பொதுவெளியில் போதைப்பொருள் பயன்படுத்துவது போன்ற வீடியோவை வெளியிட்ட த.வெ.க. மனிதவள மேலாண்மைத் துறை அமைச்சர் திரு. டி.சரத்குமாரை உடனடியாகப் பதவி நீக்கம் செய்ய வலியுறுத்தி, நாளை (ஜூன் 29) தி.மு.க. மாணவர் அணி சார்பில் தமிழ்நாடு முழுவதும் மாவட்டத் தலைநகரங்களில் மாபெரும் கண்டன ஆர்ப்பாட்டம் நடைபெறவுள்ளது.
இது குறித்து தி.மு.க. மாணவர் அணி தலைமைக் கழகம் வெளியிட்டுள்ள அறிக்கையில் தெரிவிக்கப்பட்டுள்ளதாவது:
சர்ச்சைக்குரிய வீடியோ:
இளைஞர்களையும் சமுதாயத்தையும் சீரழிக்கும் போதைப் பொருட்கள் பயன்பாட்டைத் தடுத்து நிறுத்துவது ஒவ்வொருவரின் சமூகப் பொறுப்பாகும். ஆனால், ஆளும் த.வெ.க. அரசின் மனிதவள மேலாண்மைத் துறை அமைச்சர் டி.சரத்குமார், போதைப்பொருள் ஒழிப்பு நாளன்றே போதைப்பொருளைப் பயன்படுத்துவது போன்ற வீடியோவை வெளியிட்டு பெரும் சர்ச்சையை ஏற்படுத்தியுள்ளார். இதனை “Thug Life Moment” என ரீல்ஸ் (Reels) ஆக வெளியிட்டு இளைஞர்களைத் தவறான பாதைக்கு அவர் ஊக்குவிப்பது கடுமையாகக் கண்டிக்கத்தக்கது. மேலும், இதற்கு விளக்கம் அளிப்பதாகக் கூறி குழந்தைக்குப் பின்னால் ஒளிந்துகொண்டு அவர் அரசியல் செய்வதாகவும் தி.மு.க. குற்றம் சாட்டியுள்ளது.
மாபெரும் கண்டன ஆர்ப்பாட்டம்:
இத்தகைய நடவடிக்கைகளில் ஈடுபடும் ஒருவர் அமைச்சரவையில் தொடர்வது தமிழ்நாட்டு இளைஞர்களுக்கு எவ்விதத்திலும் நன்மை பயக்காது. எனவே, அமைச்சர் சரத்குமாரை உடனடியாகப் பதவி நீக்கம் செய்ய வலியுறுத்தி, 29-06-2026 (திங்கட்கிழமை) அன்று அனைத்து மாவட்டத் தலைநகரங்களிலும் தி.மு.க. மாணவர் அணி சார்பில் மாபெரும் கண்டன ஆர்ப்பாட்டம் நடைபெறுகிறது. இந்த ஆர்ப்பாட்டத்தில் மாவட்ட, ஒன்றிய, நகர, பேரூர் கழக மாணவரணி நிர்வாகிகள் மற்றும் மாணவர்கள் பெருந்திரளாகக் கலந்துகொள்ள அழைப்பு விடுக்கப்பட்டுள்ளது.
முதலமைச்சருக்கும், அமைச்சர் ஜெகதீஸ்வரிக்கும் கண்டனம்:
த.வெ.க. முதலமைச்சர் விஜய் குறித்தும் அந்த அறிக்கையில் கடுமையான விமர்சனங்கள் முன்வைக்கப்பட்டுள்ளன. முதலமைச்சரின் திரைப்படங்களில் இடம்பெற்ற மது அருந்துவதை ஊக்குவிக்கும் தத்துவப் பாடல்களைச் சுட்டிக்காட்டியுள்ள தி.மு.க. மாணவரணி, த.வெ.க. அமைச்சர்கள் இன்னமும் ரசிக மனநிலையிலேயே இருப்பதாகவும் சாடியுள்ளது. குறிப்பாக, அமைச்சர் ஜெகதீஸ்வரி தனது கையில் முதலமைச்சர் விஜய் புகைப்பிடிப்பது போன்ற ‘டாட்டூ’ (Tattoo) குத்தியிருப்பதைச் சுட்டிக்காட்டி, இத்தகைய மாண்பற்ற போக்குகளை முதலமைச்சர் ரசிக்காமல் உடனடியாகக் கண்டித்து முற்றுப்புள்ளி வைக்க வேண்டும் எனவும் தி.மு.க. மாணவரணி தனது அறிக்கையில் வலியுறுத்தியுள்ளது.