அரசு ஊழியர்களுக்கு வழங்கப்பட்டு வந்த “ஊக்க ஊதிய உயர்வு” (Incentive Increment) சலுகையை ரத்து செய்த அரசின் கொள்கை முடிவு செல்லும் என்று சென்னை உயர்நீதிமன்றம் தீர்ப்பளித்துள்ளது.
தமிழக அரசுத் துறைகளில் பணியாற்றும் ஊழியர்கள் பலர், தங்களின் பணிக்காலத்தில் கூடுதல் பட்டப் படிப்புகளையோ அல்லது உயர்கல்வியையோ முடிக்கும்போது, அவர்களுக்கு ஊக்கத்தொகையாக கூடுதல் ஊதிய உயர்வு வழங்கப்பட்டு வந்தது. இதற்கிடையே, இந்த ஊக்க ஊதிய உயர்வு திட்டத்தை ரத்து செய்த தமிழக அரசு, அதற்குப் பதிலாக கூடுதல் கல்வித்தகுதி பெறும் ஊழியர்களுக்கு “ஒரே முறை மட்டும் வழங்கப்படும் ஒரு தவணை ஊக்கத்தொகை” (Lump-sum Incentive) திட்டத்தை புதிய கொள்கையாக அறிமுகப்படுத்தியது.
அரசின் இந்த புதிய அரசாணையை எதிர்த்தும், பழையபடி ஊக்க ஊதிய உயர்வையே தொடர வேண்டும் எனக் கோரியும் பல்வேறு அரசுத் துறை ஊழியர்கள் தரப்பில் சென்னை உயர்நீதிமன்றத்தில் தொடர் வழக்குகள் தாக்கல் செய்யப்பட்டன.
உயர்நீதிமன்றத்தின் தீர்ப்பு:
இந்த வழக்குகளை விசாரித்த சென்னை உயர்நீதிமன்ற நீதிபதிகள் எஸ்.எம். சுப்பிரமணியம் மற்றும் ஆர். கலைமதி ஆகியோர் அடங்கிய அமர்வு (Bench) விசாரித்து வந்த நிலையில் இன்று முக்கிய தீர்ப்பளித்துள்ளது. நீதிபதிகள் தங்களது உத்தரவில் குறிப்பிட்டதாவது: ”அரசு ஊழியர்களுக்கு வழங்கப்படும் சலுகைகள் மற்றும் ஊக்கத்தொகைகள் குறித்து முடிவெடுப்பது அரசின் கொள்கை சார்ந்த விஷயமாகும். நிதிநிலை மற்றும் நிர்வாகத் தேவைகளைக் கருத்தில்கொண்டு அரசு எடுத்த இந்த கொள்கை முடிவை சட்டவிரோதமானது என்று கூறிவிட முடியாது.
சலுகைகள் என்பது ஊழியர்களின் சட்டப்பூர்வமான உரிமைகள் அல்ல. எனவே, ஒரு சலுகையை அரசு ரத்து செய்த பிறகு, அதை மீண்டும் தங்களுக்கு வழங்க வேண்டும் என்று அரசு ஊழியர்கள் தங்களின் உரிமையாகக் கோர சட்டத்தில் இடமில்லை.
அரசின் கொள்கை முடிவுகளில் நீதிமன்றங்கள் தன்னிச்சையாகத் தலையிட முடியாது என்பதைச் சுட்டிக்காட்டிய நீதிபதிகள் அமர்வு, ஊழியர்கள் தரப்பில் தாக்கல் செய்யப்பட்ட அனைத்து மனுக்களையும் தள்ளுபடி செய்து வழக்குகளை முடித்து வைத்தது. இத்தீர்ப்பு, சலுகைகள் என்பது உரிமைகள் அல்ல, அவை அரசின் கொள்கை முடிவுகளுக்கு உட்பட்டவை என்பதை மீண்டும் உறுதிப்படுத்தியுள்ளது.