ரஜினி – சுந்தர். சி கூட்டணியில் உருவாக இருந்து, பின்னர் கைவிடப்பட்ட படம் குறித்த புதிய தகவல் வெளியாகியுள்ளது.
சில மாதங்களுக்கு முன்பு, சுந்தர் சி இயக்கத்தில் சூப்பர் ஸ்டார் ரஜினிகாந்த் நடிக்கும் புதிய படத்தை கமல் ஹாசனின் ராஜ்கமல் ஃபிலிம்ஸ் இன்டர்நேஷனல் நிறுவனம் தயாரிக்கவுள்ளதாக வெளியான செய்தி திரையுலகையே அதிர வைத்தது. ‘தலைவர் 173’ திரைப்படமாக உருவாகவிருந்த இந்த இமாலயக் கூட்டணி மீது ரசிகர்கள் மத்தியில் வானளாவிய எதிர்பார்ப்பு நிலவியது.
ஆனால், சில கருத்து வேறுபாடுகள் காரணமாக சுந்தர்.சி இப்படத்திலிருந்து விலகிவிட்டதாகத் தகவல்கள் வெளியாகி, ஒட்டுமொத்த ரசிகர்களையும் கடும் அதிர்ச்சியிலும் அதிருப்தியிலும் ஆழ்த்தியது.
இந்நிலையில், சுந்தர் சி இயக்கத்தில் உருவாகியுள்ள ‘மூக்குத்தி அம்மன் 2’ திரைப்படம் வரும் நவம்பர் 6-ஆம் தேதி திரையரங்குகளில் வெளியாகவுள்ளதை முன்னிட்டு, படத்தின் விளம்பரப் பணிகளில் அவர் தீவிரமாக ஈடுபட்டு வருகிறார். அப்போது அளிக்கப்பட்ட ஒரு பேட்டியில், “ரஜினி படத்தை ஏன் கைவிட்டீர்கள்?” என்று அவரிடம் கேள்வி எழுப்பப்பட்டது.
அதற்குப் பதிலளித்த சுந்தர் சி, “அந்தப் படம் முற்றிலுமாகக் கைவிடப்பட்டுவிட்டது என்று நான் சொல்லவில்லை. அதைத் தொடங்குவதற்கான சரியான நேரம் அப்போது அமையவில்லை, அவ்வளவுதான். எதிர்காலத்தில் நிச்சயமாக அந்தப் படம் நடப்பதற்கு அதிக வாய்ப்புகள் உள்ளன” என்று தெரிவித்துள்ளார். சுந்தர். சியின் இந்தத் திடீர் விளக்கம், சோகத்தில் இருந்த தலைவர் ரசிகர்களுக்கு மாபெரும் நம்பிக்கையையும் ஆறுதலையும் அளித்துள்ளது.