“சட்டமன்றம் மக்கள் பிரச்னை பேசுமிடம்; ஆத்திரத்தைத் தீர்க்கும் களமல்ல!” – மூத்த தலைவர் திருநாவுக்கரசர் அதிரடி!

தமிழக அரசியலில் நிலவும் நடப்புச் சூழல்கள், தவெக ஆட்சியின் செயல்பாடு, சட்டமன்ற கண்ணியம் மற்றும் கூட்டணிக் கட்சிகளின் முரண்பாடுகள் குறித்து  முன்னாள் நாடாளுமன்ற உறுப்பினர் சு. திருநாவுக்கரசர் விரிவாகப் பேசியுள்ளார்.

“விஜய் பிரதமர் ஆக வேண்டும் என்ற ஆசை அரசியலில் இயல்பானதே!”

தமிழக வெற்றிக் கழகத்தைச் சேர்ந்த அமைச்சர்கள் முதலமைச்சர் விஜய்யை ‘அடுத்த பிரதமர்’ எனப் பேசி வருவது குறித்த கேள்விக்குப் பதிலளித்த திருநாவுக்கரசர், “ஒவ்வொரு கட்சியும் தங்கள் தலைவரை நாட்டின் உயரிய பதவிக்கு கொண்டு வர வேண்டும் என ஆசைப்படுவதும், அது குறித்துப் பேசுவதும் அரசியலில் மிகவும் சகஜமான ஒன்று.

நாம் தமிழர் கட்சி சீமானையோ, பாமகவில் அன்புமணியையோ அல்லது விஜயகாந்த் இருந்த காலத்தில் பிரேமலாதாவையோ தங்கள் கட்சியின் முதலமைச்சர் வேட்பாளராக முன்னிறுத்திப் பேசுவதைப் போன்றதுதான் இதுவும். தவெக அமைச்சர்கள் மற்றும் தொண்டர்கள் தங்கள் தலைவரைப் பிரதமர் என ஆசைப்படுவதில் எந்தத் தவறும் இல்லை. இருப்பினும், நாடாளுமன்றத் தேர்தலில் போதிய இடங்களை வென்று பெரும்பான்மை பெறுவதே பிரதமராவதற்கான நடைமுறைச் சாத்தியமாகும். அதேவேளையில், காங்கிரஸ் கட்சியைப் பொறுத்தவரை ராகுல் காந்தி மட்டுமே எங்கள் பிரதமர் வேட்பாளர் என்பதில் எந்த மாற்றுக்கருத்தும் இல்லை” என்று தெளிவுபடுத்தினார்.

“சட்டமன்றம் தனிப்பட்ட ஆத்திரத்தைத் தீர்க்கும் இடம் அல்ல”

தற்போது நடைபெற்று வரும் சட்டமன்ற நிகழ்வுகள் மற்றும் காரசார விவாதங்கள் குறித்துப் பேசிய அவர், “சட்டமன்றம் என்பது மக்கள் பிரச்னைகளையும், மாநிலத்தின் மேம்பாட்டிற்கான கருத்துக்களையும் விவாதித்து எடுத்துரைப்பதற்கான புனிதமான இடம். அது தனிப்பட்ட ஆத்திரத்தையும் கோபத்தையும் தீர்த்துக் கொள்வதற்கான களமல்ல. இன்றைய சூழலில் மக்கள் இதையெல்லாம் தொலைக்காட்சிகள் மற்றும் சமூக வலைதளங்கள் வாயிலாக நேரலையாகப் பார்த்துக் கொண்டிருக்கிறார்கள். சிலர் விளம்பரத்திற்காகவும், பத்திரிகைகளில் செய்தியாக வர வேண்டும் என்பதற்காகவும் அவையில் சத்தமிடுகிறார்கள். புதிதாகத் தேர்ந்தெடுக்கப்பட்டுள்ள எம்.எல்.ஏ-க்களுக்குச் சட்டமன்ற மரபுகள் மற்றும் நடவடிக்கைகள் குறித்து உரிய பயிற்சிகளை வழங்கி, மக்கள் நலன் சார்ந்து அவர்களைச் செயல்பட வைக்க வேண்டும்” எனக் குறிப்பிட்டார்.

“கூட்டணியில் முரண்பாடுகள் இருப்பது ஜனநாயகத்தின் இயல்பு”

கூட்டணிக் கட்சிகளிடையே எழும் விமர்சனங்கள் குறித்த கேள்விக்கு, “முரண்பாடுகளே இல்லாத இடம் அரசியல் கிடையாது. சன்னியாசிகள் வாழும் மடத்தில் வேண்டுமானால் எந்தச் சலசலப்பும் இல்லாமல் அமைதி நிலவலாம். கூட்டணிக் கட்சிகள் என்பதால் 24 மணி நேரமும் அரசைப் புகழ்ந்து மட்டுமே பேச வேண்டும் என்ற கட்டாயம் இல்லை. அரசின் நல்ல திட்டங்களைப் பாராட்டுவதும், தவறு நடக்கும் போது சுட்டிக்காட்டுவதும் ஜனநாயகத்தின் அடிப்படை அம்சம். எம்.ஜி.ஆர் மற்றும் ஜெயலலிதா ஆட்சிக் காலங்களில்கூட கூட்டணிக் கட்சிகள் அரசை விமர்சித்து நியாயமான கோரிக்கைகளை முன்வைத்துள்ளன” என்று தெரிவித்தார்.

“முதலமைச்சர் விஜய் தினமும் பதிலளிக்க வேண்டிய அவசியமில்லை”

முதலமைச்சர் விஜய் எதிர்க்கட்சிகளின் விமர்சனங்களுக்குத் தினமும் பதிலளிப்பதில்லை என்ற குற்றச்சாட்டு குறித்து விளக்கிய அவர், “முன்னாள் முதலமைச்சர் எம்.ஜி.ஆர் கூட தினமும் வந்து செய்தியாளர்களுக்குப் பேட்டி கொடுத்துக் கொண்டிருக்க மாட்டார். தேவைப்படும் சூழலிலும், சரியான நேரத்திலும் மட்டுமே பேசுவார். காமராஜர் ஆட்சிக் காலத்தில் கூட சி.சுப்பிரமணியம், வெங்கடராமன், பக்தவத்சலம் போன்ற மூத்த அமைச்சர்களே பெரும்பாலான கேள்விகளுக்குப் பதிலளிப்பார்கள். அதேபோலவே, தவெக அரசிலும் அமைச்சர்கள் துறைகள் சார்ந்த கேள்விகளுக்குப் பதிலளிப்பது இயல்பான நடைமுறைதான்” என்று சுட்டிக் காட்டியுள்ளார்.

தமிழக சட்டப்பேரவையில் விலைவாசி உயர்வு விவகாரம் வெடிப்பு! உதயநிதி–EPS காரசார விவாதம்