சென்னை சேப்பாக்கம் மைதானத்தில் ஐபிஎல் போட்டியின் போது தமிழக மனித வள மேம்பாட்டுத் துறை அமைச்சர் சரத்குமார் போதைப்பொருள் பயன்படுத்தியதாக எழுந்த சர்ச்சையை அடுத்து, அவர் மீது சென்னை காவல் ஆணையர் அலுவலகத்தில் புகார் அளிக்கப்பட்டுள்ளது.
சர்ச்சையை ஏற்படுத்திய வீடியோ:
சமீபத்தில் சமூக வலைதளங்களில் வீடியோ ஒன்று வெளியாகி பெரும் பரபரப்பை ஏற்படுத்தியது. சேப்பாக்கம் ஸ்டேடியத்தில் ஐபிஎல் கிரிக்கெட் போட்டியைக் கண்டுகளித்த அமைச்சர் சரத்குமாரின் செயல்பாடுகள், போதைப்பொருள் பயன்படுத்துவது போன்று இருப்பதாக நெட்டிசன்கள் மத்தியில் விவாதப் பொருளானது.
அமைச்சர் மற்றும் குடும்பத்தினரின் விளக்கம்:
இந்த சர்ச்சை தீவிரமடைந்ததைத் தொடர்ந்து, அமைச்சர் சரத்குமார் தனது குடும்பத்தினருடன் இணைந்து விளக்கம் அளிக்கும் வீடியோ ஒன்றை வெளியிட்டார். அதில், “கடந்த ஆண்டு நடைபெற்ற ஐபிஎல் போட்டியின் போது, குழந்தைக்குக் கொடுப்பதற்காக மருந்தைத்தான் பொடி செய்து கொடுத்தேன்” என்று அவர் தரப்பில் விளக்கமளிக்கப்பட்டது. இருப்பினும், இந்த விளக்கம் சமூக வலைதளங்களில் மேலும் பல்வேறு சந்தேகங்களை எழுப்பியது.
போலீசில் புகார்:
இந்நிலையில், இந்த விவகாரம் தொடர்பாக விரிவான விசாரணை நடத்தக் கோரி வழக்கறிஞர் சரண்யா நடராஜன் என்பவர் சென்னை காவல் ஆணையர் (கமிஷனர்) அலுவலகத்தில் புகார் மனு அளித்துள்ளார். மேலும், இச்சம்பவம் நடைபெற்ற இடமாகக் கூறப்படும் சேப்பாக்கம் மைதான எல்லைக்குட்பட்ட திருவல்லிக்கேணி காவல் நிலையத்திலும் இந்த விவகாரம் தொடர்பாகப் புகார் அளிக்கப்பட்டுள்ளது குறிப்பிடத்தக்கது.