‘மொத ராத்திரி பாகம் 2 குறித்த புதிய தகவல் வெளியாகியுள்ளது.
கடந்த ஆகஸ்ட் 21-ஆம் தேதி திரையரங்குகளில் வெளியாகி, சினிமா பிரியர்கள் மத்தியில் நல்ல வரவேற்பைப் பெற்ற திரைப்படம் ‘மொத ராத்திரி’.
பிரபல தயாரிப்பு நிறுவனமான மைத்ரி மூவி மேக்கர்ஸ் தயாரிப்பில், இயக்குநர் ராஜா கருப்பசாமி இயக்கத்தில் உருவான இத்திரைப்படம், நகைச்சுவை கலந்த ஒரு குடும்பப் பொழுதுபோக்குத் திரைப்படமாக அமைந்தது. பரத் சங்கரின் இசையமைப்பும், சுரேந்திரன் பரஞ்சோதியின் ஒளிப்பதிவும் படத்திற்குப் பெரிய பலமாக அமைந்தன.
இப்படத்தில் ரிஷிகாந்த் மற்றும் அனிஷ்மா முன்னணி கதாபாத்திரங்களில் நடித்து அசத்தியிருந்தனர். மேலும் சேத்தன், பகவதி பெருமாள் உள்ளிட்ட பல நடிகர்கள் முக்கிய கதாபாத்திரங்களில் நடித்து கதையின் சுவாரஸ்யத்தைக் கூட்டினர்.
பழம்பெரும் இயக்குநர் கே. பாக்யராஜின் பாணியிலான விறுவிறுப்பான மற்றும் சுவாரஸ்யமான திரைக்கதையை நினைவூட்டும் வகையில் அமைந்திருந்த இத்திரைப்படம், எதார்த்தமான நகைச்சுவைக் காட்சிகளால் குடும்ப ஆடியன்ஸின் பாராட்டுகளைப் பெற்றது.
இந்நிலையில், இயக்குநர் ராஜா கருப்பசாமி, மொத ராத்திரி படத்தின் இரண்டாம் பாகம் உருவாகும் என்று அப்டேட் கொடுத்துள்ளார்.
முதல் பாகத்திற்கு கிடைத்த அமோக ஆதரவைத் தொடர்ந்து, ‘மொத ராத்திரி 2’ படத்திற்கான கதையமைக்கும் பணிகள் தீவிரமாக நடைபெற்று வருவதாகவும், இது முதல் பாகத்தை விடவும் கூடுதல் சிரிப்பு வெடியுடன் அமையும் என்றும் ரசிகர்களால் நம்பப்படுகிறது.