தமிழ்நாடு அரசின் கூட்டுறவுத் துறையின் சார்பில் மாநிலம் முழுவதும் சிறப்பாகக் கொண்டாடப்படவுள்ள “கூட்டுறவு வாரம் 2026” கொண்டாட்டங்களை, கூட்டுறவுத்துறை அமைச்சர் காந்திராஜ் இன்று (ஜூன் 29) சென்னை கூட்டுறவு சங்கங்களின் பதிவாளர் அலுவலகத்தில் கூட்டுறவு கொடியேற்றி, உறுதிமொழி ஏற்றுத் துவக்கி வைத்தார்.
இந்திய அரசின் கூட்டுறவு அமைச்சகம் தொடங்கப்பட்டு ஐந்து ஆண்டுகள் நிறைவடைந்ததையொட்டி, இன்று முதல் ஒரு வார காலத்திற்கு இக்கொண்டாட்டங்கள் மாநிலம் முழுவதும் உள்ள அனைத்து கூட்டுறவு நிறுவனங்கள், வங்கிகள் மற்றும் தொடக்க வேளாண்மை கூட்டுறவு கடன் சங்கங்கள் (PACS) மூலம் நடத்தப்படவுள்ளன. பொதுமக்களிடையே கூட்டுறவு இயக்கத்தின் முக்கியத்துவத்தைக் கொண்டு சேர்ப்பதுடன், கூட்டுறவுச் சங்கங்களில் நவீன டிஜிட்டல் தொழில்நுட்பங்களைப் புகுத்துவதை ஊக்குவிக்கும் வகையிலும் இந்த வாரம் திட்டமிடப்பட்டுள்ளது.
கூட்டுறவு வாரத்தை முன்னிட்டு, நாள்தோறும் பல்வேறு தலைப்புகளில் சிறப்பான நிகழ்ச்சிகள் மற்றும் முகாம்கள் மாநிலம் முழுவதும் நடத்தப்படவுள்ளன,
தொழில்நுட்ப விழிப்புணர்வு: தொடக்க வேளாண்மை கூட்டுறவு கடன் சங்கங்கள் (PACS) கணினிமயமாக்கல் குறித்த விளக்கம் மற்றும் வாடிக்கையாளர்களிடம் டிஜிட்டல் வங்கிச் சேவைகள் பற்றிய விழிப்புணர்வு ஏற்படுத்துதல்.
சிறப்பு முகாம்கள்: எளிய முறையில் கூட்டுறவுச் சங்கங்கள் மூலம் கடன் பெறுவதற்கான சிறப்பு முகாம்கள், கிசான் கிரெடிட் கார்டு (KCC) விழிப்புணர்வு முகாம்கள்.
சமூக நற்பணிகள்: மாநிலம் முழுவதும் மரக்கன்றுகள் நடுதல், இலவச இரத்த தான முகாம்கள் மற்றும் கால்நடை மருத்துவ முகாம்கள் நடத்துதல்.
கண்காட்சி & போட்டிகள்: மாணவர்களுக்கான பல்வேறு போட்டிகள், மாணவ-மாணவியரின் கலை நிகழ்ச்சிகள், கூட்டுறவுச் சாதனைக் கண்காட்சிகள் மற்றும் கூட்டுறவு தயாரிப்புகளின் சிறப்புக் கண்காட்சி & விற்பனை.
முக்கிய அதிகாரிகள் பங்கேற்பு:
இந்நிகழ்ச்சியில் கூட்டுறவு, உணவு மற்றும் நுகர்வோர் பாதுகாப்புத்துறை கூடுதல் தலைமைச் செயலாளர் அமுதா, கூட்டுறவுச் சங்கங்களின் பதிவாளர் லதா, கூடுதல் பதிவாளர்கள் தர்ப்பகராஜ், முருகன் உள்ளிட்ட கூட்டுறவுத்துறையின் உயர் அலுவலர்கள் பலரும் கலந்து கொண்டனர்.
மனமகிழ் மன்றங்களுக்கான சிறப்புக் கட்டணம் இருமடங்காக உயர்வு: தமிழக அரசு அதிரடி உத்தரவு