ஜோலார்பேட்டை- கோவை ரயில் பாதையில் அதிவேக சோதனை ஓட்டம் வெற்றி அடைந்துள்ளது. இந்த வேகத்தில் ரயில்கள் இயக்கப்பட்டால் பயண நேரம் குறையும் என எதிர்ப்பார்க்கப்படுகிறது.
இது குறித்து தமிழ்நாடு ரயில் செய்திகள் என்ற சமூகவலைதள பக்கத்தில் கூறியிருப்பதாவது, தமிழகத்தின் முக்கிய ரயில் வழித்தடங்களில் ஒன்றான ஜோலார்பேட்டை–கோயம்புத்தூர் (286 கி.மீ) பிரிவில், அதிகபட்ச அனுமதிக்கப்பட்ட வேகத்தை உயர்த்தும் நோக்கில் தெற்கு ரயில்வே இன்று (27 நவம்பர் 2025) அதிவேகச் சோதனை ஓட்டத்தை வெற்றிகரமாக மேற்கொண்டது.
இந்த வழித்தடத்தின் வேகத்தை 110 கி.மீ/மணியில் இருந்து 130 கி.மீ/மணியாக உயர்த்தும் முயற்சியின் பகுதியாக, சென்னை சென்ட்ரலில் இருந்து இயக்கப்பட்ட சிறப்பு ரயில் அதிகபட்சமாக 145 கி.மீ/மணி வேகத்தை எட்டியது.
வேக அதிகரிப்பால் கிடைக்கப் போகும் நன்மைகள்
பயண நேரம் குறைப்பு, 130 கி.மீ/மணி வேக அங்கீகாரம் கிடைத்தவுடன், இந்த வழித்தடத்தில் ரயில்களின் பயண நேரம் கணிசமாக குறையும். நீண்ட தூரப் பயணிகள் பெரும் பயனடைவார்கள்.
ரயில் சேவையின் செயல்திறன் உயர்வு
வேக உயர்வு மூலம் ரயில் இயக்க செயல்பாடு மேம்பட்டு, ரயில் பாதையில் நெரிசலும் குறையும். ரயில்வே பெட்டிகளைச் சிறப்பாக பயன்படுத்தும் வாய்ப்பு கிடைக்கும்.
பாதுகாப்பு பரிசோதனைகள்
சோதனை ஓட்டத்தின் போது தண்டவாள வடிவியல், வளைவு–சாய்வு நிலைத்தன்மை, முடுக்கம் உள்ளிட்ட முக்கிய தொழில்நுட்ப அளவுருக்கள் ஆய்வு செய்யப்பட்டன. இவை அனைத்தும் சாதகமாக இருந்தால், புதிய வேக அங்கீகாரம் வழங்கப்படும்.
வேக உயர்த்தும் செயல்முறை (Speed Trials)
1. ஆரம்பத் தயார்நிலை
பொறியியல், இயந்திரவியல், சமிக்ஞை மற்றும் தகவல் தொடர்பு துறைகள் இணைந்து தண்டவாளம் மற்றும் வடிவமைப்புகளின் பராமரிப்பு, வலுப்படுத்தல் பணிகளை நிறைவு செய்கின்றன.
- சோதனை ஓட்டங்கள்
ரயில்களின் அதிவேக இயக்கத்தில் ஏற்படும் ஆட்ட அசைவு, முடுக்கம் போன்ற தொழில்நுட்ப அம்சங்கள் பல சுற்றுகளில் பரிசோதிக்கப்படுகின்றன.
- தரவு ஆய்வு
பதிவு செய்யப்பட்ட அனைத்து தொழில்நுட்ப தரவுகளும் ஆய்வு செய்யப்பட்டு, அங்கீகாரத்திற்கு தேவையான பாதுகாப்பு அளவுருக்கள் பூர்த்தியடைந்துள்ளனவா என மதிப்பீடு செய்யப்படும்.
ஏற்கெனவே வேகம் உயர்த்தப்பட்ட முக்கிய பாதைகள்
தெற்கு ரயில்வே கடந்த சில ஆண்டுகளில் பல்வேறு பிரிவுகளில் வேக உயர்த்தல் பணிகளை முடித்து 110 → 130 கி.மீ/மணி என வேகத்தை மேம்படுத்தியுள்ளது.
சென்னை சென்ட்ரல் – கூடூர் (134 கி.மீ)
சென்னை சென்ட்ரல் – அரக்கோணம் – ரேணிகுண்டா (134.78 கி.மீ)
அரக்கோணம் – ஜோலார்பேட்டை (144.54 கி.மீ)
மொத்தம் 415 கி.மீ. மேலும் கடந்த மூன்று ஆண்டுகளில் 2,794 கி.மீ தூரம் கொண்ட பெரும்பாலான பகுதிகளில் வேகத்தை 80/90/100 → 110 கி.மீ/மணியாக உயர்த்தப்பட்டுள்ளது.
2026–27 நிதி ஆண்டில் வேகம் உயர்த்தப்பட உள்ள பிரிவுகள்
அடுத்த நிதியாண்டில் பல முக்கிய வழித்தடங்களில் 110 → 130 கி.மீ/மணி வேக உயர்த்தல் நடைபெற உள்ளது.
சென்னை எழும்பூர் – விழுப்புரம்
விழுப்புரம் – விருத்தாச்சலம்
விருத்தாச்சலம் – திருச்சிராப்பள்ளி
கொல்லம் – திருவனந்தபுரம்
ஷோரனூர் – கோழிக்கோடு – கண்ணூர்
கண்ணூர் – மங்களூரு
இந்தச் சோதனை முடிவுகள் சாதகமாக அமைந்தால், ரயில் சேவை மேலும் துரிதமாகும் என எதிர்பார்க்கப்படுகிறது.
குடியிருப்பு பகுதிகளில் புகுந்த புலியால் பரபரப்பு!! பீதியில் மக்கள்…