தீபாவளி பண்டிகையை முன்னிட்டு தருமபுரி மாவட்டத்தில் உருண்டை வெல்லத்தின் விலை கிலோ ரூ.75 ஆக உயர்ந்துள்ளதால், வெல்லம் உற்பத்தியாளர்கள் மகிழ்ச்சி அடைந்துள்ளனர்.
அதே நேரத்தில், கரும்பு விலை உயர்வு, தொழிலாளர் பற்றாக்குறை உள்ளிட்ட காரணங்களால் பாரம்பரிய உருண்டை வெல்லம் உற்பத்தித் தொழில் நெருக்கடியைச் சந்தித்து வருவதாகவும், இந்தத் தொழிலைப் பாதுகாக்க தமிழக அரசே நேரடியாக வெல்லத்தைக் கொள்முதல் செய்ய வேண்டும் என்றும் உற்பத்தியாளர்கள் கோரிக்கை விடுத்துள்ளனர்.
தீபாவளி தேவையால் அதிகரித்த வெல்லம் விலை
தருமபுரி மாவட்டம் தருமபுரி, கடகத்தூர், பாப்பாரப்பட்டி உள்ளிட்ட பகுதிகளில் உருண்டை வெல்லம் தயாரிக்கும் பணிகள் தீவிரமாக நடைபெற்று வருகின்றன. தீபாவளி பண்டிகையை முன்னிட்டு பொதுமக்களிடையே உருண்டை வெல்லம் வாங்குவதற்கான ஆர்வம் அதிகரித்துள்ளதால், விவசாயிகள் தங்களது கரும்பு அரவை ஆலைகளை இரவு பகலாக இயக்கி வெல்லம் உற்பத்தி செய்து வருகின்றனர்.
இந்தப் பகுதிகளில் தயாரிக்கப்படும் உருண்டை வெல்லம் தருமபுரி மாவட்டத்தின் பல்வேறு பகுதிகளுக்கும், அண்டை மாவட்டங்களுக்கும் விற்பனைக்காக அனுப்பி வைக்கப்படுகிறது. சாதாரண நாட்களில் ஒரு கிலோ உருண்டை வெல்லம் ரூ.55 முதல் விற்பனை செய்யப்பட்டு வந்த நிலையில், தீபாவளி பண்டிகையை முன்னிட்டு தேவை அதிகரித்ததால் தற்போது கிலோ ரூ.75 வரை விற்பனையாகிறது.
இதனால் உற்பத்தியாளர்கள் ஓரளவு கூடுதல் வருவாய் கிடைப்பதால் மகிழ்ச்சி அடைந்துள்ளனர்.
கரும்பு விளைச்சல் பாதிப்பு; அண்டை மாநிலங்களை நம்பிய உற்பத்தியாளர்கள்
இந்த ஆண்டு ஏற்பட்ட கடுமையான வறட்சி மற்றும் விளைச்சல் பாதிப்பு காரணமாக தமிழ்நாட்டில் கரும்பு உற்பத்தி வெகுவாகக் குறைந்துள்ளதாக உற்பத்தியாளர்கள் தெரிவிக்கின்றனர்.
இதனால் உருண்டை வெல்லம் தயாரிப்பதற்குத் தேவையான கரும்புகளை கர்நாடக மாநிலத்தின் மைசூரு, மாண்டியா, கோலார் உள்ளிட்ட பகுதிகளில் இருந்து வாங்கி வர வேண்டிய நிலை ஏற்பட்டுள்ளது.
அண்டை மாநிலங்களில் இருந்து கரும்பைக் கொண்டு வருவதற்கான செலவும், கரும்பின் விலையும் வழக்கத்தைவிட அதிகரித்துள்ளன. இதனால் உற்பத்திச் செலவு அதிகரித்தாலும், தலைமுறை தலைமுறையாகத் தொடர்ந்து வரும் பாரம்பரியத் தொழிலை கைவிடக் கூடாது என்ற நோக்கத்தில் உற்பத்தியாளர்கள் தொடர்ந்து வெல்லம் தயாரித்து வருகின்றனர்.
