நான் முதல்வன் திட்டத்தின் கீழ் 12ம் வகுப்பு பயிலும் மாணவர்களுக்கு உயர்கல்வியில் உள்ள வாய்ப்புகள் குறித்து கல்லூரிகளில் தெரிவு செய்யப்பட்ட 600 விரிவுரையாளர்கள் மற்றும் பேராசிரியர்களுக்கு மூன்று இடங்களில் (14.02.2023-15.02.2023)இன்றும், நாளையும் உள்ளுறை பயிற்சி அளிக்கப்படுகிறது.
இதுகுறித்து பள்ளிக்கல்வித்துறை வெளியிட்டுள்ள அறிக்கையில், அரசுப்பள்ளிகளில் 12ம் வகுப்பு பயிலும் மாணவர்களுக்கு அவர்கள் பகுதியில் உள்ள கல்லூரிகளில் என்னென்ன உயர்கல்வி வாய்ப்புகள் உள்ளன என்பதை அவர்கள் அறியும் வண்ணம் எடுத்துச் சொல்வதற்கும், உயர்கல்வியில் வழிகாட்டுவதற்கும் பயிற்சிகள் அளிக்கப்படவிருக்கின்றன. அரசுப் பள்ளியில் பயிலும் அனைத்து மாணவர்களும் உயர்கல்வி பெற வேண்டும் என்பதே இந்த பயிற்சிப் பட்டறையின் நோக்கம் என்று பள்ளிக்கல்வித்துறை தெரிவித்துள்ளது.
மேலும், அரசுப் பள்ளியில் பயின்று உயர்கல்விக்குச் சென்ற மாணவிகளுக்கான புதுமைப்பெண் திட்டம், உயர்கல்வி வேலை வாய்ப்பு வழிகாட்டித் திட்டமான ‘நான் முதல்வன் திட்டம்’ போன்றவற்றைப் பற்றிய புரிதல்களை உருவாக்குவது குறித்து பயிற்சி அளிக்கப்பட உள்ளது.
இந்தப் பயிற்சிப் பட்டறையில் பங்குபெறும் ஒவ்வொரு விரிவுரையாளரும் தங்கள் கல்லூரியில் பயிலும் 30 நாட்டு நலப்பணித் திட்ட மாணவர்களை இதற்கென கண்டறிந்து, அப்பகுதியில் உள்ள அரசுப் பள்ளியின் மாணவர் எண்ணிக்கைக்கேற்ப 10 முதல் 15 நாட்டு நலப்பணித் திட்ட கல்லூரி மாணவர்கள் பள்ளி மாணவர்களுக்கு வழிகாட்டுவதற்கென நியமிக்கப்படுவார்கள்.
திட்டத்தின்படி ஒவ்வொரு பள்ளியில் இருந்தும் 10 மாணவர்கள் அருகில் உள்ள கல்லூரிகளுக்குச் சென்று அங்குள்ள உயர்கல்வி வாய்ப்புகளை அங்குள்ள பட்டப் படிப்புகளை பற்றி அறிந்து கொள்ளலாம். மேலும் அங்கிருக்கும் லேப், விளையாட்டு வசதிகள் போன்றவற்றையும் அறிந்துகொள்ளலாம், பிப்ரவரி 25ம் தேதி தமிழ்நாட்டில் உள்ள 32,000 அரசு மேல்நிலைப் பள்ளிகளில் பயிலும் மாணவர்கள் அருகில் உள்ள சிறந்த கல்லூரிகளுக்கு சென்று பார்வையிட அறிவுறுத்தப்பட்டுள்ளது.
மாவட்ட அளவில் அரசு மேல்நிலைப் பள்ளிகளில் உள்ள ’நான் முதல்வன் திட்ட உயர்கல்வி வேலைவாய்ப்பு’ வழிகாட்டி ஆசிரியர்களுடன் சேர்த்து 500 நாட்டுநலப்பணித் திட்ட ஆர்வலர்களைக் கொண்டு சென்னை அண்ணா நூற்றாண்டு நூலகம் உள்ளிட்ட 3 இடங்களில் (14.02.2023-15.02.2023)இன்றும், நாளையும் பயிற்சிகள் வழங்கப்படவுள்ளதாக பள்ளிக்கல்வித்துறை தெரிவித்துள்ளது.