சட்டப்பேரவையில் ஓபிஎஸ்ஸை திருத்திய அமைச்சர் ஆதவ் அர்ஜுனா: நடந்தது என்ன?

தமிழக சட்டப்பேரவையில் கடந்த ஒரு மாத காலமாக பட்ஜெட் கூட்டத்தொடர் விறுவிறுப்பாக நடைபெற்று வருகிறது. ஒவ்வொரு நாளும் துறை ரீதியான மானியக் கோரிக்கைகள் தாக்கல் செய்யப்பட்டு, அதன் மீது உறுப்பினர்களின் விவாதமும், அமைச்சர்களின் புதிய அறிவிப்புகளும் வெளியாகி வருகின்றன.

அந்த வகையில் இன்று (ஆகஸ்ட் 31) மாற்றுத்திறனாளிகள் நலன், மதுவிலக்கு மற்றும் ஆயத்தீர்வை, சமூக நலன் மற்றும் மகளிர் உரிமைத் துறை, வேளாண்மைத் துறை ஆகிய துறைகளின் மானியக் கோரிக்கைகள் தாக்கல் செய்யப்பட்டு விவாதங்கள் நடைபெற்று வருகின்றன.

நெடுஞ்சாலைத் துறை கேள்வியும், சுவாரசிய உரையாடலும்
முன்னதாக இன்று காலை சட்டப்பேரவை கூடியதும் கேள்வி நேரம் எடுத்துக்கொள்ளப்பட்டது. அப்போது சட்டமன்ற உறுப்பினர்கள் எழுப்பிய கேள்விகளுக்கு சம்பந்தப்பட்ட துறை அமைச்சர்கள் பதிலளித்து வந்தனர். கேள்வி நேரத்தின் போது பேசிய முன்னாள் அமைச்சரும், திமுக சட்டமன்ற உறுப்பினருமான ஓ.பன்னீர்செல்வம் (ஓபிஎஸ்), “மதுரையிலிருந்து தேனி செல்லும் பாதையில் உசிலம்பட்டி மற்றும் ஆண்டிப்பட்டி பகுதிகளில் கடுமையான போக்குவரத்து நெரிசல் ஏற்படுகிறது. இதனால் தேனி வழியாகக் குமுளி மற்றும் மூணாறு செல்லும் வாகன ஓட்டிகளும், பொதுமக்களும் பெரும் சிரமத்திற்கு உள்ளாகிறார்கள். எனவே, ஆண்டிப்பட்டி மற்றும் உசிலம்பட்டி பகுதிகளில் பைபாஸ் (புறவழிச்) சாலை அமைத்துத் தர வேண்டும் எனப் போக்குவரத்துத் துறை அமைச்சரின் கவனத்திற்குக் கொண்டு வருகிறேன்” என்று பேசினார்.

தவறைச் சுட்டிக்காட்டிய அமைச்சர் ஆதவ் அர்ஜுனா
நெடுஞ்சாலைத் துறைக்கு உட்பட்ட பைபாஸ் சாலை கோரிக்கையை, ஓபிஎஸ் தவறுதலாகப் ‘போக்குவரத்துத் துறை’ என்று குறிப்பிட்டதை அடுத்து உடனே எழுந்த பொதுப்பணித் துறை அமைச்சர் ஆதவ் அர்ஜுனா, “அண்ணன் ‘ஓபிஎஸ்’ பேசும்போது போக்குவரத்துத் துறை அமைச்சர் என்று சொன்னீர்கள், ஆனால் இக்கோரிக்கை நெடுஞ்சாலைத் துறை மற்றும் பொதுப்பணித் துறைக்கு உட்பட்டது” என்று புன்னகையுடன் சுட்டிக்காட்டினார்.

அமைச்சரின் இந்த சுட்டிக்காட்டலைத் தொடர்ந்து உடனே மீண்டும் எழுந்த ஓ.பன்னீர்செல்வம், “அதை அப்படியே திருத்தி வாசித்துக்கொள்ளவும்… பொதுப்பணித் துறை அமைச்சர் அவர்கள்…” என்று சிரித்தபடியே திருத்திக் கூறினார். இதனால் சிறிது நேரம் பேரவையில் லேசான சிரிப்பலை நிலவியது. இதைத் தொடர்ந்து, ஓபிஎஸ் முன்வைத்த ஆண்டிப்பட்டி – உசிலம்பட்டி புறவழிச்சாலை கோரிக்கை குறித்து அரசு பரிசீலித்து உரிய நடவடிக்கை எடுக்கும் என்று எதிர்பார்க்கப்படுகிறது.

ஜனநாயகத்தின் இறுதிச் சடங்காக மாறிய தேர்தல் ஆணையம்? வாக்காளர் பட்டியல் திருட்டு மற்றும் ஈவிஎம் மோசடிகளின் பின்னணி அம்பலம்!