ஆகஸ்ட் 15 சுதந்திர தினத்திலும், ஜனவரி 26 குடியரசு தினத்திலும் தேசியக் கொடி ஏற்றப்படுவது ஏன்? இரண்டு நாட்களுக்கும் இடையே உள்ள வரலாற்று மற்றும் அரசியலமைப்பு மரபுகள் குறித்து டாக்டர் கோகிலாமணி தனது எக்ஸ் (X) தளப் பதிவில் சுவாரஸ்யமான விளக்கங்களை அளித்துள்ளார்.
பிரதமரும் குடியரசுத் தலைவரும்: ஏன் இந்த வேறுபாடு?
சுதந்திர தினத்தில் நாட்டின் பிரதமரும், குடியரசு தினத்தில் குடியரசுத் தலைவரும் தேசியக் கொடியை ஏற்றும் நடைமுறை நடைமுறையில் உள்ளது. இதன் பின்னணியில் இந்தியாவின் முக்கியமான அரசியல் வரலாறு அடங்கியுள்ளது.
ஆகஸ்ட் 15 (சுதந்திர தினம்): 1947 ஆகஸ்ட் 15-ல் இந்தியா சுதந்திரம் பெற்றபோது, நாடு இன்னும் குடியரசாக மாறவில்லை; குடியரசுத் தலைவர் என்ற பதவியும் அப்போது உருவாகவில்லை. அதனால், சுதந்திர இந்தியாவின் முதல் பிரதமரான ஜவஹர்லால் நேரு தில்லி செங்கோட்டையில் முதன்முதலாக தேசியக் கொடியை ஏற்றினார்.
ஜனவரி 26 (குடியரசு தினம்): 1950 ஜனவரி 26 அன்று இந்திய அரசியலமைப்புச் சட்டம் முழுமையாக நடைமுறைக்கு வந்து, இந்தியா குடியரசு நாடாக உருவெடுத்தது. நாட்டின் முதல் குடியரசுத் தலைவராக டாக்டர் ராஜேந்திர பிரசாத் பொறுப்பேற்றார். அதன்பிறகு, குடியரசுத் தலைவர் குடியரசு தின விழாவில் தேசியக் கொடியை அவிழ்த்துப் பறக்கவிடும் மரபு தொடங்கியது.
‘கொடி ஏற்றுவதற்கும்’ (Hoisting) ‘கொடி அவிழ்ப்பதற்கும்’ (Unfurling) உள்ள வித்தியாசம்!
கொடி ஏற்றப்படும் முறையிலும் இரு நாட்களுக்கும் இடையே ஒரு முக்கிய வேறுபாடு உள்ளது:
ஆகஸ்ட் 15 (Flag Hoisting): புதிய தேசமாக இந்தியா உருவெடுத்த குறியீடாக, சுதந்திர தினத்தன்று தேசியக் கொடி கம்பத்தின் கீழிருந்து கயிறு மூலம் மேலே உயர்த்தப்பட்டுப் பறக்கவிடப்படுகிறது (Flag Hoisting).
ஜனவரி 26 (Flag Unfurling): குடியரசு தினத்தன்று, கொடி ஏற்கனவே கம்பத்தின் உச்சியில் மடிக்கப்பட்டு கட்டப்பட்டிருக்கும். அது அவிழ்க்கப்பட்டு மட்டுமே பறக்கவிடப்படுகிறது (Flag Unfurling). இது ஏற்கனவே சுதந்திரம் பெற்ற இந்தியா, அரசியலமைப்பு சார்ந்த குடியரசாக மாறியதை உணர்த்துகிறது.
மாநிலங்களில் பின்பற்றப்படும் நடைமுறை
மத்திய அரசைப் போலவே மாநிலங்களிலும் இதே அரசியலமைப்பு நடைமுறை பின்பற்றப்படுகிறது. அதன்படி, சுதந்திர தினத்தன்று மாநில முதலமைச்சர்களும், குடியரசு தினத்தன்று மாநில ஆளுநர்களும் தேசியக் கொடியை ஏற்றும் மரபு தொடர்கிறது. ஒரே தேசியக் கொடியாக இருந்தாலும், இந்த இரண்டு தேசிய நாட்களுக்குப் பின்னாலும் மகத்தான வரலாறும், தெளிவான அரசியலமைப்பு நெறிமுறைகளும் நிறைந்துள்ளன என்பது குறிப்பிடத்தக்கது.
ஓஷோ ரஜினிஷ்: சர்ச்சைகளின் நாயகன், ஆன்மிகப் புரட்சியாளர் – ஒரு வாழ்க்கை வரலாறு