தொழிலாளர் பற்றாக்குறை; நூற்றுக்கும் மேற்பட்ட ஆலைகள் மூடல்
கரும்பு விலை உயர்வுடன், உருண்டை வெல்லம் தயாரிப்பதற்குத் தேவையான தொழிலாளர்களும் போதிய அளவில் கிடைப்பதில்லை என உற்பத்தியாளர்கள் வேதனை தெரிவிக்கின்றனர்.
கரும்பு வெட்டுதல், ஆலைக்கு எடுத்துச் செல்லுதல், அரைத்தல், பாகு காய்ச்சுதல், வெல்லம் உருண்டைகளாகத் தயாரித்தல் எனப் பல்வேறு கட்டங்களில் தொழிலாளர்களின் பங்களிப்பு அவசியமாக உள்ளது.
ஆனால், தற்போது ஏற்பட்டுள்ள ஆட்கள் பற்றாக்குறையால் போதிய அளவில் உற்பத்தியை மேற்கொள்ள முடியாத நிலை உருவாகியுள்ளது. இதன் காரணமாக நூற்றுக்கும் மேற்பட்ட உருண்டை வெல்லம் அரவை ஆலைகள் மூடப்பட்டு, அவற்றில் பணியாற்றியவர்கள் வேறு வேலைகளுக்குச் சென்றுள்ளதாக உற்பத்தியாளர்கள் தெரிவிக்கின்றனர்.
இதனால் பாரம்பரியத் தொழிலின் எதிர்காலம் குறித்த கவலையும் அதிகரித்துள்ளது.
பொங்கல் தொகுப்பு, ரேஷன் கடைகளில் வெல்லம் விற்பனை செய்ய கோரிக்கை
உருண்டை வெல்லம் உற்பத்தியைப் பாதுகாக்கவும், விவசாயிகளின் வாழ்வாதாரத்தை மேம்படுத்தவும் தமிழக அரசு நேரடியாகக் கொள்முதல் செய்ய வேண்டும் என உற்பத்தியாளர்கள் கோரிக்கை விடுத்துள்ளனர்.
குறிப்பாக, பொங்கல் பரிசுத் தொகுப்பில் உருண்டை வெல்லத்தைச் சேர்ப்பதுடன், கூட்டுறவு நியாயவிலைக் கடைகள் மூலமாகவும் விற்பனை செய்ய நடவடிக்கை எடுக்க வேண்டும் என வலியுறுத்தியுள்ளனர்.
இதற்காக ஒவ்வொரு பகுதியிலும் உள்ளூர் கொள்முதல் மையங்களை உருவாக்கி, அந்தந்த மாவட்டங்களில் உற்பத்தி செய்யப்படும் உருண்டை வெல்லத்தை விவசாயிகளிடமிருந்து நேரடியாகக் கொள்முதல் செய்ய வேண்டும் என்றும் தெரிவித்துள்ளனர்.
தமிழ்நாடு முழுவதும் அந்தந்த மாவட்டங்களில் உள்ள உருண்டை வெல்ல உற்பத்தியாளர்களிடமிருந்து அரசு நேரடியாகக் கொள்முதல் செய்து விற்பனை செய்தால், உற்பத்தியாளர்களுக்கு நிலையான வருவாய் கிடைக்கும்.
இதன் மூலம் கரும்பு விவசாயிகளின் வாழ்வாதாரம் பாதுகாக்கப்படுவதுடன், பாரம்பரிய உருண்டை வெல்லம் தயாரிக்கும் தொழிலையும் அடுத்த தலைமுறைக்குக் கொண்டு செல்ல முடியும் என உற்பத்தியாளர்கள் நம்பிக்கை தெரிவித்துள்ளனர்.