வார விடுமுறை நாட்களில் (சனி, ஞாயிறு) அல்லது பொது விடுமுறை நாட்களில் பணிபுரியும் ஊழியர்களுக்கு, அதற்குப் பதிலாக வழக்கமான வேலை நாட்களில் ‘காம்பன்சேட்டரி ஆஃப்’ (Comp Off) எனப்படும் மாற்று விடுப்பு வழங்கும் கார்ப்பரேட் கலாச்சாரத்திற்கு எதிராக ஒரு பெண் ஊழியரின் வீடியோ சமூக வலைதளங்களில் வைரலாகி வருகிறது. இந்த முறை ஊழியர்களின் தனிப்பட்ட சமூக வாழ்க்கையைப் பாதிக்கிறது என பலரும் தங்களின் ஆதரவையும் எதிர்ப்பையும் தெரிவித்து வருகின்றனர். 
கார்ப்பரேட் நிறுவனங்களில் பணிபுரியும் ஊழியர்களின் ‘வொர்க்-லைஃப் பேலன்ஸ்’ (Work-Life Balance) என்பது எப்போதும் ஒரு விவாதப் பொருளாகவே இருந்து வருகிறது. இந்நிலையில், வார இறுதி மற்றும் விடுமுறை நாட்களில் வேலை வாங்குவதற்குப் பதிலாக வழங்கப்படும் ‘Comp Off’ (Compensatory Off) முறைக்கு எதிராகப் பெண் ஊழியர் ஒருவர் சமூக வலைதளத்தில் பதிவிட்ட கருத்து, தற்போது இணையத்தில் பெரும் விவாதத்தை கிளப்பியுள்ளது.
“நான் மட்டும் வீட்டில் தனியாக இருக்க வேண்டும்” – வைரல் பதிவு
அந்தப் பெண் ஊழியர் தனது பதிவில்,
“Comp Off என்ற பெயரில் விடுமுறை நாளில் வேலைக்கு வந்து, சாதாரண வேலை நாளில் ஓய்வெடுப்பது உண்மையான Work, Life Balance கிடையாது. என்னுடைய விடுமுறை நாளில் (வார இறுதியில்) என் நண்பர்களும், குடும்பத்தாரும் விடுமுறையில் இருப்பார்கள். ஆனால், எனக்கு மாற்று விடுமுறையாகக் கொடுக்கப்படும் சாதாரண நாளில் அவர்கள் அனைவரும் வேலைக்குச் சென்றுவிடுகிறார்கள். நான் மட்டும் வீட்டில் தனியாக இருக்க வேண்டியுள்ளது. இந்தத் தனிமையை நான் வெறுக்கிறேன்” என்று மிகுந்த விரக்தியுடன் குறிப்பிட்டுள்ளார்.
இணையத்தில் வெடித்த காரசார விவாதம்
இந்தப் பதிவு வெளியான சில மணி நேரங்களிலேயே ஆயிரக்கணக்கான ஊழியர்களின் கவனத்தைப் பெற்று வைரலானது. இதைத் தொடர்ந்து, ஐடி மற்றும் கார்ப்பரேட் துறையைச் சேர்ந்த பலரும் தங்களின் சொந்த அனுபவங்களையும், குமுறல்களையும் கமெண்ட்டுகளில் கொட்டித் தீர்த்து வருகின்றனர்.
இணையவாசிகளின் முக்கிய கருத்துகள் சில:
“ஞாயிற்றுக்கிழமை குடும்பத்தோடு கழிக்க வேண்டிய நேரத்தை ஆபீஸில் கொடுத்துவிட்டு, செவ்வாய்க்கிழமை வீட்டில் தனியாக உட்கார்ந்திருப்பதில் என்ன பயன்? இது சமூக வாழ்க்கையை முற்றிலுமாக சிதைத்துவிடுகிறது.”
“Comp Off என்பது நிறுவனங்கள் தங்களின் வேலைகளை முடிப்பதற்காக ஊழியர்களை ஏமாற்றும் ஒரு தந்திரம். இது உடல் ரீதியாகவும், மன ரீதியாகவும் கடுமையான சோர்வையே தருகிறது.” “விடுமுறை நாளில் வேலை வாங்கினால் அதற்குப் பதிலாக கூடுதல் சம்பளம் (Double Pay) வழங்கப்பட வேண்டும். அப்போதுதான் நிறுவனங்கள் தேவையின்றி விடுமுறை நாட்களில் வேலை வைப்பதைத் தவிர்க்கும்.”
‘Work-Life Balance’ சாத்தியமா?
நவீன கார்ப்பரேட் கலாச்சாரத்தில் வார இறுதி வேலைகள் தவிர்க்க முடியாததாக மாறிவிட்ட சூழலில், இந்த ‘Comp Off’ முறை ஊழியர்களின் தனிப்பட்ட வாழ்க்கையை எவ்வளவு தூரம் பாதிக்கிறது என்பதை இந்தப் பதிவு வெளிச்சம் போட்டுக் காட்டியுள்ளது. நிறுவனங்கள் தங்களின் இலக்குகளை அடைவதோடு நிறுத்திக் கொள்ளாமல், ஊழியர்களின் மனநலன் மற்றும் அவர்களின் குடும்பக் கட்டமைப்பைக் கருத்தில் கொண்டு முறையான மாற்று வழிகளை யோசிக்க வேண்டும் என்பதே சமூக ஆர்வலர்களின் கருத்தாக உள்ளது. இந்த விவாதம் தற்போது லிங்க்டுஇன், எக்ஸ் (ட்விட்டர்) போன்ற தளங்களில் காட்டுத்தீயாய் பரவி வருகிறது.
தமிழகத்தில் புதிய முதலீடு: முதலமைச்சர் விஜய் உடன் BMW நிறுவனத்தின் மேலாண் இயக்குனர் (MD) சந்திப்பு!