கன்னியாகுமரி மாவட்டம் நாகர்கோவில் மாவட்ட சிறையில் அடைக்கப்பட்டிருந்த சபரி வர்மன் என்ற விசாரணை கைதி, சிறைக்குள் கொடூரமாக அடித்துக் கொலை செய்யப்பட்ட சம்பவம் தமிழகம் முழுவதும் பெரும் அதிர்வலைகளை ஏற்படுத்தியுள்ளது. இக்கொலை வழக்கு தொடர்பாக முதன்மை சிறை வார்டன் உட்பட 3 சிறைத்துறையினரும், 8 கைதிகளும் அதிரடியாகக் கைது செய்யப்பட்டுள்ளனர்.
கன்னியாகுமரி மாவட்டம் சாமிதோப்பு அருகே உள்ள வடக்கு தாமரைகுளம், ஈத்தங்காடு பகுதியைச் சேர்ந்தவர் சபரி வர்மன் (33). இவர் தனது வீட்டின் அருகே பெட்டிக்கடை நடத்தி வந்தார். கடந்த 9-ஆம் தேதி தென்தாமரைகுளம் போலீசார் நடத்திய சோதனையில், இவரது கடையில் தடை செய்யப்பட்ட குட்கா புகையிலை பொருட்கள் இருந்தது கண்டறியப்பட்டது. இதையடுத்து போலீசார் அவரைத் கைது செய்து, நாகர்கோவில் மாவட்ட சிறையில் அடைத்தனர். இந்நிலையில், கடந்த 13-ஆம் தேதி காலை சபரி வர்மன் சிறையிலேயே உயிரிழந்துவிட்டதாக அவரது குடும்பத்தினருக்குத் தகவல் தெரிவிக்கப்பட்டது. அவரது உடல் பிரேதப் பரிசோதனைக்காக ஆசாரிப்பள்ளம் அரசு மருத்துவக் கல்லூரி மருத்துவமனைக்குக் கொண்டு செல்லப்பட்டது.
உடம்பில் 19 காயங்கள் – அம்பலமான கொடூரம்
தகவலறிந்து மருத்துவமனையில் திரண்ட சபரி வர்மனின் மனைவி ஆனந்தவல்லி மற்றும் உறவினர்கள், அவரது மரணத்தில் சந்தேகம் இருப்பதாகக் கூறி சாலை மறியலில் ஈடுபட்டனர். மாவட்ட போலீஸ் சூப்பிரண்டு (SP) ஸ்டாலின் நடத்திய பேச்சுவார்த்தைக்குப் பிறகு போராட்டம் தற்காலிகமாகக் கைவிடப்பட்டது. இதற்கிடையில், நாகர்கோவில் 2-வது குற்றவியல் நீதித்துறை நடுவர் (Magistrate) சத்தியமூர்த்தி, உயிரிழந்த கைதியின் மனைவி மற்றும் உறவினர்களிடம் நேரில் விசாரணை நடத்தினார். பின்னர் அவர் மாவட்ட சிறைச்சாலைக்கும் சென்று விசாரணை மேற்கொண்டார். இதனைத் தொடர்ந்து, ஆசாரிப்பள்ளம் மருத்துவமனையில் நடைபெற்ற பிரேதப் பரிசோதனை முடிவுகள் வெளியாகி அதிர்ச்சியை ஏற்படுத்தின. சபரி வர்மனின் உடலில் முகம், முதுகு என மொத்தம் 19 இடங்களில் பலத்த காயங்கள் இருந்தது உறுதி செய்யப்பட்டது. இதன் மூலம் அவர் சிறைக்குள் அடித்துக் கொலை செய்யப்பட்டது அம்பலமானது.
சிறை வார்டன்கள் மற்றும் 8 கைதிகள் கைது
இக்கொலைச் சம்பவம் தொடர்பாக நேசமணி நகர் போலீசார் கொலை வழக்குப் பதிவு செய்து தீவிர விசாரணை நடத்தினர். முதற்கட்ட விசாரணையில், கடந்த 12-ஆம் தேதி இரவு சிறையில் சபரி வர்மன் சத்தம் போட்டதாகக் கூறி, அவருக்கும் சக கைதிகளுக்கும் இடையே தகராறு ஏற்பட்டுள்ளது. அப்போது சக கைதிகள் மற்றும் சிறைத்துறையினர் அவரைத் தாக்கியது தெரியவந்தது. இதையடுத்து, இக்கொலை வழக்கில் தொடர்புடைய நாகர்கோவில் சிறைச்சாலையின் முதன்மை சிறை வார்டன் திருமலை நம்பி (களக்காடு), வார்டன் ஜெகன் (தேங்காய்பட்டணம்), வார்டன் சிவகுமார் (சாமியார்மடம்) ஆகிய 3 பேரையும் நேசமணி நகர் போலீசார் நேற்று இரவு அதிரடியாகக் கைது செய்தனர். மேலும், இந்தத் தாக்குதலில் ஈடுபட்ட சிறைக்கைதிகளான விஷ்ணு (21), சாரதி (19), ஜெகன் (40), சரத், பெருமாள், சேதுராம் (30), அஜித் (29), அரவிந்த் (27) ஆகிய 8 கைதிகள் மீதும் கொலை வழக்குப்பதிவு செய்யப்பட்டு, அவர்கள் அனைவரும் முறைப்படி கைது செய்யப்பட்டுள்ளனர்.
உடலை வாங்க மறுத்து 3-ஆவது நாளாகப் போராட்டம்
கொலையாளிகள் கைது செய்யப்பட்ட போதிலும், சபரி வர்மனின் மரணத்திற்குப் பூரண நீதி கிடைக்க வேண்டும், அவரது குடும்பத்திற்கு அரசு வேலை மற்றும் உரிய நிவாரணத் தொகை வழங்கப்பட வேண்டும் என்று வலியுறுத்தி அவரது உறவினர்கள் உடலைப் பெற்றுக்கொள்ள மறுத்துவிட்டனர். இன்று 3-ஆவது நாளாக ஆசாரிப்பள்ளம் மருத்துவமனை வளாகத்தில் உறவினர்கள் தங்களின் தொடர் போராட்டத்தை முன்னெடுத்து வருகின்றனர். இப்போராட்டத்திற்கு ஆதரவாகப் பல்வேறு அரசியல் கட்சியினரும் சமூக அமைப்புகளும் திரண்டு வருவதால், அங்கு எந்தவித அசம்பாவிதங்களும் ஏற்படாமல் தடுக்க நூற்றுக்கணக்கான போலீசார் குவிக்கப்பட்டு பலத்த பாதுகாப்புப் போடப்பட்டுள்ளது. சிறைச்சாலையிலேயே கைதி ஒருவர் அடித்துக் கொலை செய்யப்பட்ட இந்தச் சம்பவத்திற்கு அதிமுக, திமுக உள்ளிட்ட பல்வேறு அரசியல் கட்சிகளின் தலைவர்களும் தங்களது கடுமையான கண்டனங்களைப் பதிவு செய்துள்ளனர்.