தமிழகத்தில் த.வெ.க அரசு பதவியேற்றது முதல் பல்வேறு பகுதிகளில் நிலவும் தொடர் மின்வெட்டு மற்றும் மின்சார வாரியத்தின் நிதிநிலை கடுமையான அரசியல் சர்ச்சையை ஏற்படுத்தியுள்ளது. 
தமிழகத்தில் கடந்த மே 10-ஆம் தேதி தமிழக வெற்றிக் கழகத் (த.வெ.க) தலைமைப் பொறுப்பேற்று புதிய அரசு அமைந்தது முதலே, மாநிலத்தின் பல்வேறு பகுதிகளில் தொடர் மின்வெட்டு ஏற்படுவதாக பொதுமக்கள் தரப்பில் கடும் புகார்கள் எழுந்து வருகின்றன. குறிப்பாக, தலைநகர் சென்னையின் கொளத்தூர், பெரம்பூர் தொடங்கி புறநகர்ப் பகுதிகள் வரை தினசரி அறிவிக்கப்படாத மின்வெட்டு நிலவி வருவதால் மக்களின் இயல்பு வாழ்க்கை பெரிதும் பாதிக்கப்பட்டுள்ளது.
இந்த விவகாரத்தைக் கையில் எடுத்துள்ள எதிர்க்கட்சிகள் மற்றும் பொதுமக்கள், தற்போதைய மின்சாரத் துறை அமைச்சர் சி.டி.ஆர். நிர்மல் குமாரை, “மின்சாரத் துறை அமைச்சர் என்பதற்குப் பதிலாக மின்வெட்டுத் துறை அமைச்சர்” என்று அழைக்கும் நிலைக்குத் தள்ளப்பட்டுள்ளதாகக் காரசாரமாக விமர்சித்து வருகின்றனர்.
தொடர் மின்வெட்டுக்குக் காரணம் என்ன?
தமிழக மின்சார வாரியம் (TNPDCL) தரப்பில் மாதாந்திரப் பராமரிப்புப் பணிகள் (Maintenance works) காரணமாகவே குறிப்பிட்ட சில மணிநேரங்கள் மின் விநியோகம் நிறுத்தப்படுவதாக அதிகாரப்பூர்வமாகத் தெரிவிக்கப்பட்டாலும், உண்மை நிலை வேறு எனத் துறை சார்ந்த வல்லுநர்கள் சுட்டிக்காட்டுகின்றனர்.
மின்வாரியத்தில் நிலவும் கடுமையான ஆள் பற்றாக்குறை மற்றும் பழுதடைந்த மின்மாற்றிகள் (Transformers), வயர்கள் போன்ற உள்கட்டமைப்பு பலவீனங்களே இதற்கு முக்கியக் காரணமாகக் கூறப்படுகிறது. நடப்பு கோடைக் காலத்தில் வழக்கத்தை விட மின்சாரத்திற்கான தேவை பல மடங்கு அதிகரித்துள்ளது. போதிய முன்னேற்பாடுகள் இல்லாததால், விநியோகத்தில் கடுமையான நெருக்கடி ஏற்பட்டுள்ளது. முந்தைய அரசு திட்டமிட்டிருந்த சில உள்கட்டமைப்பு பணிகளை தற்போதைய புதிய அரசு சீரமைப்பதில் ஏற்பட்டுள்ள கால தாமதமும் ஒரு காரணமாகப் பார்க்கப்படுகிறது.
மாநிலத்தின் மின்சார பற்றாக்குறை எவ்வளவு?
மின்சாரத் துறை அமைச்சர் சி.டி.ஆர். நிர்மல் குமார் அண்மையில் வெளியிட்ட மின்வாரிய வெள்ளை அறிக்கையின்படி, தமிழக மின்சாரத் துறை பெரும் நிதி நெருக்கடியில் இருப்பது வெளிச்சத்திற்கு வந்துள்ளது.
மின்வாரியத்தின் தற்போதைய நிதி நிலை
தமிழக மின்சார வாரியத்தின் ஒட்டுமொத்தக் கடன் சுமை சுமார் ₹2.47 லட்சம் கோடியாக உயர்ந்துள்ளது. கடனுக்கான வட்டிச் சுமையே தினசரி நிர்வகிப்பை முடக்கும் அளவிற்குப் பெரிய சவாலாக மாறியுள்ளது. தமிழகத்தின் உச்சபட்ச மின் தேவை (Peak Demand) நாளுக்கு நாள் அதிகரித்து வரும் வேளையில், மத்தியத் தொகுப்பில் இருந்து பெறப்படும் மின்சாரம் மற்றும் உள்நாட்டு அனல் மின் நிலையங்களின் உற்பத்தித் திறன் ஆகியவற்றுக்கு இடையே உள்ள இடைவெளி காரணமாக, பீக் நேரங்களில் கணிசமான அளவு மின் பற்றாக்குறை ஏற்படுவதாகத் தரவுகள் கூறுகின்றன.
தற்போதைய நிலை என்ன? த.வெ.க அரசின் நடவடிக்கை
விமர்சனங்கள் தீவிரமடைந்ததை அடுத்து, மின்சாரத் துறை பல்வேறு அதிரடி நடவடிக்கைகளை அறிவித்துள்ளது.பொதுமக்களுக்குப் பெரும் நிவாரணமாக, இந்த ஆண்டிற்கான திட்டமிடப்பட்ட 3.57% மின் கட்டண உயர்வை த.வெ.க அரசு அதிகாரப்பூர்வமாக ரத்து செய்து உத்தரவிட்டுள்ளது. மின்மாற்றிகள் கொள்முதலில் நடந்த முறைகேடுகளைக் களைந்து, வெளிப்படையான ஒற்றைச் சாளர (Single Window) ஆன்லைன் முறையைக் கொண்டுவரத் திட்டமிடப்பட்டுள்ளது.
மேலும்,அடுத்த 25 முதல் 30 ஆண்டுகால தேவையை முன்னிறுத்தி, சூரிய ஒளி மற்றும் காற்று ஆலைகள் மூலம் பசுமை மின் உற்பத்தியை (Renewable Energy) அதிகரிக்க நீண்டகாலத் திட்டங்களை அரசு வகுத்து வருகிறது. ஆனாலும், தற்போதைய அறிவிக்கப்படாத மின்வெட்டுகளை உடனடியாகச் சரிசெய்து, தடையற்ற மின்சாரத்தை வழங்காவிட்டால் மக்கள் மத்தியில் த.வெ.க அரசுக்கு எதிரான அதிருப்தி மேலும் தீவிரமடையும் என்றே அரசியல் நோக்கர்கள் கருதுகின்றனர்.