நீட் வினாத்தாள் கசிவு மற்றும் தேர்வு முறைகேடுகளுக்கு எதிராக டெல்லி ஜந்தர் மந்தரில் தொடர் போராட்டத்தில் ஈடுபட்டு வந்த ‘கரப்பான் பூச்சி மக்கள் கட்சி’, ஒன்றிய அரசு அளித்த வாக்குறுதிகளை நிறைவேற்றாததால் மீண்டும் நாடு தழுவிய போராட்டத்தை அறிவித்துள்ளது.
ஜந்தர் மந்தரில் வெடித்த போராட்டம்
நீட் தேர்வு முறைகேடுகளுக்குப் பொறுப்பேற்று ஒன்றிய கல்வி அமைச்சர் தர்மேந்திர பிரதான் உடனடியாகப் பதவி விலக வேண்டும் உள்ளிட்ட பல்வேறு கோரிக்கைகளை வலியுறுத்தி, கடந்த ஜூன் மாத இறுதியில் இருந்து ஆகஸ்ட் 25-ஆம் தேதி வரை ஜந்தர் மந்தரில் ‘கரப்பான் பூச்சி மக்கள் கட்சி’ சார்பில் பிரம்மாண்ட போராட்டம் நடைபெற்றது. ஆயிரக்கணக்கான மாணவர்கள் மற்றும் இளைஞர்கள் திரண்டதால் போராட்டம் தீவிரமடைந்தது. போராட்டம் வலுவடைந்த நிலையில், ஜூலை 20 அன்று போராட்டத்தில் ஈடுபட்ட மாணவர்கள் மீது காவல்துறையினர் தடியடி நடத்தினர். இச்சம்பவத்தைக் கண்டித்து போராட்டம் நாடு முழுவதும் பரவியதால், நிலைமையைச் சமாளிக்க ஒன்றிய பாஜக அரசு பேச்சுவார்த்தைக்கு முன்வந்தது.
அரசு அளித்த உறுதிமொழியும் தற்போதைய ஏமாற்றமும்
ஜூலை 25 அன்று கரப்பான் பூச்சி மக்கள் கட்சியின் சார்பில் இரண்டு நிர்வாகிகள், ஒன்றிய அமைச்சர்களுடன் சமரசப் பேச்சுவார்த்தை நடத்தினர். இதில்:
- ஒன்றிய கல்வி அமைச்சர் பதவி விலகுவது,
- நீட் தேர்வால் உயிரிழந்த மாணவர்களின் குடும்பங்களுக்குத் தலா ரூ.1 கோடி இழப்பீடு வழங்குவது,
- போராட்டத்தில் ஈடுபட்ட மாணவர்கள் மற்றும் இளைஞர்கள் மீதான வழக்குகளை நிபந்தனையின்றித் திரும்பப் பெறுவது,
ஆகிய முக்கிய கோரிக்கைகளை ஏற்றுக்கொள்வதாக அரசு தரப்பில் உறுதி அளிக்கப்பட்டதைத் தொடர்ந்து போராட்டம் தற்காலிகமாகக் கைவிடப்பட்டது. ஆனால், அளித்த வாக்குறுதியின்படி மாணவர்கள் மீதான வழக்குகளை ஒன்றிய அரசு இதுவரை திரும்பப் பெறவில்லை. இதன் மூலம் பாஜக அரசு தங்களுக்கு நம்பிக்கை துரோகம் செய்துவிட்டதாகக் குற்றம் சாட்டியுள்ள கரப்பான் பூச்சி கட்சியினர், மீண்டும் களமிறங்கத் தீர்மானித்துள்ளனர்.
செப்டம்பர் 5-ல் டெல்லியில் அமைதிப் பேரணி
அரசுக்கு அளிக்கப்பட்ட கெடு முடிந்த நிலையில், வரும் செப்டம்பர் 5-ஆம் தேதி மீண்டும் போராட்டத்தைத் தொடங்க உள்ளதாகக் கரப்பான் பூச்சி மக்கள் கட்சி அறிவித்துள்ளது.
இது குறித்து அச்சங்கத்தினர் பேசுகையில், “நீட் தேர்வினால் உயிரிழந்தவர்களின் குடும்பத்தினர் மற்றும் காவல்துறை அத்துமீறலால் பாதிக்கப்பட்டவர்கள் தலைமையில் செப்டம்பர் 5 அன்று பிரம்மாண்ட அமைதிப் பேரணி நடைபெறும். டெல்லி இந்தியா கேட் பகுதியில் தொடங்கும் இந்த பேரணி, புதுடெல்லி காவல் ஆணையர் அலுவலகம் வரை அமைதியான முறையில் சென்றடையும்,” எனக் கூறினர். மேலும், நாட்டின் எதிர்காலத்தைக் காக்கவும், மாணவர் உரிமைகளை மீட்கவும் இந்தியாவின் அனைத்து இளைஞர்கள், மாணவர்கள் மற்றும் மாணவர் அமைப்புகள் செப்டம்பர் 5 அன்று இந்தியா கேட் பகுதியில் பெருந்திரளாக வந்து இணைய வேண்டும் என்றும் அவர்கள் அழைப்பு விடுத்துள்ளனர். இதனால் டெல்லியில் மீண்டும் பரபரப்பான சூழல் நிலவுகிறது.