பிரதமர் நரேந்திர மோடி வரும் ஞாயிற்றுக்கிழமை (அக்டோபர் 11) ஒருநாள் பயணமாக சென்னை வர உள்ளதையொட்டி, சென்னை பழைய விமான நிலையம் மற்றும் அதைச் சுற்றியுள்ள பகுதிகளில் பாதுகாப்பு ஏற்பாடுகள் தீவிரப்படுத்தப்பட்டுள்ளன. பிரதமரின் பாதுகாப்புப் பணிகளுக்காக டெல்லியில் இருந்து சிறப்பு பாதுகாப்புப் படையான எஸ்பிஜி அதிகாரிகள் சென்னை வந்துள்ளனர்.
எஸ்பிஜி அதிகாரிகள் ஆலோசனைக் கூட்டம்
பிரதமரின் பாதுகாப்பு ஏற்பாடுகளை ஒருங்கிணைப்பதற்காக, ஏடிஜிபி அமித் குமார் தலைமையில் எஸ்பிஜி அதிகாரிகள் குழு டெல்லியில் இருந்து சென்னைக்கு வந்துள்ளது. சென்னை பழைய விமான நிலையத்தில் பாதுகாப்பு தொடர்பான சிறப்பு ஆலோசனைக் கூட்டமும் நடைபெற்றது.
இந்தக் கூட்டத்தில் விமான நிலைய உயர் அதிகாரிகள், மத்திய தொழில் பாதுகாப்புப் படை அதிகாரிகள், முக்கியப் பிரமுகர்கள் பாதுகாப்புப் பிரிவு அதிகாரிகள், மாநில அரசின் நெறிமுறை அதிகாரிகள், சென்னை மாநகர காவல்துறை உயர் அதிகாரிகள் மற்றும் மத்திய, மாநில உளவுப் பிரிவு அதிகாரிகள் உள்ளிட்டோர் பங்கேற்றனர்.
காலை 11.10 மணிக்கு சென்னை வருகை
திட்டமிட்ட பயணத்தின்படி, பிரதமர் நரேந்திர மோடி ஞாயிற்றுக்கிழமை காலை டெல்லியில் இருந்து தனி விமானத்தில் புறப்பட்டு, காலை 11.10 மணிக்கு சென்னை பழைய விமான நிலையத்தை வந்தடைய உள்ளார். அங்கு அவருக்கு வரவேற்பு அளிக்க ஏற்பாடுகள் செய்யப்பட்டுள்ளன.
அதன்பிறகு விமான நிலையத்தில் இருந்து காரில் புறப்படும் பிரதமர், போரூரில் நடைபெறும் மெட்ரோ ரயில் திட்டத் தொடக்க விழாவில் பங்கேற்கிறார். தொடர்ந்து சென்னை கிண்டியில் உள்ள ஐஐடிக்குச் சென்று அரசு நிகழ்ச்சிகளில் கலந்து கொள்கிறார். பின்னர் நந்தம்பாக்கம் வர்த்தக மையத்தில் நடைபெறும் நிகழ்ச்சிகளில் பங்கேற்கிறார்.
அனைத்து நிகழ்ச்சிகளையும் முடித்துக்கொண்டு, மாலை 4 மணியளவில் சென்னை பழைய விமான நிலையத்தில் இருந்து தனி விமானம் மூலம் டெல்லி திரும்பத் திட்டமிடப்பட்டுள்ளது.
ஹெலிகாப்டர் பயணத் திட்டத்தில் மாற்றம்
முதலில் சென்னை விமான நிலையத்தில் இருந்து போரூர் வரை ஹெலிகாப்டரில் செல்லத் திட்டமிடப்பட்டிருந்ததாகக் கூறப்படுகிறது. தற்போது அந்தத் திட்டத்தில் மாற்றம் செய்யப்பட்டு, பிரதமரின் பயணம் முழுவதும் கார்கள் மூலமாகவே நடைபெற உள்ளதாகத் தகவல்கள் தெரிவிக்கின்றன.
