொய்யானவை என்றும், தேவையற்ற பதற்றத்தை ஏற்படுத்தும் வகையில் அமைந்துள்ளதாகவும் அவர் கண்டனம் தெரிவித்துள்ளார்.

இதுதொடர்பாக அவர் வெளியிட்டுள்ள அறிக்கையில், காவிரி ஆற்றின் குறுக்கே மேகதாது அணை கட்டுவது கர்நாடகத்தின் உரிமை என்றும், அணை கட்ட உச்சநீதிமன்றமே அனுமதி அளித்துவிட்டதால் தமிழ்நாடு உள்ளிட்ட யாரிடமும் அனுமதி பெறத் தேவையில்லை என்றும் கர்நாடக முதலமைச்சர் டி.கே.சிவக்குமார் கூறியிருப்பதைச் சுட்டிக்காட்டியுள்ளார்.

காவிரியின் கடைமடை பாசன மாநிலமான தமிழ்நாட்டின் ஒப்புதல் இல்லாமல் மேகதாது அணை கட்டுவதற்கு கர்நாடக அரசுக்கு அனுமதி அளிக்கக் கூடாது என்று பிரதமர் நரேந்திர மோடிக்கு தமிழ்நாடு முதலமைச்சர் விஜய் கடிதம் எழுதியிருந்தார்.

இதற்குப் பதிலளிக்கும் வகையிலேயே கர்நாடக முதலமைச்சர் இத்தகைய கருத்துகளைத் தெரிவித்துள்ளதாக அன்புமணி குறிப்பிட்டுள்ளார்.

கர்நாடக முதலமைச்சர் கூறியுள்ள தகவல்கள் உண்மைக்குப் புறம்பானவை என்றும், மேகதாது விவகாரத்தைத் திசைதிருப்பும் நோக்கத்துடன் உச்சநீதிமன்றத் தீர்ப்பைத் தவறாகப் பொருள் கூறுவதாகவும் அவர் குற்றம்சாட்டியுள்ளார்.

மேகதாது அணைக்கு உச்சநீதிமன்றம் அனுமதி வழங்கவில்லை

மேகதாது அணை கட்டுவதற்கு உச்சநீதிமன்றம் எந்த அனுமதியும் வழங்கவில்லை என்று தெரிவித்துள்ள அன்புமணி, அணைக்கான விரிவான திட்ட அறிக்கை தயாரிப்பதற்கு வழங்கப்பட்ட அனுமதியையும், அணை கட்டுவதற்கான இறுதி ஒப்புதலையும் ஒன்றாகக் கருதக் கூடாது என வலியுறுத்தியுள்ளார்.

மேகதாது அணைக்கான விரிவான திட்ட அறிக்கை தயாரிக்க வழங்கப்பட்ட அனுமதியை ரத்து செய்யக் கோரி தமிழ்நாடு அரசு தொடர்ந்த வழக்கில், கடந்த ஆண்டு நவம்பர் 13ஆம் தேதியும், அதனைத் தொடர்ந்து தாக்கல் செய்யப்பட்ட சீராய்வு மனு மீது கடந்த மே 21ஆம் தேதியும் உச்சநீதிமன்றம் உத்தரவுகளைப் பிறப்பித்ததாக அவர் தெரிவித்துள்ளார்.

அந்த உத்தரவுகளின்படி, மேகதாது அணைத் திட்டத்திற்கு அனுமதி வழங்குவது தொடர்பாக உரிய சட்ட நடைமுறைகளைப் பின்பற்றி மத்திய நீர்வள ஆணையத்திற்காக காவிரி மேலாண்மை ஆணையமே முடிவு எடுக்க வேண்டும் என்றும், அந்த முடிவில் தமிழ்நாடு அரசுக்கு உடன்பாடு இல்லாவிட்டால் உச்சநீதிமன்றத்தை அணுகலாம் என்றும் அறிவுறுத்தப்பட்டுள்ளதாக அன்புமணி விளக்கியுள்ளார்.

எனவே, அணை கட்டுவதற்கு உச்சநீதிமன்றம் ஏற்கெனவே அனுமதி வழங்கிவிட்டதாகக் கர்நாடக முதலமைச்சர் கூறுவது தீர்ப்பைத் திரித்துக் கூறும் செயலாகும் என்றும் அவர் தெரிவித்துள்ளார்.

1892, 1924 ஒப்பந்தங்களைச் சுட்டிக்காட்டி எதிர்ப்பு

மேகதாது அணை கட்டுவதற்கு கர்நாடக அரசுக்கு இயல்பான உரிமை எதுவும் கிடையாது என்று குறிப்பிட்டுள்ள அன்புமணி, கடைமடை பாசனப் பகுதிகளைப் பாதிக்கும் வகையில் மேல்பகுதி மாநிலங்கள் புதிய திட்டங்களைச் செயல்படுத்தக் கூடாது என்பதே நீர்ப்பகிர்வு தொடர்பான அடிப்படைக் கொள்கை எனத் தெரிவித்துள்ளார்.

காவிரி நீர்ப்பகிர்வு தொடர்பாக சென்னை மாகாணத்திற்கும் மைசூர் மாகாணத்திற்கும் இடையே 1892 மற்றும் 1924ஆம் ஆண்டுகளில் கையெழுத்தான ஒப்பந்தங்களில் இதுதொடர்பான அம்சங்கள் இடம்பெற்றுள்ளதாகவும், அந்த ஒப்பந்தங்களின் தொடர்புடைய விதிகள் 2007ஆம் ஆண்டு காவிரி நடுவர் மன்றத்தின் இறுதித் தீர்ப்பிலும், 2018ஆம் ஆண்டு உச்சநீதிமன்றத் தீர்ப்பிலும் உறுதி செய்யப்பட்டுள்ளதாகவும் அவர் சுட்டிக்காட்டியுள்ளார்.

