புற்றுநோய்க்கு சிகிச்சை பெறும் நோயாளிகளுக்கும் அவர்களது குடும்பத்தினருக்கும் நிம்மதி அளிக்கும் வகையில், நாடு முழுவதும் 1,364 புற்றுநோய் மருந்துகளின் அதிகபட்ச சில்லறை விலை (MRP) இன்று முதல் குறைக்கப்பட்டுள்ளது. இதன் மூலம் நுகர்வோருக்கு ஆண்டுக்கு சுமார் ரூ.3,540.38 கோடி சேமிப்பு கிடைக்கும் என மத்திய அரசு தெரிவித்துள்ளது.
137 புற்றுநோய் மருந்துகளின் வணிக லாப வரம்பு கட்டுப்பாடு
மத்திய அரசின் மருந்து விலைக் கட்டுப்பாட்டு ஆணையமான தேசிய மருந்து விலை நிர்ணய ஆணையம் (NPPA), 137 புற்றுநோய் மருந்துகளின் அதிகபட்ச சில்லறை விலையில் வணிக லாப வரம்பைக் கட்டுப்படுத்தியுள்ளது.
சுகாதார சேவைகள் தலைமை இயக்குநரகத்தின் (DGHS) கீழ் அமைக்கப்பட்ட நிபுணர் குழுவின் பரிந்துரைகளின் அடிப்படையில் இந்த நடவடிக்கை மேற்கொள்ளப்பட்டுள்ளது. இதன்படி, திருத்தப்பட்ட மருந்து விலைகள் 2026 நவம்பர் 9-ம் தேதி முதல் நாடு முழுவதும் அமலுக்கு வந்துள்ளன.
679 பிராண்டுகளின் விலை 50 சதவீதத்திற்கும் மேல் குறைப்பு
மத்திய வேதியியல் மற்றும் உரத்துறை அமைச்சகத்தின் தகவலின்படி, நவம்பர் 8-ம் தேதி நிலவரப்படி 85 மருந்து தயாரிப்பு நிறுவனங்கள் 121 வகையான மருந்துகளைச் சேர்ந்த 1,364 தயாரிப்புகளின் திருத்தப்பட்ட விலைகளை அறிவித்துள்ளன.
இதில் 679 பிராண்டுகளின் விலை 50 சதவீதத்திற்கும் அதிகமாகக் குறைக்கப்பட்டுள்ளது. அதிகபட்சமாக ஒரு மருந்தின் விலை 96.45 சதவீதம் வரை குறைக்கப்பட்டுள்ளது.
இந்த விலைக் குறைப்பின் மூலம் புற்றுநோய் சிகிச்சைக்காக அதிக செலவு செய்து வந்த நோயாளிகளுக்கு குறிப்பிடத்தக்க நிதிச் சுமை குறையும் என எதிர்பார்க்கப்படுகிறது.
மருந்துகளின் புதிய விலையை எப்படித் தெரிந்துகொள்வது?
புற்றுநோய் மருந்துகளை வாங்கும் பொதுமக்கள், மருந்து அட்டைகளில் அச்சிடப்பட்டுள்ள திருத்தப்பட்ட அதிகபட்ச சில்லறை விலையைச் சரிபார்க்கலாம்.
மேலும், மத்திய அரசின் ‘Pharma Sahi Daam’ மொபைல் செயலி மற்றும் தேசிய மருந்து விலை நிர்ணய ஆணையத்தின் அதிகாரப்பூர்வ இணையதளம் மூலமாகவும் மருந்துகளின் புதிய விலையைத் தெரிந்துகொள்ளலாம்.
அதிக விலைக்கு விற்றால் புகார் அளிக்கலாம்
திருத்தப்பட்ட விலையை விட அதிகமாக மருந்துகளை விற்பனை செய்ய மருந்துக் கடைகளுக்கும், மருத்துவமனை மருந்தகங்களுக்கும் அனுமதி இல்லை என மத்திய அரசு தெளிவுபடுத்தியுள்ளது.
மருந்துகளுக்கு நிர்ணயிக்கப்பட்ட விலையை விட அதிகமாகப் பணம் வசூலித்தால், பொதுமக்கள் ‘Pharma Jan Samadhan’ இணையதளம் வாயிலாகப் புகார் அளிக்கலாம். மேலும், தேசிய மருந்து விலை நிர்ணய ஆணையத்தின் உதவி எண்ணான 1800-111-255 என்ற எண்ணையும் தொடர்புகொள்ளலாம்.
புற்றுநோய் சிகிச்சைக்கான செலவைக் குறைத்து, மருந்துகள் எளிதில் கிடைக்கச் செய்யும் நோக்கில் மத்திய அரசு மேற்கொண்டுள்ள இந்த நடவடிக்கை நோயாளிகளிடையே வரவேற்பைப் பெறும் என எதிர்பார்க்கப்படுகிறது.