உத்தரப் பிரதேச மாநிலம் அயோத்தியில் உள்ள புகழ்பெற்ற ஸ்ரீ ராமர் கோயிலில், பக்தர்களின் காணிக்கை மற்றும் நன்கொடைப் பணம் கோடிக்கணக்கில் மோசடி செய்யப்பட்டுள்ளதாக எழுந்த புகாரைத் தொடர்ந்து, அங்குப் பரபரப்பு உச்சகட்டத்தை எட்டியுள்ளது. இம்முறைகேடு தொடர்பாக மாநில அரசின் சிறப்பு விசாரணைக் குழு (SIT) தீவிர விசாரணை நடத்தி வரும் நிலையில், கோயிலின் காணிக்கை எண்ணும் பணியில் ஈடுபட்டிருந்த ஊழியர்களில் 50 சதவீதத்திற்கும் அதிகமானோர் தங்களது வேலைகளைத் திடீரென ஒட்டுமொத்தமாக ராஜினாமா செய்துள்ளனர்.
கோயில் அறக்கட்டளையின் முக்கிய நிர்வாகிகளின் பதவி விலகலைத் தொடர்ந்து, தற்போது காணிக்கை எண்ணும் கீழ்நிலை ஊழியர்களும் நாற்காலிகளை காலி செய்திருப்பது தேசிய அளவில் பெரும் பரபரப்பை ஏற்படுத்தியுள்ளது.
விஸ்வரூபம் எடுத்த காணிக்கை மோசடி
அயோத்தி ராமர் கோயிலுக்குத் தினந்தோறும் இந்தியாவிலிருந்தும் உலக நாடுகளிலிருந்தும் லட்சக்கணக்கான பக்தர்கள் வந்து கோடிக்கணக்கில் காணிக்கை செலுத்தி வருகின்றனர். இந்நிலையில், பக்தர்களின் காணிக்கைப்பணம் வங்கிகளில் முழுமையாகச் செலுத்தப்படாமல், நடுவிலேயே பெருமளவில் கையாடல் செய்யப்பட்டு சதித்திட்டத்தின் மூலம் திருடப்பட்டதாகப் புகார் எழுந்தது.
இந்த வழக்கை உபி அரசின் சிறப்பு விசாரணைக் குழு (SIT) கையில் எடுத்தது. முதற்கட்ட விசாரணையின் அடிப்படையில், காணிக்கை எண்ணும் பணியில் ஈடுபட்டிருந்த ஊழியர்கள் மற்றும் கையாளுதலுக்குப் பொறுப்பானவர்கள் என இதுவரை 8-க்கும் மேற்பட்டோர் அதிரடியாகக் கைது செய்யப்பட்டுள்ளனர்.
விசாரணைக் குழுவின் அதிரடி கண்டுபிடிப்புகள்
எஸ்ஐடி நடத்திய தீவிர விசாரணையில், கோயில் காணிக்கைப் பெட்டிகளைப் பராமரிப்பதிலும், எண்ணுவதிலும் ஒவ்வொரு நிலையிலும் கடுமையான பாதுகாப்பு விதிமீறல்களும், அலட்சியங்களும் அரங்கேறியிருப்பது வெளிச்சத்திற்கு வந்துள்ளது:
வழிகாட்டுதல்கள் இன்றி தனியார் ஊழியர்கள்: ஸ்ரீராமஜென்மபூமி தீர்த்த ஷேத்ரா அறக்கட்டளையின் வங்கிப் பணிகளைக் கவனிக்கும் ஸ்டேட் பேங்க் ஆஃப் இந்தியா (SBI), பணத்தை எண்ணுவதற்காக வாரணாசியைச் சேர்ந்த ஒரு தனியார் பாதுகாப்பு நிறுவனத்துடன் ஒப்பந்தம் செய்திருந்தது. அந்த நிறுவனம் முறையான சோதனையின்றி, அறக்கட்டளைக்கு நெருக்கமானவர்களின் பரிந்துரையின் பேரில் பல இளைஞர்களைப் பணிகளை எண்ண நியமித்துள்ளது.
சோதனையும் இல்லை, சீருடையும் இல்லை: பணத்தை எண்ணும் அறைக்குள் செல்லும் ஊழியர்களுக்கு முறையான வருகை பதிவேடோ, உடல் சோதனையோ நடத்தப்படவில்லை. ஊழியர்கள் தங்களுக்கு வழங்கப்பட்ட பிரத்யேகச் சீருடைகளை அணியாமல், தங்களின் அன்றாட சொந்த உடைகளிலேயே அமர்ந்து பணத்தை எண்ணியுள்ளனர். யார் எதை உள்ளே கொண்டு வருகிறார்கள் அல்லது வெளியே எடுத்துச் செல்கிறார்கள் என்ற எந்தக் கண்காணிப்பும் இருந்திருக்கவில்லை.
