தமிழகத்தில் தேசிய போலியோ சொட்டு மருந்து முகாம்: முதலமைச்சர் விஜய் தொடங்கி வைத்தார்

தமிழகம் முழுவதும் 5 வயதிற்குட்பட்ட 52.91 லட்சம் குழந்தைகளுக்கு போலியோ சொட்டு மருந்து வழங்கும் ‘தேசிய போலியோ சொட்டு மருந்து சிறப்பு முகாம் 2026’-யை முதலமைச்சர் விஜய் இன்று (ஜூன் 28) அதிரடியாகத் தொடங்கி வைத்தார்.
​முதலமைச்சர் தொடங்கி வைத்தார்..

சென்னை பாலவாக்கத்தில் உள்ள அரசு ஆதிதிராவிடர் நல உயர்நிலைப்பள்ளியில், மருத்துவம் மற்றும் மக்கள் நல்வாழ்வுத்துறையின் பொது சுகாதாரம் மற்றும் நோய் தடுப்பு மருந்து இயக்கம் சார்பில் இந்த சிறப்பு முகாம் நடைபெற்றது. இதில் கலந்துகொண்ட முதலமைச்சர் விஜய், குழந்தைகளுக்கு தன் கரங்களால் போலியோ சொட்டு மருந்து ஊற்றி முகாமினைத் தொடங்கி வைத்தார். தொடர்ந்து சொட்டு மருந்து செலுத்திக்கொண்ட குழந்தைகளுக்கு பொம்மைகளையும் பரிசாக வழங்கி மகிழ்வித்தார்.

​இந்நிகழ்வில் மருத்துவம் மற்றும் மக்கள் நல்வாழ்வுத்துறை அமைச்சர் அருண்ராஜ், சோழிங்கநல்லூர் சட்டமன்ற உறுப்பினர் ஈசிஆர் சரவணன், சுகாதாரத்துறை செயலாளர் தாரேஸ் அகமது, சென்னை மாநகராட்சி ஆணையாளர் சமீரன் உள்ளிட்ட உயர்தர அதிகாரிகள் பலர் கலந்து கொண்டனர்.

43,051 மையங்களில் சொட்டு மருந்து விநியோகம்:
இந்த தேசிய முகாமையொட்டி, தமிழகம் முழுவதும் உள்ள அரசு ஆரம்ப சுகாதார நிலையங்கள், அரசு மருத்துவமனைகள், அங்கன்வாடி மையங்கள், பள்ளிகள் மற்றும் முக்கிய பொது இடங்கள் என மொத்தம் 43,051 மையங்களில் போலியோ சொட்டு மருந்து வழங்கப்பட்டு வருகிறது. காலை 7 மணி முதல் மாலை 5 மணி வரை இந்த முகாம்கள் செயல்படுகின்றன.
​”நாளை முதல் வீடு வீடாக ஆய்வு; அரசு மருத்துவமனைகளில் ஓபி முன்பதிவுக்கு புதிய செயலி”: அமைச்சர் அருண்ராஜ் பேட்டி!
​முகாம் தொடக்க விழாவிற்குப் பிறகு செய்தியாளர்களைச் சந்தித்த மருத்துவம் மற்றும் மக்கள் நல்வாழ்வுத்துறை அமைச்சர் அருண்ராஜ் முக்கிய அறிவிப்புகளை வெளியிட்டார்.

அவரது பேட்டியின் விவரம்:
​சமூக நோய் எதிர்ப்புச் சக்தி (Community Immunity):
“ஏற்கனவே குழந்தைகளுக்கு போலியோ சொட்டு மருந்து போட்டிருந்தாலும், இன்றைய சிறப்பு முகாமில் மீண்டும் ஒருமுறை போட்டுக் கொள்ள வேண்டும். ஒரே நேரத்தில் நாடு முழுவதும் சொட்டு மருந்து செலுத்தப்படும் போது, குழந்தைகளுக்கு ‘சமூக நோய் எதிர்ப்புச் சக்தி’ அதிகரிக்கும். இதனால் வெளிநாடுகளில் இருந்து பரவும் நோய்த் தொற்றுகளில் இருந்து நம் குழந்தைகளைப் பாதுகாக்க முடியும்.”

​3 நாட்கள் முகாம் மற்றும் வீடு வீடாக ஆய்வு:
“இந்தியாவில் கடந்த 2004-ம் ஆண்டுக்குப் பிறகு போலியோ பாதிப்பு இல்லை என்பதால், 2014-ல் போலியோ இல்லாத நாடாக உலக சுகாதார அமைப்பு அறிவித்தது. இருப்பினும், அண்டை நாடுகளில் பாதிப்பு இருப்பதால் இந்த முன்னெச்சரிக்கை நடவடிக்கை தொடர்கிறது. இன்று தொடங்கி அடுத்த மூன்று நாட்களுக்கு இந்த முகாம் நடைபெறும். விடுபட்ட குழந்தைகளைக் கண்டறிய நாளை முதல் சுகாதாரத்துறையினர் ஒவ்வொரு வீடாகச் சென்று ஆய்வு நடத்த உள்ளனர்.”

​புறநோயாளிகளுக்கு (OP) புதிய செயலி:
“அரசு மருத்துவமனைகளுக்கு வரும் புறநோயாளிகளின் வசதிக்காக பிரத்யேக மொபைல் செயலி (App) ஒன்று வடிவமைக்கப்பட்டுள்ளது. இதற்கான சோதனை ஓட்டம் (Testing phase) தற்போது வெற்றிகரமாக முடிவடைந்துள்ளது. முதற்கட்டமாக, சென்னை ராஜீவ்காந்தி அரசு பொது மருத்துவமனையில் இந்தச் செயலி மூலம் புறநோயாளிகள் முன்பதிவு செய்யும் நடைமுறை விரைவில் தொடங்கப்பட உள்ளது. இதுகுறித்த அதிகாரப்பூர்வ அறிவிப்பு மிக விரைவில் வெளியாகும்.”
​பெற்றோர்கள் தங்கள் குழந்தைகளுக்குத் தவறாமல் போலியோ சொட்டு மருந்து செலுத்திப் பயன்பெறுமாறு அமைச்சர் அருண்ராஜ் கேட்டுக்கொண்டுள்ளார்.