அரியானா மாநிலம் அம்பாலா அருகே கட்டுமானத்தில் இருந்த 3 மாடி கட்டிடம் திடீரென இடிந்து விழுந்ததில் 4 தொழிலாளர்கள் உயிரிழந்தனர். மேலும் 9 பேர் காயமடைந்து மருத்துவமனையில் சிகிச்சை பெற்று வருகின்றனர்.
கட்டுமானப் பணியின்போது விபரீதம்
அம்பாலா நகரின் துல்கோட் பகுதியில் ஞாயிற்றுக்கிழமை பிற்பகல் சுமார் 3 மணியளவில் இந்த விபத்து ஏற்பட்டது. கட்டிடத்தின் 3-வது தளத்தில் மேற்கூரைக்கான கான்கிரீட் பணிகள் நடைபெற்று கொண்டிருந்தபோது, கட்டிடத்தின் ஒரு பகுதி திடீரென இடிந்து விழுந்ததாக அதிகாரிகள் தெரிவித்துள்ளனர்.
அப்போது சுமார் 35 முதல் 40 தொழிலாளர்கள் கட்டுமானப் பணியில் ஈடுபட்டிருந்ததாக தகவல் வெளியாகியுள்ளது. கட்டிடம் இடிந்து விழுந்ததில் பலர் இடிபாடுகளுக்குள் சிக்கிக் கொண்டனர்.
13 பேர் மீட்பு; 4 பேர் உயிரிழப்பு
தகவல் அறிந்ததும் போலீசார், தீயணைப்புப் படையினர் மற்றும் மாவட்ட நிர்வாக அதிகாரிகள் சம்பவ இடத்துக்கு விரைந்து சென்றனர். தேசிய பேரிடர் மீட்புப் படை (NDRF), மாநில பேரிடர் மீட்புப் படை (SDRF) உள்ளிட்ட குழுக்களும் மீட்புப் பணியில் ஈடுபடுத்தப்பட்டன.
இடிபாடுகளில் இருந்து 13 பேர் மீட்கப்பட்டு அம்பாலா சிவில் மருத்துவமனைக்கு அழைத்துச் செல்லப்பட்டனர். அவர்களில் 4 பேர் ஏற்கெனவே உயிரிழந்துவிட்டதாக மருத்துவர்கள் தெரிவித்தனர். மீட்கப்பட்டவர்களில் 9 பேர் காயங்களுடன் சிகிச்சை பெற்று வருகின்றனர்.
உயிரிழந்தவர்கள் யார்?
இந்த விபத்தில் உயிரிழந்தவர்கள் அம்பாலா மாவட்டத்தைச் சேர்ந்த ராஜிந்தர் குமார், உத்தரப் பிரதேசத்தைச் சேர்ந்த காலியா ராம் மற்றும் சாஸ்திரி ராம், பஞ்சாபைச் சேர்ந்த ரூப் சிங் என அடையாளம் காணப்பட்டுள்ளனர்.
தொடர்ந்து நடைபெறும் மீட்புப் பணி
கட்டிட இடிபாடுகளுக்குள் மேலும் தொழிலாளர்கள் சிக்கியிருக்கலாம் என சந்தேகிக்கப்பட்டதால், மீட்புப் பணிகள் தொடர்ந்து நடைபெற்றன. கனரக இயந்திரங்கள் மற்றும் மீட்பு உபகரணங்களின் உதவியுடன் இடிபாடுகள் அகற்றப்பட்டு, உள்ளே யாரேனும் சிக்கியுள்ளார்களா என அதிகாரிகள் தேடி வருகின்றனர்.
கட்டிடம் இடிந்ததற்கான காரணம் என்ன?
கட்டிடம் இடிந்ததற்கான சரியான காரணம் உடனடியாக உறுதி செய்யப்படவில்லை. கட்டுமானத்துக்கு உரிய அனுமதி பெறப்பட்டிருந்ததா உள்ளிட்ட விவரங்களையும் அதிகாரிகள் விசாரித்து வருகின்றனர்.
அலட்சியம் ஏதேனும் காரணமாக இருந்தது விசாரணையில் தெரியவந்தால் சட்டப்படி நடவடிக்கை எடுக்கப்படும் என்று அம்பாலா காவல் கண்காணிப்பாளர் அஜித் சிங் ஷெகாவத் தெரிவித்துள்ளார்.
மீட்புப் பணிகள் நிறைவடைந்த பின்னர் கட்டிடத்தின் நிலம், உரிமையாளர், கட்டுமான ஆவணங்கள் உள்ளிட்டவை தொடர்பாக விரிவான விசாரணை நடத்தப்படும் என அதிகாரிகள் தெரிவித்துள்ளனர்.
கனமழையால் வெள்ளப்பெருக்கு: இந்தியாவில் 56 பேர், நேபாளத்தில் 14 பேர் உயிரிழப்பு!