தமிழக முதலமைச்சராக பொறுப்பேற்ற பிறகு, விஜய் தனது முதல் வெளிநாட்டு பயணமாக பிரிட்டனுக்கு செல்ல உள்ளதாக தகவல் வெளியாகியுள்ளது. செப்டம்பர் 10 முதல் 16ஆம் தேதி வரை இந்தப் பயணம் திட்டமிடப்பட்டுள்ளதாக கூறப்படுகிறது.
முதலீடுகளை ஈர்ப்பதே முக்கிய நோக்கம்!
தமிழகத்திற்கு புதிய தொழில் முதலீடுகளை ஈர்ப்பதே இந்தப் பயணத்தின் முக்கிய நோக்கமாக இருக்கும் எனத் தெரிகிறது. பிரிட்டனில் முன்னணி நிறுவனங்களின் பிரதிநிதிகள், தொழிலதிபர்கள் மற்றும் முதலீட்டாளர்களை முதலமைச்சர் விஜய் சந்தித்து, தமிழகத்தில் தொழில் தொடங்குவதற்கான வாய்ப்புகள் குறித்து பேச உள்ளதாக தகவல்கள் தெரிவிக்கின்றன.
இந்தப் பயணத்தின்போது பல்வேறு நிறுவனங்களுடன் புரிந்துணர்வு ஒப்பந்தங்கள் (MoU) கையெழுத்தாகும் வாய்ப்பும் இருப்பதாக கூறப்படுகிறது.
முதல் 100 நாட்களில் ₹1 லட்சம் கோடிக்கு மேல் முதலீட்டு உறுதிகள்?
விஜய் தலைமையிலான அரசு தனது முதல் 100 நாட்களில் ₹1 லட்சம் கோடிக்கும் அதிகமான முதலீட்டு உறுதிகளை பெற்றுள்ளதாக தெரிவித்துள்ளது.
இதில் சென்னையில் நடைபெற்ற முதலீட்டாளர்கள் மாநாட்டில் மட்டும் 97 முதலீடுகளுக்காக ₹67,452 கோடி மதிப்பிலான ஒப்பந்தங்கள் கையெழுத்தானதாக கூறப்படுகிறது. இந்த முதலீட்டு முயற்சிகளை வெளிநாடுகளுக்கும் விரிவுபடுத்தும் நோக்கத்திலேயே பிரிட்டன் பயணம் அமைய உள்ளது.
2036-ல் $1.5 டிரில்லியன் பொருளாதாரம் – தமிழகத்தின் இலக்கு!
தமிழகத்தை வரும் 2036ஆம் ஆண்டுக்குள் 1.5 டிரில்லியன் டாலர் பொருளாதாரமாக மாற்ற வேண்டும் என்ற இலக்கை அரசு முன்வைத்துள்ளது.
இதற்காக புதிய தொழிற்சாலைகள், உயர் தொழில்நுட்ப நிறுவனங்கள், வேலைவாய்ப்புகளை உருவாக்கும் முதலீடுகள் உள்ளிட்டவற்றை தமிழகத்திற்கு கொண்டு வருவதில் அரசு கவனம் செலுத்தி வருகிறது.
ஆந்திராவுடன் முதலீட்டு போட்டி?
தென்னிந்தியாவில் தொழில் முதலீடுகளை ஈர்ப்பதில் தமிழகம் மற்றும் ஆந்திரப் பிரதேசம் இடையே போட்டி அதிகரித்து வரும் நிலையில், விஜய்யின் பிரிட்டன் பயணம் முக்கியத்துவம் பெற்றுள்ளது.
குறிப்பாக செமிகண்டக்டர், எலக்ட்ரானிக்ஸ், செயற்கை நுண்ணறிவு உள்ளிட்ட வளர்ந்து வரும் உயர் தொழில்நுட்பத் துறைகளில் உலகளாவிய நிறுவனங்களை தமிழகத்திற்கு கொண்டு வருவதற்கான முயற்சிகள் தீவிரப்படுத்தப்பட்டுள்ளன.
முதல் வெளிநாட்டு பயணம் என்பதால் எதிர்பார்ப்பு
முதலமைச்சராக பொறுப்பேற்ற பிறகு விஜய் மேற்கொள்ளும் முதல் வெளிநாட்டு அரசு முறைப் பயணம் என்பதால், இந்தப் பயணம் அரசியல் மற்றும் தொழில் வட்டாரங்களில் கவனம் பெற்றுள்ளது.
பிரிட்டன் பயணத்தின் முடிவில் தமிழகத்திற்கு எவ்வளவு முதலீடுகள் கிடைக்கும், எந்தெந்த நிறுவனங்களுடன் ஒப்பந்தங்கள் கையெழுத்தாகும் என்பது அடுத்த முக்கிய எதிர்பார்ப்பாக உள்ளது.
மேலும், பயணத்திட்டத்தில் பிரிட்டனைத் தொடர்ந்து வேறு நாடுகளும் இடம்பெறுமா என்பது பின்னர் இறுதி செய்யப்படும் எனத் தகவல்கள் வெளியாகியுள்ளன.
விஜய் அரசு புதிய அதிரடி திட்டம்! 1865-ம் ஆண்டு முதல் உள்ள அரசு ஆவணங்கள் டிஜிட்டல் மயமாக்கப்படுமா?