பிரதமர் செல்லும் வழித்தடங்களில் சில இடங்களில் சாலை அணிவகுப்பு நடத்தவும் திட்டமிடப்பட்டுள்ளதாகக் கூறப்படுவதால், சாலைகளில் கூடுதல் பாதுகாப்பு ஏற்பாடுகளை மேற்கொள்ளுமாறு எஸ்பிஜி அதிகாரிகள் கேட்டுக்கொண்டுள்ளனர். பிரதமரின் நிகழ்ச்சிகளில் தமிழ்நாடு முதலமைச்சர் ஜோசப் விஜயும் பங்கேற்க உள்ளதாகத் தெரிவிக்கப்பட்டுள்ளது.
விமான நிலையத்தில் கட்டுப்பாடுகள் தீவிரம்
பிரதமரின் வருகையை முன்னிட்டு, சென்னை பழைய விமான நிலையத்தின் பாதுகாப்பு ஏற்பாடுகள் வெள்ளிக்கிழமை முதல் ஞாயிற்றுக்கிழமை இரவு வரை எஸ்பிஜி அதிகாரிகளின் ஒருங்கிணைப்பில் தீவிரமாகக் கண்காணிக்கப்பட உள்ளன.
விமான நிலையப் பகுதிகளில் டிரோன்கள் மற்றும் காற்றில் பறக்கவிடப்படும் பலூன்களைப் பறக்கவிடத் தடை விதிக்கப்பட்டுள்ளது. விமான நிலைய வளாகத்தில் உள்ள சரக்கு மற்றும் கூரியர் நிறுவனங்களின் நிரந்தர ஊழியர்கள் புகைப்பட அடையாள அட்டைகளை அணிந்து பணிக்கு வர வேண்டும் என்றும் அறிவுறுத்தப்பட்டுள்ளது. அந்த நிறுவனங்கள் மற்றும் விமான ஓடுபாதைப் பராமரிப்புப் பகுதிகளில் தற்காலிகப் பணியாளர்களுக்கு மூன்று நாட்களுக்கு அனுமதி மறுக்கப்பட்டுள்ளதாகவும் கூறப்படுகிறது.
விடுதிகள், ஹோட்டல்களில் கண்காணிப்பு
விமான நிலையத்தைச் சுற்றியுள்ள பகுதிகளிலும் பாதுகாப்பு கண்காணிப்பு அதிகரிக்கப்பட்டுள்ளது. அருகிலுள்ள ஹோட்டல்கள் மற்றும் தங்கும் விடுதிகளில் சோதனைகள் நடத்தி, சந்தேகத்துக்கிடமான வகையில் தங்கியிருப்போர் குறித்து கண்காணிக்க நடவடிக்கை எடுக்கப்பட்டுள்ளதாகத் தகவல்கள் தெரிவிக்கின்றன.
விமான நிலையத்தில் வழக்கமாக நடைமுறையில் உள்ள மூன்று அடுக்கு பாதுகாப்பு மேலும் தீவிரப்படுத்தப்படுவதுடன், முக்கியப் பகுதிகளில் கூடுதல் கண்காணிப்பும் மேற்கொள்ளப்பட உள்ளது.
பிரதமரின் ஐந்து மணி நேர சென்னைப் பயணத்தை முன்னிட்டு, விமான நிலையம் முதல் நிகழ்ச்சி நடைபெறும் இடங்கள் வரையிலான வழித்தடங்களில் பாதுகாப்பு ஏற்பாடுகள் தீவிரப்படுத்தப்பட்டுள்ளன. இந்த நடவடிக்கைகள் ஞாயிற்றுக்கிழமை இரவு வரை தொடரும் என விமான நிலைய அதிகாரிகள் தரப்பில் தெரிவிக்கப்பட்டுள்ளது.