மேலும், தமிழ்நாட்டின் எழுத்துப்பூர்வமான ஒப்புதல் இல்லாமல் மேகதாது அணை கட்டுவதற்கு அனுமதி அளிக்க முடியாது என்று உமாபாரதி மற்றும் கஜேந்திர சிங் ஷெகாவத் ஆகியோர் மத்திய நீர்வளத்துறை அமைச்சர்களாக இருந்தபோது பலமுறை தெரிவித்துள்ளதாகவும் அன்புமணி தனது அறிக்கையில் குறிப்பிட்டுள்ளார்.

கர்நாடகத் தேர்தலைக் குறிவைத்து மேகதாது விவகாரம்?

கர்நாடக சட்டப்பேரவைத் தேர்தலுக்கு இன்னும் 15 மாதங்களே உள்ள நிலையில், மேகதாது அணை விவகாரத்தை அரசியல் நோக்கத்திற்காக கர்நாடக முதலமைச்சர் டி.கே.சிவக்குமார் கையில் எடுத்துள்ளதாக அன்புமணி குற்றம்சாட்டியுள்ளார்.

காவிரி பாயும் 11 மாவட்டங்களில் காங்கிரஸ் கட்சிக்கு அதிக இடங்களில் வெற்றி கிடைக்க வேண்டும் என்பதற்காகவே மேகதாது அணை விவகாரம் அரசியலாக்கப்படுவதாக அவர் தெரிவித்துள்ளார்.

இதற்காக அடுத்த ஆண்டு தாக்கல் செய்யப்படவுள்ள கர்நாடக மாநில நிதிநிலை அறிக்கையில் திட்டத்திற்கு நிதி ஒதுக்கீடு செய்வது, புதிய அணைக்கு அடிக்கல் நாட்டுவது உள்ளிட்ட நடவடிக்கைகள் மேற்கொள்ளப்படலாம் என்றும் அவர் குற்றம்சாட்டியுள்ளார்.

இந்த விவகாரத்தில் கர்நாடக அரசின் நடவடிக்கைகளுக்கு ஒன்றிய அரசும் மறைமுகமாக ஆதரவளிக்கக்கூடும் எனத் தனது அறிக்கையில் அன்புமணி தெரிவித்துள்ளார்.

தமிழ்நாட்டுக்கு உரிய நீரை வழங்காத கர்நாடகம் – அன்புமணி குற்றச்சாட்டு

காவிரி சிக்கலுக்குத் தீர்வு காண 1990ஆம் ஆண்டு நடுவர் மன்றம் அமைக்கப்பட்டதையும், 1991ஆம் ஆண்டு இடைக்காலத் தீர்ப்பும், 2007ஆம் ஆண்டு இறுதித் தீர்ப்பும் வழங்கப்பட்டதையும் சுட்டிக்காட்டியுள்ள அன்புமணி, அதற்குப் பிந்தைய காலகட்டத்தில் தமிழ்நாட்டுக்கு உரிய நீரை கர்நாடகம் முறையாக வழங்கவில்லை என்று குற்றம்சாட்டியுள்ளார்.

தமிழ்நாட்டை காவிரி நீர்ப்பகிர்வில் சட்டப்பூர்வப் பங்காளியாகக் கருதாமல், வெள்ளநீர் வரும் காலங்களில் மட்டுமே தண்ணீர் திறந்துவிடும் நிலை இருப்பதாகவும் அவர் விமர்சித்துள்ளார்.

மேலும், மேகதாது அணை கட்டப்பட்டால் கூடுதலாக 70 டி.எம்.சி. தண்ணீரைச் சேமிக்கும் திறன் கர்நாடகத்திற்குக் கிடைக்கும் என்றும், அதன் பிறகு தமிழ்நாட்டுக்கு முறையாகத் தண்ணீர் வழங்கப்படும் என்ற கர்நாடகத்தின் வாக்குறுதியை நம்ப முடியாது என்றும் அன்புமணி தெரிவித்துள்ளார்.

கர்நாடக அரசுக்கு மத்திய அரசு கண்டனம் தெரிவிக்க வேண்டும்

கர்நாடகத்தில் தேர்தல் நெருங்கும் காலங்களில் மேகதாது அணை தொடர்பாகப் பொய்யான தகவல்களும், தீர்ப்புகள் குறித்த திரிபு வாதங்களும் தொடர்ந்து முன்வைக்கப்படலாம் என்று அன்புமணி எச்சரித்துள்ளார்.

உச்சநீதிமன்றத் தீர்ப்பை கர்நாடக முதலமைச்சர் திரித்துக் கூறுவதை ஒன்றிய அரசு வேடிக்கை பார்க்கக் கூடாது என்றும், இதற்காக கர்நாடக அரசுக்குக் கண்டனம் தெரிவிக்க வேண்டும் என்றும் வலியுறுத்தியுள்ளார்.

காவிரியின் கடைமடை பாசன மாநிலமான தமிழ்நாட்டின் எழுத்துப்பூர்வமான ஒப்புதல் இல்லாமல் மேகதாது அணை கட்டுவதற்கு கர்நாடக அரசுக்கு ஒன்றிய அரசு எந்தவித அனுமதியும் வழங்கக் கூடாது என்றும் பா.ம.க. தலைவர் மருத்துவர் அன்புமணி இராமதாஸ் தனது அறிக்கையில் வலியுறுத்தியுள்ளார்.

மேகதாது அணை கட்ட உச்சநீதிமன்றம் அனுமதி வழங்கியதாகக் கூறுவதா? – கர்நாடக முதல்வருக்கு வைகோ கடும் கண்டனம்!