கூலி படத்தின் ஓடிடி ரிலீஸ் குறித்த புதிய அப்டேட் வெளியாகியுள்ளது.
கடந்த ஆகஸ்ட் 14ஆம் தேதி சூப்பர் ஸ்டார் ரஜினிகாந்த் நடிப்பில் ‘கூலி’ திரைப்படம் வெளியானது. இந்த படத்தை லோகேஷ் கனகராஜ் இயக்க சன் பிக்சர்ஸ் நிறுவனம் படத்தை தயாரித்திருந்தது. அனிருத் இந்த படத்தில் இசையமைப்பாளராகவும், கிரிஷ் கங்காதரன் ஒளிப்பதிவாளராகவும் பணிபுரிந்து இருந்தனர். இந்த படத்தில் ரஜினியுடன் இணைந்து ஸ்ருதிஹாசன், சத்யராஜ், உபேந்திரா, நாகார்ஜுனா, அமீர்கான், சௌபின் சாகிர், ரச்சிதா ராம் ஆகியோர் நடித்திருந்தனர். மிகுந்த எதிர்பார்ப்புகளுடன் வெளியான இந்த படம் வெளியான முதல் நான்கு நாட்களில் ரூ.400 கோடிக்கும் அதிகமாக வசூல் செய்து சாதனை படைத்ததாக படக்குழு அறிவித்தது. 
அதைத் தொடர்ந்து இந்த படம் ரூ.1000 கோடியை நெருங்கிவிடும் என்று எதிர்பார்க்கப்பட்டது. ஆனால் லோகேஷ் கனகராஜின் மற்ற படங்களில் இருந்த சில விஷயங்கள் கூலி படத்தில் மிஸ் ஆனதால் இப்படம் ஜெனரல் ஆடியன்ஸ் மத்தியில் கலவையான விமர்சனங்களை பெற்றது. நாளுக்கு நாள் படத்தின் வசூலும் குறைய தொடங்கின. இதற்கிடையில் இப்படம் செப்டம்பர் மாதம் இரண்டாவது வாரத்தில் ஓடிடியில் வெளியாகும் என சொல்லப்பட்டது. அதன்படி வருகின்ற செப்டம்பர் 12ஆம் தேதி அமேசான் பிரைம் ஓடிடி தளத்தில் இப்படம் வெளியாகும் என தகவல் கசிந்துள்ளது. விரைவில் அதிகாரப்பூர்வ அறிவிப்பு வெளியாகும் என நம்பப்படுகிறது.