ஏழை, எளிய மற்றும் விவசாயக் கூலித் தொழிலாளர்களின் பிள்ளைகள் மருத்துவராகக் கூடாது என்பதற்காகவே மத்திய பாஜக அரசு நீட் தேர்வைக் கொண்டு வந்துள்ளதாகத் திராவிடக் கழகத்தின் துணைப் பொதுச்செயலாளர் மதிவதனி குற்றம்சாட்டியுள்ளார்.
இருசக்கர வாகனப் பரப்புரை
திருவாரூர் மாவட்டம், மன்னார்குடியில் பெரியார் சிலை முன்பு திராவிடக் கழக இளைஞரணி, திராவிடர் மாணவர் கழகம் மற்றும் திராவிட மகளிர் பாசறை இணைந்து நடத்தும் தமிழ்நாடு-புதுச்சேரி தழுவிய இருசக்கர வாகனப் பரப்புரைப் பயணத்தின் தொடக்க விழா நடைபெற்றது.
இக்கூட்டத்தில், நீட் தேர்வையும் உயர் சாதியினருக்கான EWS இட ஒதுக்கீட்டையும் உடனடியாக ரத்து செய்ய வேண்டும் என வலியுறுத்தி முழக்கங்கள் எழுப்பப்பட்டன. தொடர்ந்து பரப்புரைப் பேரணியைக் கொடியசைத்துத் தொடங்கி வைத்து திராவிடக் கழகத் துணைப் பொதுச்செயலாளர் மதிவதனி சிறப்புரையாற்றினார்.
மதிவதனி பேசியதன் முக்கிய அம்சங்கள்:
சதித் தேர்வு: மக்கள் நோய் நொடியின்றி வாழ மருத்துவத்துறை சிறப்பாகச் செயல்பட வேண்டும். ஆனால், ஏழை எளிய கூலித் தொழிலாளர்களின் பிள்ளைகள் மருத்துவராவதைத் தடுக்கவே நீட் என்ற சூதாட்டத்தை பாஜக அரசு கொண்டு வந்துள்ளது. இது மாணவர்களின் திறமையைச் சோதிக்கும் தேர்வு அல்ல; அவர்களை அறியாமையில் வைப்பதற்கான திட்டமிட்ட சதித் தேர்வாகும்.
பயிற்சி மையங்களின் சுரண்டல்: பெற்றோர்கள் தங்களின் நிலங்களை விற்று, பல லட்சம் ரூபாய் செலவு செய்து குழந்தைகளைப் பயிற்சி மையங்களில் படிக்க வைக்கின்றனர். மோடி அரசின் நெருங்கிய நண்பர்கள் நாடு முழுவதும் திறந்துள்ள நீட் பயிற்சி மையங்களில் பல லட்சம் கட்டணம் வசூலிக்கப்பட்டு மாணவர்கள் தொடர் துயரத்திற்கு ஆளாகிறார்கள்.
நீட் இல்லாத காலம் வரும்: மாணவர்களின் இந்த அவல நிலைக்கு முடிவு கட்டவே இந்த இருசக்கர வாகனப் பேரணி தொடங்கப்பட்டுள்ளது. வரும் காலத்தில் நீட் என்ற தேர்வே இல்லாத நிலை உருவாகும்.
இந்நிகழ்ச்சியில் திராவிடக் கழகத் தோழர்கள், மாணவர்கள் மற்றும் பொதுமக்கள் ஏராளமானோர் கலந்துகொண்டு ஒன்றிய அரசுக்கு எதிராகக் கண்டன முழக்கங்களை எழுப்பினர்.
மதுரை பெண்ணுடன் காதல்.. அப்புறம் என்னாச்சு?.. வீரவநல்லூர் காவல் ஆய்வாளர் சஸ்பெண்ட் பின்னணி!