ராஜமௌலி இயக்கத்தில் மகேஷ் பாபு நடிக்கும் புதிய படத்தின் டைட்டில் இதுதானா?

ராஜமௌலி இயக்கத்தில் மகேஷ் பாபு நடிக்கும் புதிய படத்தின் டைட்டில் குறித்த அப்டேட் வெளியாகியுள்ளது.பிரம்மாண்ட இயக்குனர் என்று அழைக்கப்படும் ராஜமௌலி பாகுபலி 1 மற்றும் பாகுபலி 2 ஆகிய படங்களின் மூலம் இந்திய அளவில் பிரபலமானார். இதைத்தொடர்ந்து இவருடைய அடுத்தடுத்த படங்களின் மீதான எதிர்பார்ப்பும் அதிகமாக இருந்து வந்தது. அந்த வகையில் ‘RRR’ திரைப்படம் ரசிகர்களுக்கு விருந்து படைத்தது. அடுத்தது இவர், மகேஷ் பாபுவை வைத்து பிரம்மாண்ட பட்ஜெட் படத்தை இயக்கி வருகிறார். இந்த படத்தில் மகேஷ் பாபு உடன் இணைந்து பிரியங்கா சோப்ரா, பிரித்விராஜ் சுகுமாரன் ஆகியோர் முக்கிய கதாபாத்திரங்களில் நடிப்பதாக சொல்லப்படுகிறது. இதனை ஸ்ரீ துர்கா ஆர்ட்ஸ் நிறுவனம் தயாரிக்கிறது. ஆக்ஷன்- திரில்லர் ஜானரில் உருவாகும் இந்த படத்தின் படப்பிடிப்பு கடந்த பல மாதங்களாக விறுவிறுப்பாக நடைபெற்று வருகிறது. இதற்கிடையில் வருகின்ற நவம்பர் மாதம் இப்படத்தின் ஃபர்ஸ்ட் லுக் வெளியாகும் எனவும் அறிவிக்கப்பட்டுள்ளது. இரண்டு பாகங்களாக உருவாகும் இந்த படத்தின் மீதான எதிர்பார்ப்பு நாளுக்கு நாள் அதிகமாகிக் கொண்டே இருக்கிறது. இந்நிலையில் இப்படத்தின் டைட்டில் குறித்த புதிய அப்டேட் கிடைத்துள்ளது. அதாவது இந்த படமானது தற்காலிகமாக GEN63 என்ற தலைப்பில் உருவாகி வருவதாகவும், இதன் உண்மையான தலைப்பு வாரணாசி எனவும் பல தகவல்கள் சமூக வலைதளங்களில் தீயாய் பரவி வருகிறது. இருப்பினும் இது குறித்த அதிகாரப்பூர்வ அறிவிப்பிற்காக நவம்பர் மாதம் வரை காத்திருக்க வேண்டும்.