சிவகங்கை மாவட்டம் காரைக்குடி அருகே உள்ள ஆலங்குடியில், மூன்று ஆண்டுகளுக்குப் பிறகு பாரம்பரிய மீன்பிடி திருவிழா மிகக் விமரிசையாக நடைபெற்றது. இதில் கலந்து கொண்ட சுற்றுவட்டாரத்தைச் சேர்ந்த பொதுமக்கள் 5 கிலோ முதல் 10 கிலோ வரையிலான பெரிய மீன்களை மகிழ்ச்சியோடு பிடித்துச் சென்றனர்.
தமிழகத்தின் கிராமப்புறங்களில் மழைக்காலம் முடிந்து நீர்நிலைகளில் நீர் குறையும் தருணத்திலும், விவசாயப் பணிகள் நிறைவடையும் நேரத்திலும் ஊர் ஒற்றுமையையும் விவசாயச் செழிப்பையும் வலியுறுத்தும் வகையில் பாரம்பரிய மீன்பிடி திருவிழா நடத்தப்படுவது வழக்கம்.
ஆலங்குடி கண்மாயில் திரண்ட பொதுமக்கள்
காரைக்குடி அடுத்த ஆலங்குடி கிராமக் கண்மாயில் பராமரிப்பு பணிகள் மற்றும் கடந்த சில ஆண்டுகளாக போதிய நீர் வரத்து இல்லாத காரணத்தால் மீன்பிடி திருவிழா நடைபெறாமல் இருந்தது. இந்நிலையில், இந்த ஆண்டு கண்மாயில் நீர் வற்றியதை அடுத்து, 3 ஆண்டுகளுக்குப் பிறகு மீன்பிடி திருவிழா நடத்த ஊர்ப் பெரியோர்களால் முடிவு செய்யப்பட்டது. இதனைத் தொடர்ந்து, நேற்று அதிகாலை கிராமத்தின் முக்கியப் பிரமுகர்கள் வெள்ளை வீசி திருவிழாவை முறைப்படி தொடங்கி வைத்தனர்.
போட்டிபோட்டு மீன் பிடித்த மக்கள்
விழா தொடங்கியதும் கண்மாய் கரையில் காத்திருந்த ஆலங்குடி மற்றும் அதனைச் சுற்றியுள்ள நூற்றுக்கணக்கான கிராமங்களைச் சேர்ந்த ஆண்கள், பெண்கள், சிறுவர்கள் என ஆயிரக்கணக்கான பொதுமக்கள் ஒரே நேரத்தில் கண்மாய்க்குள் இறங்கினர். தங்களிடம் இருந்த ஊத்தா, கச்சா, பரிவட்டம் மற்றும் வலைகளைப் பயன்படுத்திப் பொதுமக்கள் போட்டிபோட்டு மீன்களைப் பிடித்தனர். இதில் விரால், கெண்டை, ஜிலேபி, கெளுத்தி உள்ளிட்ட பல்வேறு வகையான மீன்கள் கிடைத்தன. குறிப்பாகச் சிலருக்கு 5 கிலோ முதல் 10 கிலோ வரையிலான பெரிய அளவிலான மீன்கள் கிடைத்ததால் அவர்கள் மிகுந்த உற்சாகமடைந்தனர்.
நன்றாக மழை பெய்து விவசாயம் செழிக்கவும், ஊர் மக்கள் ஒற்றுமையுடன் வாழவும் வேண்டி நடத்தப்பட்ட இந்த மீன்பிடி திருவிழா, அப்பகுதியில் பெரும் திருவிழாப் பொலிவை ஏற்படுத்தியது. பிடிபட்ட மீன்களைக் குடும்பத்துடனும் உறவினர்களுடனும் சமைத்து உண்பதற்காக மக்கள் மகிழ்ச்சியுடன் வீட்டிற்கு எடுத்துச் சென்றனர்.