தீபாவளி பண்டிகை கொண்டாட்டங்களைத் தொடர்ந்து நாட்டின் தலைநகர் டெல்லியில் காற்றின் தரம் கடுமையாகப் பாதிக்கப்பட்டுள்ளது. காற்றுத் தரக் குறியீடு (AQI) 400-ஐத் தாண்டி ‘கடுமையான’ (Severe) பிரிவை எட்டியுள்ளதால், நகரம் முழுவதும் அடர்ந்த புகைமூட்டம் சூழ்ந்துள்ளது. உச்ச நீதிமன்றம் விதித்த இரவு 10 மணி காலக்கெடுவையும் மீறி பல்வேறு பகுதிகளில் நள்ளிரவைக் கடந்தும் பட்டாசுகள் வெடிக்கப்பட்டதே இதற்கு முக்கியக் காரணமாகக் கூறப்படுகிறது.
உச்ச நீதிமன்றக் கட்டுப்பாடுகளை மீறிய பட்டாசு வெடிப்பு!
டெல்லி-என்.சி.ஆர் பகுதியில் காற்று மாசுபாட்டைக் கட்டுப்படுத்தும் நோக்கில், குறிப்பிட்ட நேரக் கட்டுப்பாடுகளுடன் சான்றளிக்கப்பட்ட பசுமைப் பட்டாசுகளை (Green Crackers) வெடிக்க உச்ச நீதிமன்றம் அனுமதி அளித்திருந்தது. இருப்பினும், தீபாவளி இரவில் பல்வேறு இடங்களில் இரவு 10 மணியைக் கடந்தும் நள்ளிரவு வரை பட்டாசுகள் வெடிக்கப்பட்டன. இதனால் காற்றில் மாசு அதிகரித்து, பொதுமக்கள் பாதிக்கப்பட்டுள்ளனர்.
460-ஐத் தாண்டிய AQI அளவீடு!
மத்திய மாசுக்கட்டுப்பாட்டு வாரியத்தின் (CPCB) தரவுகளின்படி, டெல்லியின் சராசரி காற்றுத் தரக் குறியீடு 400-ஐத் தாண்டி கடுமையான நிலையை எட்டியுள்ளது. ஜஹாங்கீர்புரி உள்ளிட்ட முக்கியக் கண்காணிப்பு மையங்களில் AQI அளவு 460 வரை பதிவாகியுள்ளது.
இதற்கிடையே, AQI.in போன்ற தனியார் காற்றுத் தரக் கண்காணிப்பு தளங்களின் நிகழ்நேரத் தரவுகளின்படி, நள்ளிரவு 1.30 மணியளவில் டெல்லியின் சில பகுதிகளில் AQI அளவு 600-ஐக் கடந்து, அதிகபட்சமாக 1,331 வரை பதிவானதாகத் தகவல்கள் தெரிவிக்கின்றன.
மேலும், சுவிட்சர்லாந்தைச் சேர்ந்த IQAir நிறுவனத்தின் தரவுகளின்படி, தீபாவளிக்கு மறுநாள் உலகின் அதிக காற்று மாசுபாடு கொண்ட நகரங்களின் பட்டியலில் டெல்லி மூன்றாவது இடத்தைப் பிடித்துள்ளது.
காற்று மாசு விவகாரத்தில் அரசியல் மோதல்!
டெல்லியில் காற்று மாசுபாடு அதிகரித்துள்ள நிலையில், அதிகாரப்பூர்வ மாசுபாட்டுத் தரவுகள் முறையாக வெளியிடப்படவில்லை என்ற குற்றச்சாட்டுகளும் எழுந்துள்ளன.
ஆம் ஆத்மி கட்சி உள்ளிட்ட எதிர்க்கட்சிகள், மத்திய மாசுக்கட்டுப்பாட்டு வாரியத்தின் அதிகாரப்பூர்வ இணையதளத்தில் வெளியிடப்படும் புள்ளிவிவரங்கள் உண்மையான மாசுபாட்டின் அளவைப் பிரதிபலிக்கவில்லை என்றும், தரவுகள் தவறாகக் காட்டப்படுவதாகவும் குற்றம்சாட்டியுள்ளன.
அதேபோல், காங்கிரஸ் மூத்த தலைவர் அஜய் மக்கான், தீபாவளி இரவில் டெல்லியில் செயல்படும் 39 முக்கியக் காற்றுத் தரக் கண்காணிப்பு மையங்களில் 25 மையங்களில் PM2.5 அளவீடுகள் முறையாகப் பதிவு செய்யப்படவில்லை என்று புகார் தெரிவித்துள்ளார்.
புகைமூட்டத்தால் பொதுமக்கள் அவதி!
டெல்லி முழுவதும் அடர்ந்த புகைமூட்டம் நிலவுவதால் சாலைகளில் வாகன ஓட்டிகளுக்குப் பார்வைத்திறன் குறைந்துள்ளது. மேலும், காற்று மாசுபாட்டால் சுவாசப் பிரச்சினைகள், கண் எரிச்சல் உள்ளிட்ட பாதிப்புகளால் பொதுமக்கள் கடும் அவதிக்குள்ளாகி வருகின்றனர். தீபாவளிக் கொண்டாட்டத்திற்குப் பிறகு டெல்லியில் ஏற்பட்டுள்ள இந்தக் காற்று மாசுபாடு மீண்டும் சுற்றுச்சூழல் பாதுகாப்பு மற்றும் பட்டாசு கட்டுப்பாடுகள் குறித்த விவாதத்தை ஏற்படுத்தியுள்ளது.