தமிழக அரசு கொண்டு வந்துள்ள லஞ்சத்திற்கு எதிரான நடவடிக்கைகளுக்கு ஆதரவு தெரிவிக்கும் வகையில், காங்கிரஸ் கட்சி சார்பில் சிவகங்கை மாவட்டம் திருப்பத்தூர் பேருந்து நிலையம் எதிரே உள்ள காந்தி சிலை அருகே “லஞ்சம் தவிர், லஞ்சம் நிமிர்” என்ற தலைப்பில் கையெழுத்து இயக்கம் நடைபெற்றது. இதனை சிவகங்கை நாடாளுமன்ற உறுப்பினர் கார்த்தி சிதம்பரம் காந்தி சிலைக்கு மாலை அணிவித்து, மரியாதை செலுத்தி முறைப்படி தொடங்கி வைத்தார்.
அதன் பின்னர் செய்தியாளர்களைச் சந்தித்த அவர், பல்வேறு அரசியல் மற்றும் சமூக விவகாரங்கள் குறித்து தனது கருத்துக்களைப் பகிர்ந்து கொண்டார். அவர் பேசியதன் முக்கிய அம்சங்கள் பின்வருமாறு:
திமுகவுக்கு பா.ஜ.க. ஆசைவார்த்தை? கார்த்தி சிதம்பரம் எச்சரிக்கை:
“2029-இல் சட்டமன்ற தேர்தல் வரும் என்றும், ‘ஒரே நாடு ஒரே தேர்தல்’ திட்டத்தை ஆதரிக்க வேண்டும் என்றும் திமுகவிடம் பாஜக பேச்சுவார்த்தையைத் தொடங்கிவிட்டது. திமுகவிற்கு அவர்கள் ஆசைவார்த்தை கூறி வருகிறார்கள். ஒருவேளை திமுக அந்தப் பாதையில் சென்றால், கடந்த தேர்தலில் கிடைத்த நிலையை விட மிக மோசமான நிலையைத்தான் அவர்கள் சந்திக்க நேரிடும்.”
தவெக ஆட்சி மற்றும் கட்சித் தாவல் குறித்த கருத்து:
தமிழக அரசியல் சூழல் மற்றும் தமிழக வெற்றிக் கழகம் (தவெக) குறித்துப் பேசிய அவர்:
தவெக-வின் பலம்: “என்னை பொறுத்தவரை தவெக நல்ல மெஜாரிட்டியாக (பெரும்பான்மையுடன்) இருக்கிறது. அவர்கள் 5 ஆண்டுகள் தாராளமாக ஆட்சி நடத்தலாம். அவர்களை விட்டு யாரும் போகப்போவதில்லை; அவர்கள் யாரையும் தங்களது கூட சேர்த்துக்கொள்ள வேண்டும் என்ற அவசியமும் இல்லை.”
இடைத்தேர்தல் தவிர்ப்பு: மற்றொரு கட்சியில் இருந்து ஒருவரை ராஜினாமா செய்ய வைத்து, அதன் மூலம் இடைத்தேர்தலைத் திணிப்பது தவிர்க்கப்பட வேண்டிய ஒன்று.
கூட்டணி கட்சிகள் குறித்து: கூட்டணி கட்சிகளில் இருந்து நிர்வாகிகள் மாறுவது குறித்து தவெக ஒரு கொள்கை முடிவு எடுக்க வேண்டும். “கூட்டணி கட்சிகளில் இருந்து யார் வந்தாலும் அவர்களைச் சேர்த்துக் கொள்ளக் கூடாது” என்ற கொள்கை முடிவை தவெக தலைவரும், முதல்வரும் எடுக்க வேண்டும் என்றார்.
போலீஸ் கஸ்டடி மரணங்கள் & கவுன்சிலிங் தேவை:
சமீபகால கஸ்டடி மரணங்கள் குறித்த கேள்விக்கு பதிலளித்த அவர், “எல்லா அரசாங்கத்திலும் கஸ்டடி மரணங்கள் நிகழ்கின்றன. இதற்காக நான் அரசாங்கத்தைக் குற்றம் சொல்ல மாட்டேன். ஆனால், மக்களை அடக்க வேண்டும், ஒடுக்க வேண்டும் என்ற மனநிலையை போலீஸார் கொண்டுள்ளனர். இந்த நிலை மாற வேண்டுமானால், டிஜிபி முதல் காவலர்கள் வரை அனைவருக்கும் உரிய கவுன்சிலிங் கொடுக்கப்பட வேண்டும்” என்று வலியுறுத்தினார்.
இதர முக்கியக் கருத்துக்கள்:
அனிதா ராதாகிருஷ்ணனின் ‘ஆட்சி மாற்றம்’ பேச்சு: “இன்னும் 6 மாதங்களில் ஆட்சி மாற்றம் வரும்” என திமுக நிர்வாகி அனிதா ராதாகிருஷ்ணன் கூறியிருப்பது குறித்த கேள்விக்கு, “கற்பனை யார் வேண்டுமானாலும் காணலாம், கலர் கலராகக் கற்பனை காணட்டும்” என்று கிண்டலாகப் பதிலளித்தார்.
காவிரி நீர் விவகாரம்: காங்கிரஸ் ஒரு தேசியக் கட்சி என்பதால், காவிரி விவகாரத்தில் எல்லா மாநிலங்களிலும் ஒரே மாதிரியான கருத்தைக் கொண்டிருக்க வேண்டிய அவசியம் இல்லை என விளக்கமளித்தார்.
தமிழ்நாடு தினம்: “தமிழ்நாடு தினம் கொண்டாடப்படுவது குறித்து எனக்கு எவ்வித ஆர்வமும் இல்லை. நாட்டில் நாய் கடி மற்றும் விபத்துக்கள் குறையுமா என்றுதான் நான் பார்க்கிறேனே தவிர, இன்று பிறந்தநாளா, இறந்தநாளா அல்லது அனுசரிக்கும் நாளா என்று பார்ப்பதில்லை” என்றார்.
சீமான் குறித்து: நாம் தமிழர் கட்சியின் ஒருங்கிணைப்பாளர் சீமான் குறித்துப் பேசுகையில், “தனியாகவே பேட்டிங் செய்து செய்து அவர் எவ்வளவு நாள்தான் தோற்றுப் போவார்? பிறருடன் சேர்ந்து பேட்டிங் செய்ய ஆசைப்பட்டால்தான் ‘பிராக்டிகல் பாலிடிக்ஸ்’ (நடைமுறை அரசியல்) சாத்தியப்படும். அவருக்கு என் நல்வாழ்த்துகள்” என்று கார்த்தி சிதம்பரம் தெரிவித்தார்.