மெரி கிறிஸ்துமஸ் படத்திலிருந்து முதல் பாடல் வெளியானது

இந்தி இயக்குநரின் கூட்டணியில் விஜய் சேதுபதி நடித்துள்ள மெரி கிறிஸ்துமஸ் படத்திலிருந்து முதல் பாடல் வெளியாகி உள்ளது.

தமிழை தாண்டி மலையாளம், இந்தி, தெலுங்கு உள்ளிட்ட மொழிகளில் கவனம் செலுத்தி வரும் விஜய் சேதுபதி, இந்தியில் மும்பைகர் படத்தில் நடித்தார். இதைத் தொடர்ந்து ஜவான் படத்தில் ஷாருக்கானுக்கு வில்லனாக நடித்தார். இத்திரைப்படம் பெரும் ஹிட் அடித்தது. கடந்த செப்டம்பர் மாதம் வெளியான இத்திரைப்படம் ஆயிரம் கோடிக்கு மேல் வசூலித்து சாதனை படைத்தது. மேலும், மௌன படமான காந்தி டாக்கீஸ், தமிழில் வெற்றிமாறன் இயக்கும் விடுதலை பாகம் 2, மணிகண்டன் இயக்கத்தில் வெப் தொடர், ஆறுமுக குமார் இயக்கும் புதிய படம் என ஏராளமான படங்களை கைவசம் வைத்துள்ளார்.

இதனிடையே, பிரபல இந்தி இயக்குநர் ஸ்ரீராம் ராகவன் இயக்கும் மெரி கிறிஸ்துமஸ் படத்தில் நடிக்கிறார். இப்படத்தில் விஜய் சேதுபதிக்கு ஜோடியாக பிரபல பாலிவுட் நடிகை கத்ரீனா கைஃப் நடிக்கிறார். மேலும், ராதிகா சரத்குமார், சஞ்சய் கபூர், உள்ளிட்ட பலர் நடிக்கின்றனர். மேலும், பாலிவுட் நடிகை ராதிகா ஆப்தே முக்கிய கேமியோ ரோலில் நடிப்பதாக கூறப்படுகிறது. இப்படம் கடந்த ஆண்டு கிறிஸ்துமஸ் பண்டிகையை முன்னிட்டு வெளியாகும் என அறிவிக்கப்பட்டது. பின்னர் சில காரணங்களால் வெளியாகவில்லை.

பின்பு பொங்கல் பண்டிகையை முன்னிட்டு வரும் ஜனவரி மாதம் 12-ம் தேதி வெளியாகும் என படக்குழு அறிவித்துள்ளது. இந்நிலையில், இப்படத்திலிருந்து முதல் பாடல் சமூக வலைதளங்களில் வெளியாகி வரவேற்பை பெற்று வருகிறது.