சிசிடிவி கேமராக்களுக்கு முன்பே திருட்டு: மேலும் அதிர்ச்சியூட்டும் தகவலாக, ஊழியர்கள் சிலர் சிசிடிவி கேமராக்களுக்கு முன்னால் நின்று கொண்டே காணிக்கைப் பணத்தைத் திருடியதும் விசாரணைக் குழுவின் ஆய்வில் கண்டுபிடிக்கப்பட்டுள்ளது.
உச்சகட்ட பயம்: 50% ஊழியர்கள் திடீர் ராஜினாமா!
இந்த முறுகேடு அம்பலமாகி எஸ்ஐடி அதிகாரிகள் விசாரணை வளையத்தை இறுக்கியதைத் தொடர்ந்தே, காணிக்கை எண்ணும் மையத்தில் ஊழியர்களிடையே பெரும் பயம் தொற்றிக் கொண்டது. சுமார் 40 ஊழியர்கள் பணியாற்றி வந்த இந்த மையத்தில், விசாரணைக்கு அஞ்சி முதலில் 15 முதல் 20 பேர் மட்டுமே பணிக்கு வரத் தொடங்கினர்.
தற்போது, அவர்களில் 20-க்கும் மேற்பட்ட ஊழியர்கள் தங்களது பதவிகளை அதிகாரப்பூர்வமாக ராஜினாமா செய்துள்ளனர். இதனால், காணிக்கை எண்ணும் ஊழியர்களின் எண்ணிக்கை வெறும் 12 ஆகக் குறைந்துள்ளது.
ஊழியர்கள் முன்வைக்கும் புகார்கள் என்ன?
விசாரணை வளையத்திற்கு அஞ்சி அவர்கள் விலகியதாகக் கூறப்பட்டாலும், ராஜினாமா செய்த ஊழியர்கள் நிர்வாகத்தின் மீது அடுக்கடுக்கான குற்றச்சாட்டுகளை முன்வைத்துள்ளனர். ”மோசடி விவகாரம் வெளியான பிறகு பாதுகாப்பு மற்றும் கண்காணிப்பு கெடுபிடிகள் கடுமையாக்கப்பட்டுள்ளன. முன்பு இரண்டு ஷிப்டுகளாக (Shifts) நடந்த வேலை, தற்போது ஒரே ஷிப்ட்டாகக் குறைக்கப்பட்டு, ஒரு நாளைக்கு 9 முதல் 10 மணி நேரம் வரை தொடர்ந்து வேலை வாங்கப்படுகிறது. ஆனால், அதற்கேற்ற ஊதிய உயர்வு எதுவும் வழங்கப்படவில்லை.
மேலும், முன்பு மேஜை மற்றும் நாற்காலிகளில் அமர்ந்து பணத்தை எண்ணிய எங்களை, இப்போது தரையில் உட்கார்ந்து பணத்தை எண்ணச் சொல்கிறார்கள். இது கடுமையான உடல் உபாதைகளை ஏற்படுத்துகிறது” என்று தங்களது மெமோராண்டத்தில் ஊழியர்கள் குறிப்பிட்டுள்ளனர்.
தணிக்கை கோரி அலகாபாத் நீதிமன்றத்தில் வழக்கு
இந்த விவகாரத்தில் பல முக்கியப் புள்ளிகளுக்குத் தொடர்பு இருக்கலாம் எனக் கருதப்படும் நிலையில், ஸ்ரீ ராமர் கோவில் அறக்கட்டளையின் விதிமுறைகளின்படி அதன் முக்கிய நிர்வாகிகளான பொதுச்செயலாளர் சம்பத் ராய் மற்றும் அனில் மிஸ்ரா ஆகியோரின் ராஜினாமாக்கள் ஏற்கனவே அறக்கட்டளையால் ஏற்றுக்கொள்ளப்பட்டுள்ளன.
இதற்கிடையே, லட்சக்கணக்கான பக்தர்களின் நம்பிக்கை சார்ந்த இந்த நிதி முறைகேடு குறித்து மத்திய புலனாய்வுத் துறை (CBI) விசாரணை நடத்த வேண்டும் என்றும், மத்திய தலைமைத் தணிக்கையாளர் (CAG) மூலம் முழுமையான தணிக்கை நடத்தப்பட வேண்டும் என்றும் கோரி அலகாபாத் உயர் நீதிமன்றத்தின் லக்னோ அமர்வில் பொதுநல வழக்கு ஒன்று தாக்கல் செய்யப்பட்டுள்ளது. இந்த வழக்கு விரைவில் விசாரணைக்கு வரவுள்ளதால், அயோத்தி விவகாரம் தேசிய அரசியலிலும் ஆன்மீக வட்டாரத்திலும் தொடர்ந்து அனலைக் கிளப்பி வருகிறது.