தமிழகத்தில் மின் கட்டண உயர்வு பொதுமக்கள் இடையே பெரும் அதிர்ச்சியை ஏற்படுத்தியுள்ளதாகவும், இதனைச் சரி செய்ய அரசு உடனடியாக நடவடிக்கை எடுக்க வேண்டும் என்றும் இந்திய கம்யூனிஸ்ட் கட்சியின் மூத்த நிர்வாகியும் மத்திய கட்டுப்பாட்டுக் குழு உறுப்பினருமான இரா.முத்தரசன் வலியுறுத்தியுள்ளார்.
ஒன்றிய அரசைக் கண்டித்து நடைபயணப் பரப்புரை
இந்தியாவில் மாற்றத்தை உருவாக்கவும், பாஜக அரசை வீழ்த்தவும் இந்திய கம்யூனிஸ்ட் கட்சியின் சார்பில் மக்கள் சந்திப்பு நடைபயணப் பரப்புரை இயக்கம் சேலத்தில் நடைபெற்றது. சேலம் அருகே உள்ள நாழிகல்பட்டி மற்றும் சிவசக்தி நகர் ஆகிய பகுதிகளில் நடைபெற்ற இந்த நடைபயண நிகழ்ச்சியில் இரா.முத்தரசன் பங்கேற்று, கிராமம் கிராமமாகச் சென்று ஒன்றிய அரசுக்கு எதிரான முழக்கங்களை எழுப்பினார்.
நடைபயணத்தின் போது செய்தியாளர்களைச் சந்தித்த அவர் கூறியதாவது:
“ஒன்றிய அரசின் மக்கள் விரோதப்போக்கைக் கண்டித்து நாடு தழுவிய அளவில் இந்த நடைபயணம் நடைபெறுகிறது. விவசாயிகள் உற்பத்தி செய்யும் பொருட்களுக்கு நியாயமான விலை நிர்ணயம் செய்யும் சட்டத்தை நிறைவேற்ற வேண்டும், தொழிலாளர்களுக்கு எதிரான 4 புதிய சட்டத் தொகுப்புகளைத் திரும்பப் பெற வேண்டும், நீட் தேர்வை ரத்து செய்ய வேண்டும் மற்றும் மகாத்மா காந்தி ஊரக வேலைவாய்ப்புத் திட்டத்தைப் பழையபடியே செயல்படுத்த வேண்டும் என்பதை வலியுறுத்திப் போராடி வருகிறோம். மோடி அரசை வெளியேற்றும் வரை இந்த இயக்கம் தொடரும்.”
தொகுதி மறுவரையறை: திமுகவின் நிலைப்பாட்டிற்கு வரவேற்பு, தொடர்ந்து தொகுதி மறுவரையறை தொடர்பான கேள்விக்குப் பதிலளித்த முத்தரசன் “தொகுதி மறுவரையறைக்கு முதன்முதலில் குரல் கொடுத்துக் கடுமையாக எதிர்த்தது திமுக தான். இந்தச் சட்ட மசோதா தாக்கல் செய்யப்பட்ட போது தமிழகம் முழுவதும் கருப்புக்கொடி ஏந்தி எதிர்ப்பு தெரிவித்தவர் முதலமைச்சர் மு.க.ஸ்டாலின். இந்த விவகாரத்தில் அவர்களின் எதிர்ப்பு நிலைப்பாட்டில் எந்த மாற்றமும் இல்லை என்று தெரிவித்திருப்பது மிகவும் வரவேற்கத்தக்கது.”
சிறு, குறு விவசாயிகள் கடன் தள்ளுபடி & மின் கட்டணக் கோரிக்கை மாநில அரசு தொடர்பான கோரிக்கைகள் குறித்து அவர் பேசுகையில்:
விவசாயிகள் கடன் தள்ளுபடி: தேர்தல் வாக்குறுதியில் அளித்தபடி, 5 ஏக்கர் வரை நிலம் வைத்துள்ள சிறு, குறு விவசாயிகளுக்குப் பயிர்க்கடனை முழுமையாகத் தள்ளுபடி செய்ய வேண்டும். தற்போது அறிவிக்கப்பட்டுள்ள பயிர்க்கடன் தள்ளுபடி முறை முழுமையாக ஏற்புடையதாக இல்லை.
மின் கட்டணக் குளறுபடி: தமிழகத்தில் மின்கட்டண உயர்வு மற்றும் குளறுபடிகள் பொதுமக்களிடையே பெரும் அதிர்ச்சியை ஏற்படுத்தியுள்ளது. இதுகுறித்து ஆய்வு நடத்தப்படும் என்று மின்சாரத்துறை அமைச்சர் கூறியிருப்பது வெறும் வாய் வார்த்தையாக இல்லாமல், உடனடியாகச் செயல்பாட்டுக்கு வர வேண்டும். தடையில்லா மின்சாரம் வழங்குவதோடு, கட்டண உயர்வையும் அரசு உடனடியாகச் சரி செய்ய வேண்டும். இவ்வாறு இந்திய கம்யூனிஸ்ட் கட்சியின் மூத்த நிர்வாகி முத்தரசன் தெரிவித்தார்.