துபாய்: ஐக்கிய அரபு அமீரகத்தின் துபாயில் நடைபெற்று வந்த சர்வதேச விமானக் கண்காட்சியின் (Dubai Air Show) கடைசி நாளான இன்று (நவம்பர் 21, 2025), சாகசப் பயிற்சியில் ஈடுபட்டிருந்த இந்தியாவின் இலகுரக போர் விமானமான ‘தேஜஸ்’ (Tejas) கீழே விழுந்து வெடித்துச் சிதறிய சம்பவம் பெரும் அதிர்ச்சியையும் பரபரப்பையும் ஏற்படுத்தியுள்ளது.
துபாய் அல் மக்தூம் சர்வதேச விமான நிலையம் (Al Maktoum International Airport) அருகே, விமானக் கண்காட்சி நடைபெறும் இடத்தில் இந்த விபத்து உள்ளூர் நேரப்படி பிற்பகல் 2:10 மணியளவில் நடந்துள்ளது.
ஹிந்துஸ்தான் ஏரோநாட்டிக்ஸ் லிமிடெட் (HAL) நிறுவனத்தால் உள்நாட்டிலேயே தயாரிக்கப்பட்ட ‘தேஜஸ்’ இலகுரக போர் விமானம், சாகசப் பயிற்சியின் போது திடீரெனக் கட்டுப்பாட்டை இழந்து கீழே விழுந்து நொறுங்கியது. விபத்துக்குப் பிறகு விமானத்தில் இருந்து கரும் புகை கிளம்பும் காட்சிகள் சமூக வலைத்தளங்களில் வேகமாகப் பரவி வருகின்றன.
விபத்து நடந்த சில நிமிடங்களில் விமானி வெளியேறினாரா என்பது குறித்த தகவல் உடனடியாகத் தெரியாத நிலையில், பின்னர் இந்திய விமானப் படை (IAF) வெளியிட்டுள்ள அதிகாரப்பூர்வ அறிக்கையில், விமானி உயிரிழப்பு உறுதி செய்யப்பட்டுள்ளது. விமானி வீர மரணம் அடைந்தது நாட்டிற்குப் பேரிழப்பாக அமைந்தது.
விபத்துக்கான காரணம் குறித்து உடனடியாகத் தெரியாத நிலையில், இந்திய விமானப் படை தரப்பில் விசாரணைக் குழு அமைக்கப்பட்டு விசாரணைக்கு உத்தரவிடப்பட்டுள்ளது. இந்தியாவின் ராணுவ பலத்தையும், உள்நாட்டுத் தயாரிப்புகளின் சிறப்பையும் பறைசாற்றும் விதமாக, உலகின் மிகப்பெரிய விமானக் கண்காட்சிகளில் ஒன்றான துபாய் ஏர் ஷோவில் இந்த ‘தேஜஸ்’ விமானம் சாகசப் பயிற்சியில் ஈடுபட்டிருந்தது குறிப்பிடத்தக்கது.
சம்பவம் நடந்த இடத்தில் உடனடியாக அவசர கால குழுவினர் விரைந்து மீட்புப் பணிகளில் ஈடுபட்டனர். பல்லாயிரக்கணக்கான பார்வையாளர்கள் முன்னிலையில் நடந்த இந்த விபத்து, பெரும் சோகத்தை ஏற்படுத்தியுள்ளது.
காங்கிரஸ் தவெக கூட்டணி ரகசியம்! விஜயை அழைத்த அந்த தலைவர்! உண்மையை உடைக்கும் தாமோதரன் பிரகாஷ்!