தீபாவளி பண்டிகையை முன்னிட்டு சென்னையில் வசிக்கும் பொதுமக்கள் தங்களது சொந்த ஊர்களுக்குப் படையெடுத்துள்ளனர். இதுவரை சுமார் 10 லட்சம் பேர் சென்னையில் இருந்து சொந்த ஊர்களுக்குப் பயணம் செய்துள்ளதாக தகவல் வெளியாகியுள்ளது.
கல்வி, வேலைவாய்ப்பு, தொழில் உள்ளிட்ட பல்வேறு காரணங்களுக்காக சென்னை மற்றும் அதன் சுற்றுவட்டாரப் பகுதிகளில் வசித்து வரும் தென் மாவட்டங்கள் உள்ளிட்ட பிற மாவட்டங்களைச் சேர்ந்த மக்கள், ஒவ்வொரு ஆண்டும் தீபாவளி, பொங்கல் போன்ற பண்டிகைகளின்போது சொந்த ஊர்களுக்குச் செல்வது வழக்கம்.
அந்த வகையில், இந்த ஆண்டு தீபாவளியைக் குடும்பத்தினருடன் கொண்டாடுவதற்காக கடந்த சில நாட்களாகவே சென்னையில் இருந்து மக்கள் பயணிக்கத் தொடங்கினர்.
பேருந்து, ரயில்களில் அலைமோதிய கூட்டம்!
பயணிகளின் கூட்ட நெரிசலைக் கட்டுப்படுத்த தமிழக அரசு சார்பில் சிறப்புப் பேருந்துகள் இயக்கப்பட்டு வருகின்றன. கிளாம்பாக்கம், கோயம்பேடு உள்ளிட்ட முக்கிய பேருந்து நிலையங்களில் பயணிகள் கூட்டம் அலைமோதியது.
சென்னையில் இருந்து அரசு மற்றும் தனியார் பேருந்துகள் மூலம் சுமார் 5.25 லட்சம் பேர் சொந்த ஊர்களுக்குப் பயணம் செய்துள்ளனர். தெற்கு ரயில்வேயின் வழக்கமான மற்றும் சிறப்பு ரயில்கள் மூலம் சுமார் 3 லட்சம் பேர் பயணம் செய்துள்ளதாக தெரிவிக்கப்பட்டுள்ளது.
மேலும், சொந்த கார்கள், வாடகை வாகனங்கள் மற்றும் இருசக்கர வாகனங்கள் மூலமாக சுமார் 1.50 லட்சம் பேர் பயணம் செய்திருக்கலாம் என மதிப்பிடப்பட்டுள்ளது.
இதன் மூலம் சென்னையில் இருந்து மட்டும் சுமார் 9.75 லட்சம் முதல் 10 லட்சம் பேர் வரை சொந்த ஊர்களுக்குச் சென்றுள்ளதாக கணக்கிடப்பட்டுள்ளது.
முக்கிய சாலைகளில் கடும் போக்குவரத்து நெரிசல்!
ஒரே நேரத்தில் லட்சக்கணக்கான மக்கள் வாகனங்களில் பயணம் செய்ததால் சென்னை நகரின் முக்கிய சாலைகளில் கடும் போக்குவரத்து நெரிசல் ஏற்பட்டது.
குறிப்பாக கோயம்பேடு, மதுரவாயல், தாம்பரம், கூடுவாஞ்சேரி, செங்கல்பட்டு உள்ளிட்ட பகுதிகளில் வாகனங்கள் அணிவகுத்து நின்றன. இதனால் பயணிகள் தங்களது சொந்த ஊர்களுக்குச் செல்ல நீண்ட நேரம் காத்திருக்க வேண்டிய நிலை ஏற்பட்டது.
போக்குவரத்து நெரிசலைச் சீரமைக்க போக்குவரத்து காவல்துறையினர் தீவிர நடவடிக்கைகளில் ஈடுபட்டனர்.
மேலும் சிறப்புப் பேருந்துகள் இயக்கம்!
தீபாவளி பயணிகளின் வசதிக்காக வழக்கமான பேருந்துகளுடன் கூடுதலாக ஆயிரக்கணக்கான சிறப்புப் பேருந்துகளும் இயக்கப்பட்டு வருகின்றன. ரயில்வே நிர்வாகமும் பயணிகளின் கூட்ட நெரிசலைச் சமாளிக்க சிறப்பு ரயில் சேவைகளை ஏற்பாடு செய்துள்ளது.
சொந்த ஊர்களுக்குச் சென்று குடும்பத்தினருடன் தீபாவளியைக் கொண்டாட வேண்டும் என்ற மகிழ்ச்சியில் லட்சக்கணக்கான மக்கள் சென்னையில் இருந்து பயணம் மேற்கொண்டுள்ளனர்.
தீபாவளி பண்டிகை எதிரொலி: நவம்பர் 9-ம் தேதி கோயம்பேடு காய்கறி சந்தைக்கு விடுமுறை!