தமிழகத்தின் தற்போதைய அரசியல் சூழல், தமிழக வெற்றிக் கழகத்தின் (தவெக) செயல்பாடுகள் மற்றும் அரசின் 100 நாள் ஆட்சிக் காலம் குறித்து மூத்த பத்திரிகையாளர் கோடீஸ்வரன் தனது காரசாரமான கருத்துகளைத் தெரிவித்துள்ளார்.
மின்கட்டண உயர்வும் மக்கள் சந்திக்கும் சிரமங்களும்
தமிழகத்தில் மின்சாரத் தடை மற்றும் குறைந்த மின்னழுத்தப் (Voltage) பிரச்சனைகள் தொடர்கதையாக உள்ளதாகக் குறிப்பிட்ட அவர், கடந்த ஆட்சியைக் காட்டிலும் தற்போதைய ஆட்சியில் மின்கட்டணம் பல மடங்கு உயர்ந்துள்ளதாகக் குற்றம்சாட்டினார். அன்றாட வாழ்வில் மக்கள் சந்திக்கும் இந்த மின்கட்டண உயர்வே தற்போதைக்கு பொதுமக்கள் மத்தியில் பிரதான பேசுபொருளாக மாறியுள்ளது என்று அவர் சுட்டிக்காட்டினார்.
பெண்கள் பாதுகாப்பு மற்றும் தேர்தல் வாக்குறுதிகள்
மகளிருக்கு அறிவிக்கப்பட்ட ₹2,500 நிதியுதவித் திட்டம் இன்னும் நடைமுறைக்கு வரவில்லை என்றும், தாலிக்குத் தங்கம் போன்ற வாக்குறுதிகளின் நிலையிலும் எவ்வித முன்னேற்றமும் தெரியவில்லை என்றும் தெரிவித்தார். மேலும், கிருஷ்ணகிரி மற்றும் ஈரோடு போன்ற மாவட்டங்களில் நடைபெற்ற சம்பவங்களைக் குறிப்பிட்டுப் பேசிய அவர், பெண்களின் பாதுகாப்பை உறுதிசெய்வதில் அரசு இன்னும் கூடுதல் கவனத்துடனும் தீவிரத்துடனும் செயல்பட வேண்டும் எனக் கேட்டுக்கொண்டார்.
இளைஞர் நலன் மற்றும் வேலைவாய்ப்புச் சூழல்
இளைஞர்களுக்குத் தேவையான வேலைவாய்ப்புகளை உருவாக்குவதில் அரசு போதிய கவனம் செலுத்தவில்லை எனக் குற்றம்சாட்டிய கோடீஸ்வரன், தனியார் ஒப்பந்தங்கள் மற்றும் வெளிமாநில நிறுவனங்களின் வரவு உள்ளூர் இளைஞர்களுக்கு உரிய பலனை அளிக்கவில்லை என்றார். அதேபோல, நீட் தேர்வு மற்றும் பல்வேறு கோரிக்கைகளுக்காக நியாயமான முறையில் போராடும் மாணவர்களையும் இளைஞர்களையும் கையாளும் விதத்தில் காவல்துறை மனிதநேயத்துடன் நடக்க வேண்டும் என்றும் வலியுறுத்தினார்.
கூட்டணிக் கட்சிகளின் நிலைப்பாடு
முன்னாள் கூட்டணிக் கட்சிகள் மற்றும் அமைப்புகளின் தற்போதைய அமைதியான போக்கைக் கடுமையாக விமர்சித்த அவர், பட்டியலின மற்றும் ஒடுக்கப்பட்ட சமூக மக்களுக்காகக் கடந்த காலங்களில் தீவிரமாகப் போராடி குரல் கொடுத்து வந்த அமைப்புகளின் வீரியம் தற்போதைய அரசியல் சூழலில் பெருமளவு குறைந்து காணப்படுவதாகத் தெரிவித்தார்.
சட்டமன்ற விவாதங்களும் மக்கள் தொகைப் பணிகளும்
சட்டமன்றத்தில் காரசாரமான மக்கள் நல விவாதங்கள் குறைந்து, வெறும் பாராட்டுரைகளும் நையாண்டிகளுமே அதிகம் இடம்பெறுவதாகத் தெரிவித்த அவர், மக்கள் பணத்தில் சட்டப்பேரவை உறுப்பினர்களுக்கு ஆடம்பர வசதிகளை ஏற்படுத்திக் கொடுப்பதைக் கண்டித்தார். சுமார் 10 லட்சம் கோடி ரூபாய் கடனில் இருக்கும் மாநிலத்தின் பொருளாதாரத்தைச் சீரமைப்பதிலும், ஊழலற்ற ஆக்கபூர்வமான நிர்வாகத்தை வழங்குவதிலுமே அரசு முழுக் கவனம் செலுத்த வேண்டும் என்று தெரிவித்துள்ளாா்.
திமுகவில் 110 மாவட்டங்கள்”- சேகர்பாபு, செந்தில் பாலாஜி அதிகாரத்தில் அதிரடி மாற்றம்?