திமுக முன்னாள் அமைச்சர் கே.என். நேருவுக்கு எதிராக முதல் தகவல் அறிக்கை (FIR) பதிவு செய்ய உத்தரவிட்ட சென்னை உயர் நீதிமன்றத்தின் உத்தரவை மறுஆய்வு செய்ய மறுத்ததை எதிர்த்து, அவர் தாக்கல் செய்த மேல்முறையீட்டு மனுவை உச்சநீதிமன்றம் தள்ளுபடி செய்து உத்தரவிட்டுள்ளது.
உச்சநீதிமன்றத்தில் விசாரணை
சென்னை உயர் நீதிமன்றத்தின் உத்தரவுக்கு எதிராக கே.என். நேரு தாக்கல் செய்த மேல்முறையீட்டு மனு, உச்சநீதிமன்ற நீதிபதி திபாங்கர் தத்தா தலைமையிலான அமர்வில் விசாரணைக்கு வந்தது.
விசாரணையின்போது நீதிபதிகள், “நீங்கள் அமைச்சராக இருந்தவர். உங்களுக்கு எதிராக இத்தகைய குற்றச்சாட்டு கூறப்பட்டு, நோட்டீஸும் பிறப்பிக்கப்பட்டுள்ள நிலையில், உடனடியாக நீதிமன்றத்தை ஏன் அணுகவில்லை?” என்று கேள்வி எழுப்பினர்.
கே.என். நேரு தரப்பு வாதம்
கே.என். நேரு சார்பில் ஆஜரான மூத்த வழக்கறிஞர் சித்தார்த் தவே, இந்த வழக்கு அரசியல் பழிவாங்கும் நோக்கத்துடன் அரசியல் எதிரியால் தொடரப்பட்டதாக வாதிட்டார்.
மேலும், சென்னை உயர் நீதிமன்றத்தில் சீலிடப்பட்ட கவரில் தாக்கல் செய்யப்பட்ட ஆவணங்களின் அடிப்படையில் உத்தரவு பிறப்பிக்கப்பட்டதாகவும், அந்த ஆவணங்கள் என்ன என்பது குறித்து தங்களுக்கு விளக்கம் அளிக்க வாய்ப்பு வழங்கப்படவில்லை என்றும் தெரிவித்தார்.
ஆரம்பக் கட்டத்திலேயே முன்னாள் அமைச்சர் மற்றும் அவரது உறவினர்களைச் சந்தேகக் கண் கொண்டு சென்னை உயர் நீதிமன்றம் அணுகியிருப்பது ஒட்டுமொத்த விசாரணையையும் பாதிக்கும் என்றும், விரிவான வாதங்களை முன்வைக்க உயர் நீதிமன்றம் அனுமதிக்கவில்லை என்றும் அவர் வாதிட்டார்.
நீதிபதிகள் எழுப்பிய கேள்விகள்
இதற்குப் பதிலளித்த நீதிபதிகள், “இங்கு உச்சநீதிமன்றத்தில் முன்வைக்கும் பல வாதங்களை நீங்கள் சென்னை உயர் நீதிமன்றத்தில் முன்வைக்கவே இல்லை. உயர் நீதிமன்றத்தில் இந்த வாதங்களை எங்கு வைத்தீர்கள் என்பதைக் காட்டுங்கள்” என்று கேள்வி எழுப்பினர்.
மேலும், சம்பந்தப்பட்ட நபர் உரிய அமைச்சகத்திற்குப் பொறுப்பாளராக இருந்தவர் என்பதால், இந்த விவகாரத்தின் பின்னணியில் இருப்பவர்கள் யார் உள்ளிட்ட விவரங்களைக் கண்டறிய வழக்குப் பதிவு செய்து விசாரணை நடத்துவது அவசியம் என்றும் நீதிபதிகள் சுட்டிக்காட்டினர்.
மேல்முறையீட்டு மனு தள்ளுபடி
தற்போதைய நிலையில் இந்த வழக்கில் வேறு எந்த உத்தரவையும் பிறப்பிக்க முடியாது என்று தெரிவித்த உச்சநீதிமன்றம், முன்னாள் அமைச்சர் கே.என். நேரு தாக்கல் செய்த மேல்முறையீட்டு மனுவைத் தள்ளுபடி செய்து உத்தரவிட்டது.
இதன் மூலம் கே.என். நேருவுக்கு எதிராக எப்.ஐ.ஆர். பதிவு செய்ய உத்தரவிட்ட சென்னை உயர் நீதிமன்றத்தின் உத்தரவை எதிர்த்த மேல்முறையீட்டு முயற்சி முடிவுக்கு வந்துள்ளது. அவருக்கு எதிரான வழக்கின் விசாரணை தொடர வழிவகை ஏற்பட்டுள்ளது.