தமிழ்நாடு அரசுக்கு உயர்நீதிமன்ற மதுரை கிளை சரமாரி கேள்விகள் — பிரமாணப் பத்திரம் தாக்கல் செய்ய உத்தரவு!
தூத்துக்குடியில் நடைபெற்ற ஸ்டெர்லைட் எதிர்ப்புப் போராட்டத்தின் போது நிகழ்ந்த துப்பாக்கிச்சூடு சம்பவம் தொடர்பான அருணா ஜெகதீசன் ஆணையத்தின் பரிந்துரைகள் மீது எடுக்கப்பட்ட நடவடிக்கைகள் என்னென்ன என்பது குறித்து அறிக்கை தாக்கல் செய்ய தமிழ்நாடு அரசுக்கு உயர்நீதிமன்ற மதுரை கிளை உத்தரவிட்டுள்ளது.
உயர்நீதிமன்றத்தின் அதிரடி கேள்விகள்:
மதுரையைச் சேர்ந்த கதிரேசன் உள்ளிட்ட பலர் தாக்கல் செய்த மனுக்கள், நீதிபதிகள் சி.வி.கார்த்திகேயன் மற்றும் சக்திவேல் ஆகியோர் அடங்கிய அமர்வு முன்பு விசாரணைக்கு வந்தன.
விசாரணையின் போது நீதிபதிகள் அமர்வு முன்வைத்த முக்கிய கேள்விகள்:
ஆணைய அறிக்கை ஏற்பா ஓய்வுபெற்ற நீதிபதி அருணா ஜெகதீசன் தலைமையிலான விசாரணை ஆணையத்தின் அறிக்கையைத் தமிழ்நாடு அரசு முழுமையாக ஏற்றுக் கொள்கிறதா அல்லது இல்லையா?
பரிந்துரைகளின் நிலை:
ஆணையம் அளித்த பரிந்துரைகளின் அடிப்படையில் இதுவரை எடுக்கப்பட்ட துறை ரீதியான நடவடிக்கைகள் என்னென்ன?
இழப்பீடு & வேலைவாய்ப்பு:
பாதிக்கப்பட்ட குடும்பங்களுக்கு வழங்கப்பட்ட இழப்பீடுகள் மற்றும் அரசு வேலைவாய்ப்புகளின் தற்போதைய நிலை என்ன என்பது குறித்து அரசு தெளிவுபடுத்த வேண்டும்.
மனுதாரர் தரப்பு:
துப்பாக்கிச்சூடு சம்பவத்திற்குப் பொறுப்பான சம்பந்தப்பட்ட அதிகாரிகள் மீது ஆணையத்தின் பரிந்துரைப்படி உடனடியாகக் குற்றவியல் மற்றும் துறை ரீதியான நடவடிக்கைகள் எடுக்கப்பட வேண்டும்; பாதிக்கப்பட்ட மக்கள் நீதி கேட்டு பல ஆண்டுகளாகக் காத்திருக்கின்றனர் என வாதிடப்பட்டது.
அரசு தரப்பு பதில்:
ஆணையத்தின் பரிந்துரைகள் பகுதியளவில் ஏற்றுக்கொள்ளப்பட்டு, அமைச்சரவைக் கூட்டத்தில் விவாதிக்கப்பட்டு பரிசீலனையில் இருந்து வருகிறது. இது தொடர்பான முழுமையான விவரங்களைச் சமர்ப்பிக்கக் கூடுதல் கால அவகாசம் தேவை என அரசு தரப்பில் கோரப்பட்டது.
வழக்கு ஒத்திவைப்பு:
அரசு தரப்பின் கோரிக்கையை ஏற்றுக்கொண்ட நீதிபதிகள், அருணா ஜெகதீசன் ஆணையத்தின் பரிந்துரைகள், பாதிக்கப்பட்டவர்களுக்கு வழங்கப்பட்ட இழப்பீடு, அரசு வேலைவாய்ப்பு விவரங்கள் மற்றும் துறை ரீதியான நடவடிக்கைகள் குறித்த அனைத்து விவரங்களையும் உள்ளடக்கிய விரிவான பிரமாணப் பத்திரத்தைத் தாக்கல் செய்ய உத்தரவிட்டு, வழக்கின் விசாரணையை ஆகஸ்ட் 31-ஆம் தேதிக்கு ஒத்திவைத்தனர்.
திருவண்ணாமலை அருணாசலேஸ்வரர் கோயிலுக்குள் செப்டம்பர் 1 முதல் செல்போன்களுக்கு முழு தடை!