வெளிநாட்டுப் பயணம்: முதலமைச்சரின் வெளிநாட்டுப் பயணம் குறித்து வெள்ளை அறிக்கை வெளியிட வேண்டும் என்றும், ஈர்க்கப்பட்ட முதலீடுகள் மற்றும் வேலைவாய்ப்புகள் குறித்து வெளிப்படைத்தன்மை வேண்டும் என்றும் ஜெயக்குமார் வலியுறுத்தியுள்ளார்.
அறிவிக்கப்படாத மின்வெட்டு: தமிழகம் முழுவதும் அறிவிக்கப்படாத மின்வெட்டு நிலவும் சூழலில், மின்வெட்டே இல்லை என்று அமைச்சர் பொய் கூறுவதாக அவர் குற்றம்சாட்டியுள்ளார்.
தலைமைச் செயலகம் அமைப்பு: பட்டினப்பாக்கத்தில் தலைமைச் செயலகம் அமைக்கும் திட்டத்தை அரசு உடனடியாகக் கைவிட வேண்டும் என்றும், மீனவர்களின் வாழ்வாதாரத்தைப் பாதிக்கக் கூடாது என்றும் கோரிக்கை விடுத்துள்ளார்.
விரிவானச் செய்தி:
கிண்டியில் அமைந்துள்ள ராமசாமி படையாட்சியார் சிலைக்கு மாலை அணிவித்து மரியாதை செலுத்திய பின் செய்தியாளர்களைச் சந்தித்த அதிமுக முன்னாள் அமைச்சர் ஜெயக்குமார் பல்வேறு விவகாரங்கள் குறித்துப் பேட்டியளித்தார்.
வெளிநாட்டுப் பயணம் குறித்து வெள்ளை அறிக்கை:
அனைத்து விவகாரங்களுக்கும் வெள்ளை அறிக்கை வெளியிட்டு வரும் அரசு, முதலமைச்சரின் வெளிநாட்டுப் பயணம் குறித்தும் வெள்ளை அறிக்கை வெளியிட வேண்டும் என ஜெயக்குமார் கோரிக்கை விடுத்துள்ளார்
வெளிநாட்டுப் பயணத்தின் மூலம் பெறப்பட்ட முதலீடுகள், உருவாக்கப்பட்ட வேலைவாய்ப்புகள் மற்றும் புரிந்துணர்வு ஒப்பந்தங்களின் செயலாக்கம் ஆகியவை குறித்து வெளிப்படைத்தன்மையுடன் அரசு விளக்க வேண்டும் என்று அவர் குறிப்பிட்டுள்ளார்.
மின்வெட்டுப் பிரச்சினை:
தமிழ்நாட்டில் கண்ணுக்குத் தெரிந்தே அறிவிக்கப்படாத மின்வெட்டுப் பிரச்சினை தீவிரமாக உள்ளதாகக் குற்றம்சாட்டிய அவர், தொலைநோக்குப் பார்வையுடன் செயல்பட வேண்டிய அரசு, மின்வெட்டே இல்லை எனப் பொய் கூறி வருவதாக சாடினார். துக்ளக் தர்பார் போன்று அமைச்சர்களின் செயல்பாடுகள் உள்ளதாகவும் அவர் விமர்சித்தார்.
பட்டினப்பாக்கம் தலைமைச் செயலகத் திட்டம்:
லூப் சாலை மற்றும் சாந்தோம் பகுதியில் ஏற்கனவே கடும் போக்குவரத்து நெரிசல் உள்ள நிலையில், அங்கு தலைமைச் செயலகம் அமைக்கும் திட்டத்தை அரசு கைவிட வேண்டும் என்றார்.
அப்பகுதி மீனவ மக்களின் குடியிருப்புத் தேவைகளை நிறைவேற்ற அந்த இடத்தை ஒதுக்க வேண்டும் என்றும், மீனவர்களின் வாழ்வாதாரத்தைப் பாதிக்கும் திட்டங்களை எதிர்த்து மீனவர்கள் போராடத் தயங்க மாட்டார்கள் என்றும் எச்சரித்தார்.
மேலும், ஏற்கனவே அரசின் கடன் சுமை அதிகமாக உள்ள சூழலில், புதிய கட்டுமானங்களுக்குப் பெருமளவு நிதியைச் செலவிடுவதைத் தவிர்த்துவிட்டு, இருப்பதை வைத்துச் சிறப்பாக நிர்வகிப்பதே நல்ல நிர்வாகம் என்று அவர் சுட்டிக்காட்டினார்.
அரசுத்துறைகளில் மறைமுகமாக லஞ்சம் பெறுவது அதிகரித்து வருவதாகவும் அதனை முற்றிலுமாக ஒழிக்க நடவடிக்கை எடுக்க வேண்டும் என்றும் ஜெயக்குமார் கேட்டுக்கொண்டார்.
அன்பில் மகேஷ் வீட்டில் சோதனை: உள்ளே நுழைய திமுகவினர் முயன்றதால் பரபரப்பு மற்றும் பதற்றம்