பொங்கல் ரேஸில் இருந்து விலகிய ‘பராசக்தி’…. படக்குழுவின் திட்டம் என்ன?

பராசக்தி திரைப்படம் பொங்கல் ரேஸில் இருந்து விலகியதாக தகவல் வெளியாகி இருக்கிறது.

தமிழ் சினிமாவில் ‘இறுதிச்சுற்று’, ‘சூரரைப் போற்று’ ஆகிய படங்களை இயக்கியதன் மூலம் ரசிகர்கள் மத்தியில் மிகவும் பிரபலமானவர் இயக்குனர் சுதா கொங்கரா. இவரது இயக்கத்தில் தற்போது உருவாகி வரும் திரைப்படம் தான் ‘பராசக்தி’. இந்த படத்தை டான் பிக்சர்ஸ் நிறுவனம் தயாரிக்க ஜி.வி. பிரகாஷ் இதற்கு இசையமைக்கிறார். ரவி கே. சந்திரன் இதன் ஒளிப்பதிவாளராக பணியாற்றுகிறார். இந்த படத்தில் சிவகார்த்திகேயன் கதாநாயகனாக நடிக்க ரவி மோகன் வில்லனாக நடிக்கிறார். இவர்களுடன் இணைந்து அதர்வா, ஸ்ரீலீலா ஆகியோர் முக்கிய கதாபாத்திரங்களில் நடிக்கின்றனர். இந்த படமானது 1950 காலகட்டத்தில் நடப்பது போன்று எடுக்கப்படுகிறது. அதன்படி இந்தி திணிப்பை மையமாக வைத்து எடுக்கப்படும் இந்த படத்தின் மீதான எதிர்பார்ப்பு மிகப்பெரிய அளவில் இருந்து வருகிறது. படப்பிடிப்புகளும் மதுரை, சிதம்பரம், இலங்கை போன்ற பகுதிகளில் நடைபெறுகிறது. இதற்கிடையில் இந்த படம் 2026 பொங்கல் தினத்தை முன்னிட்டு திரைக்கு வரும் என பல தகவல்கள் சமீபகாலமாக சமூக வலைத்தளங்களில் வெளியானது. ஆனால் தற்போது கிடைத்த தகவல் என்னவென்றால், இந்த படம் பொங்கல் ரேஸிலிருந்து விலகிவிட்டதாகவும், இந்த படத்தை 2026 ஏப்ரல் மாதத்தில் திரைக்கு கொண்டுவர படக்குழு திட்டமிட்டு வருவதாகவும் சினிமா வட்டாரங்கள் தெரிவிக்கின்றன. இருப்பினும் அதிகாரப்பூர்வ அறிவிப்பு இனிவரும் நாட்களில் வெளியாகும் என எதிர்பார்க்கப்படுகிறது.