காதலிக்க நேரமில்லை படத்தின் படப்பிடிப்பு நிறைவு

ஜெயம்ரவி மற்றும் நித்யா மேனன் நடிக்கும் காதலிக்க நேரமில்லை படத்தின் படப்பிடிப்பு நிறைவு பெற்றது.

சிவா, பிரியா ஆனந்த் நடித்த வணக்கம் சென்னை படத்தின் மூலம் கோலிவுட் திரை உலகில் இயக்குநராக அறிமுகம் ஆனவர் கிருத்திகா உதயநிதி. அடுத்து விஜய் ஆண்டனி நடித்த காளி படத்தை இயக்கினார். இப்படம் கலவையான விமர்சனங்களை பெற்றது. இதைத் தொடர்ந்து பேப்பர் ராக்கெட் என்ற இணைய தொடரை இயக்கினார். இதில், காளிதாஸ் ஜெயராம், தன்யா, கருணாகரன், கௌரி கிஷன் உள்பட பலர் முக்கிய கதாபாத்திரங்களில் நடித்திருந்தனர்.

அடுத்து அவர் இயக்கும் படத்தில் ஜெயம்ரவி மற்றும் பிரபல மலையாள நடிகை நித்யா மேனன் ஆகியோர் நடிக்கின்றனர். யோகிபாபு, டி.ஜே.பானு, ஜான் கொக்கைன் ஆகியோர் முக்கிய கதாபாத்திரங்களில் நடிக்கின்றனர். ரெட் ஜெயன்ட் நிறுவனம் படத்தை தயாரிக்கிறது. இத்திரைப்படத்திற்கு ஏ.ஆர்.ரஹ்மான் இசை அமைக்கிறார். மேலும், இப்படத்திற்கு காதலிக்க நேரமில்லை என தலைப்பு வைத்து அண்மையில் படக்குழு முதல் தோற்றத்தை வெளியிட்டது.

ரொமான்ஸ் படமான இதன் படப்பிடிப்பு இரண்டு மாதங்களுக்கு முன்பாக தொடங்கி விறுவிறுப்பாக நடைபெற்று வந்தது. இந்நிலையில், தற்போது படத்தின் முழு படப்பிடிப்பும் நிறைவு பெற்றதாக தகவல் வெளியாகி உள்ளது. பாடல் காட்சிகள் மட்டுமே பாக்கி இருக்கிறது. அடுத்த ஆண்டு ஏப்ரல் அல்லது மே மாதம் படத்தை வெளியிட படக்குழு திட்டமிட்டுள்ளதாக கூறப்படுகிறது.