கோவை பெரியகடை வீதியில் அமைந்துள்ள புகழ்பெற்ற அருள்மிகு கோனியம்மன் திருக்கோயிலில் உண்டியல் காணிக்கைத் திருட்டில் ஈடுபட்ட கோவில் ஊழியர்கள் 4 பேர் மற்றும் கவனக்குறைவாகச் செயல்பட்ட அதிகாரிகள் 4 பேர் என மொத்தம் 8 பேரை கூண்டோடு பணியிடை நீக்கம் (சஸ்பெண்ட்) செய்து இந்து சமய அறநிலையத்துறை அமைச்சர் ரமேஷ் உத்தரவிட்டுள்ளார்.
திட்டமிட்டு நடந்த திருட்டு
கடந்த ஜூலை 15 (15.07.2026) அன்று கோனியம்மன் கோவிலில் உண்டியல் காணிக்கை எண்ணும் பணி நடைபெற்றது. அப்போது, அங்கிருந்த ஒரு உண்டியலை மட்டும் கோவில் ஊழியர்கள் சிலர் திட்டமிட்டுத் திருடியுள்ளனர். இதைத் தடுக்காமலும், ஆய்வின் போது கண்டுபிடிக்காமலும் செயல்பட்ட அதிகாரிகள் மீதும் குற்றச்சாட்டு எழுந்தது.
இச்சம்பவம் தொடர்பாக விரிவான விசாரணை நடத்தப்பட்டதைத் தொடர்ந்து, தவறு இழைத்த ஊழியர்கள் மற்றும் அதிகாரிகள் மீது கடுமையான நடவடிக்கை எடுக்கப்பட்டுள்ளது.
பணியிடை நீக்கம் செய்யப்பட்டவர்கள்
உண்டியல் திருட்டில் நேரடியாக ஈடுபட்ட சீட்டு விற்பனையாளர் பாலசுப்ரமணியன், அலுவலக உதவியாளர் சரவணன், திருவலகு பணியாளர் பிரதிப்குமார் மற்றும் கோவில் பூசாரி கிருஷ்ணராஜ் ஆகிய 4 ஊழியர்களும் உடனடியாகப் பணியிடை நீக்கம் செய்யப்பட்டுள்ளனர்.
மேலும், இப்பணியைக் கண்காணிக்கத் தவறிய சரக ஆய்வாளர்கள் ராம்குமார், உதயகுமார், கோவில் செயல் அலுவலர் குமார் மற்றும் உதவி ஆணையர் உஷா நந்தினி ஆகிய 4 அதிகாரிகளும் சஸ்பெண்ட் செய்யப்பட்டுள்ளனர்.
காவல்துறை விசாரணை தீவிரமடைந்தது
சஸ்பெண்ட் செய்யப்பட்ட 8 பேரின் மீதும் காவல்துறை வழக்குப் பதிவு செய்து, தீவிர விசாரணை மேற்கொண்டு வருகிறது. கோவில் உண்டியலை ஊழியர்களே திட்டமிட்டுத் திருடிய சம்பவமும், அதற்குத் துணையாக இருந்த அதிகாரிகள் கூண்டோடு சஸ்பெண்ட் செய்யப்பட்ட சம்பவமும் பக்தர்களிடையே பெரும் பரபரப்பை ஏற்படுத்தியுள்ளது.