காதலனுடன் சேர்ந்து கணவரைக் கொலை செய்யத் திட்டம்: முன்கூட்டியே கண்டறிந்து கையும் களவுமாகப் பிடித்த கணவர்! – சித்தூரில் பரபரப்பு சம்பவம்

ஆந்திர மாநிலம், சித்தூர் மாவட்டம் குடுபள்ளி மண்டலம் குடிகோத்தூரைச் சேர்ந்தவர் சிரஞ்சீவி. இவருக்கும், சாந்திபுரம் மண்டலம் ரிசின் கொல்லப்பள்ளியைச் சேர்ந்த ஷோபா என்பவருக்கும் கடந்த பத்து ஆண்டுகளுக்கு முன்பு திருமணம் நடைபெற்றது. இவர்களுக்கு ஒரு மகனும், ஒரு மகளும் உள்ளனர்.

தவறான உறவும், கணவரைப் பிரிதலும்

சில மாதங்களுக்கு முன்பு ‘தவறான எண்’ (Wrong Call) மூலம் குண்டூர் மாவட்டம் கந்திரிகா கிராமத்தைச் சேர்ந்த பாலாஜி நாயக் என்பவருடன் ஷோபாவுக்குப் பழக்கம் ஏற்பட்டுள்ளது. நாளடைவில் இந்தப் பழக்கம் திருமணத்தை மீறிய உறவாக மாறியது. காதலன் மீது தீவிர மோகம் கொண்ட ஷோபா, கடந்த ஒரு மாதத்திற்கு முன்பு தன் கணவரையும் குழந்தைகளையும் தவிக்கவிட்டுவிட்டு பாலாஜி நாயக்குடன் ஓட்டம் பிடித்தார். இதுகுறித்து சிரஞ்சீவி குடுபள்ளி காவல் நிலையத்தில் புகாரும் அளித்திருந்தார்.

கொடூரக் கொலைத் திட்டம்

இதற்கிடையே, தன் கணவர் சிரஞ்சீவி உயிரோடு இருந்தால் காதலனுடன் நிம்மதியாக வாழ முடியாது என்று ஷோபா கருதியுள்ளார். எனவே, தன் கணவரைக் தீர்த்துக்கட்ட அவர் கொடூரத் திட்டம் தீட்டியுள்ளார். அன்னமய்யா மாவட்டத்தில் பதுங்கியிருந்து, தனது காதலனுடன் இணைந்து கணவரைக் கொலை செய்வதற்கான சதித் வேலைகளில் ஷோபா ஈடுபட்டு வந்துள்ளார்.

உஷாரான கணவரும், அதிரடிப் பிடியும்

தன் உயிருக்கும், தங்களது குழந்தைகளின் எதிர்காலத்திற்கும் பேராபத்து இருப்பதை உணர்ந்த கணவர் சிரஞ்சீவி, சற்றும் தாமதிக்காமல் பாதுகாப்பான இடத்தில் இருந்தபடியே மனைவியின் இருப்பிடத்தைத் தீவிரமாகத் தேடத் தொடங்கினார்.

விசாரணையில், ஷோபாவும் பாலாஜி நாயக்கும் பெங்கிலபள்ளியில் குடியேறியிருப்பதைக் கண்டறிந்த சிரஞ்சீவி, அவர்கள் இருவரும் குப்பத்தில் உள்ள திருப்பதி கங்கம்மா கோவிலில் ரகசியமாகத் திருமணம் செய்துகொண்ட தகவலையும் அறிந்த அதிர்ச்சியடைந்தார். உடனே விழிப்புணர்வுடன் செயல்பட்ட அவர், உறவினர்கள் மற்றும் உள்ளூர் மக்களின் உதவியுடன் அந்த ஜோடியைக் கையும் களவுமாகப் பிடித்தார்.

பஞ்சாயத்தில் அம்பலமான சதி

கிராமத்தில் உள்ள கோவிலில் பெரியவர்கள் முன்னிலையில் பஞ்சாயத்து கூட்டப்பட்டு அவர்களிடம் விசாரணை நடத்தப்பட்டது. அப்போது, தனது கணவர் சிரஞ்சீவியை கொலை செய்வதற்காகவே ஷோபா தன்னை இங்கு அழைத்து வந்ததாகக் காதலன் பாலாஜி நாயக் அனைவர் முன்னிலையிலும் ஒப்புக்கொண்டார்.

சரியான நேரத்தில் விழித்துக்கொண்டு துரிதமாகச் செயல்பட்டதன் மூலம் சிரஞ்சீவி தன் உயிரைக் காப்பாற்றிக் கொண்டார். இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.

காவல் துறையினர் மீது மக்கள் கடும் அதிருப்தி

இந்தச் சம்பவம் குறித்துத் தகவல் அறிந்த குப்பம் டிஎஸ்பி பார்த்தசாரதி தீவிர விசாரணை நடத்தி வருகிறார். இதனிடையே, ஷோபா காணாமல் போனதாகப் புகார் அளிக்கப்பட்டபோது காவல்துறையினர் வழக்கை தீவிரமாக எடுத்துக்கொள்ளவில்லை என்றும், தற்போது காணாமல் போனவர் கண்டுபிடிக்கப்பட்ட பின்னரும் உரிய சட்ட நடவடிக்கை எடுக்கத் தயங்குவதாகவும் அப்பகுதி மக்களிடமும் கிராமப் பெரியவர்களிடமும் கடும் விமர்சனமும் எதிர்ப்பும் எழுந்துள்ளது.