சீனுராமசாமியின் கோழிப்பண்ணை செல்லதுரை… தேனியில் படப்பிடிப்பு தீவிரம்…

சீனு ராமசாமி இயக்கத்தில் உருவாகி வரும் கோழிப்பண்ணை செல்லதுரை திரைப்படத்தின் படப்பிடிப்பு தேனியில் விறுவிறுப்பாக நடைபெற்று வருகிறது.

தமிழ் சினிமாவில் தவிர்க்க முடியாத இயக்குநர் சீனு ராமசாமி. தென்மேற்கு பருவக்காற்று, நீர்ப்பறவை, தர்மதுரை, மாமனிதன் போன்ற படங்களை இயக்கியவர் தான் இயக்குனர் சீனு ராமசாமி. இவருடைய படங்கள் எதார்த்த நடையிலும் மண்வாசம் மற்றும் மனிதம் பேசும் படங்களாகவே இருக்கும். இவருடைய இயக்கத்தில் உருவாகி வெகு நாட்களாக ரிலீஸ் ஆகாமல் இருக்கும் திரைப்படம் “இடம் பொருள் ஏவல்“. இப்படத்தின் பாடல்கள் ரிலீஸ் ஆகி நல்ல வரவேற்பை பெற்றன. இருப்பினும் சில காரணங்களால் இப்படம் ரிலீஸ் ஆகாமல் கிடப்பில் போடப்பட்டுள்ளது.

இதையடுத்து, தற்போது சீனு ராமசாமி எழுதி இயக்கும் திரைப்படம் கோழிப்பண்ணை செல்லதுரை. கிராமத்து மண் சார்ந்த ஒரு கைவிடப்பட்ட கலைஞனை பற்றிய வாழ்வியல், காதல், படமாக்கப்பட்டு வருகிறது. அனைவரும் ரசிக்கும் வகையில் அதிரடி உணர்ச்சிகள் அடங்கிய திரைப்படமாக உருவாகி வருகிறது.

படத்தில் முக்கிய கதாபாத்திரத்தில் யோகி பாபு நடித்துள்ளார். ஏகன் என்ற புதுமுக நடிகர் நாயகனாக நடித்துள்ளார். மேலும், பிரிகிடா, ஐஸ்வர்யா தத்தா, தினேஷ் முத்தையா, லியோ சிவகுமார், திருச்செந்தூர் ஸ்ரீராம், சத்யா, மானஸ்வி, பவா செல்லதுரை, மற்றும் பலர் முக்கிய கதாபாத்திரங்களில் நடித்துள்ளனர். கோழிப்பண்ணை செல்லதுரை என்.ஆர்.ரகுநந்தன் இசை அமைத்துள்ளார். இப்படத்தின் படப்பிடிப்பு தேனி, ஆண்டிப்பட்டி, பெரியகுளம் ஆகிய பகுதிகளில் விறுவிறுப்பாக நடைபெற்று வருகிறது. விரைவில் படத்தின் அடுத்தடுத்த அப்டேட்டுகள் வௌியாகும் என்று எதிர்பார்க்கப்படுகிறது.